ཕྱི་ལོ་ ༢༠༢༠ ཟླ་ ༩ ཚེས་ ༨ རེས་གཟའ་མིག་དམར།
༄༅། །སྦེལ་ཇམ་སྐུ་ཚབ་དོན་ཁང་གི་གོ་སྒྲིག་འོག་ཕྱི་ལོ་ ༢༠༢༠ ཟླ་ ༩ ཚེས་ ༤ ཉིན་ཡུ་རོབ་ཀྱི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་ལ་ལྟ་ཚུལ་ཞེས་པའི་བརྗོད་གཞིའི་ཐོག་དྲ་རྒྱ་བརྒྱུད་བགྲོ་གླེང་ཚོགས་འདུ་ཞིག་ཚོགས་ཡོད་པ་དང་། ངོས་ཀྱིས་ཡུ་རོབ་སྤྱི་མཐུན་ཚོགས་པར་ཡིད་སྨོན་བྱེད་ཀྱི་ཡོད་ཅེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བའི་སྐོར་བརྙན་ཐུང་དུས་ཡུན་སྐར་མ་བཅུ་བདུན་ཅན་ཞིག་དབུ་འབྱེད་གནང་རྗེས་དྲ་ཐོག་གི་བགྲོ་གླེང་དངོས་གཞི་དབུ་འཛུགས་གནང་ཡོད།
ཐེངས་འདིའི་བགྲོ་གླེང་ཐོག་གསུང་བཤད་གནང་མཁན་རྣམས་ནི། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མི་ཀུ་ལ་སི་པེཀ་ས་ Mikulas Peksa མཆོག སྦེལ་ཇམ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་གཞོན་པ་དང་སྦེལ་ཇམ་གྲོས་ཚོགས་འཐུས་མི་ས་མུལ་ཁོ་གོ་ལ་ཊི་ Samuel Cogolati མཆོག སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་བཅས་ཡིན་ཞིང་། སྦེལ་ཇམ་སྐུ་ཚབ་དོན་གཅོད་ཁང་གི་ལས་བྱེད་ཡུ་རོབ་བོད་དོན་ཞུ་གཏུག་པ་རིག་འཛོན་ཆོས་སྒྲོན་ལགས་ཀྱིས་བགྲོ་གླེང་གི་གཙོ་སྐྱོང་གནང་ཡོད།
དེ་ཡང་བགྲོ་གླེང་གི་ཐོག་མར་དཔལ་ལྡན་སྲིད་སྐྱོང་མཆོག་གིས། ད་ལྟའི་བོད་ནང་གི་འགྲོ་བ་མིའི་ཐོབ་ཐང་དང་། ཡུ་རོབ་རྒྱལ་ཁབ་ཁག་གིས་བོད་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱབ་སྐྱོར་གནང་བཞིན་པའི་སྐོར། དེ་བཞིན་རྒྱལ་སྤྱིའི་ཐོག་ཡུ་རོབ་ཀྱིས་ད་ལྟའི་རྒྱལ་སྤྱིའི་ཆབ་སྲིད་ལས་འགན་སྒྲུབ་ཕྱོགས་ལ་ལྟ་ཚུལ་སོགས་ཀྱི་སྐོར་གསུངས།
དེ་རྗེས་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མི་ཀུ་ལ་སི་མཆོག་གིས་འདས་པའི་ལོ་ངོ་བཅུ་ཕྲག་གསུམ་ལྷག་རིང་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་བྱུང་རིམ་དང་། ཕྱི་ལོ་ ༢༠༡༨ ལོར་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་བོད་དོན་སྐོར་གྲོས་ཆོད་བཞག་པ་མ་ཟད། ཉེ་ཆར་ཡང་བོད་དོན་ཆེད་ལས་འགུལ་གལ་ཆེ་སྤེལ་བ་སོགས་ཀྱི་སྐོར་གསུངས། སྦེལ་ཇམ་གྲོས་ཚོགས་འཐུས་མི་ས་མུལ་ཁོ་གོ་ལ་ཊི་མཆོག་གིས་བོད་ཀྱི་ཁོར་ཡུག་དང་། སྦེལ་ཇམ་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཐད་ལངས་ཕྱོགས་འཛིན་བཞིན་པ་སོགས་ཀྱི་སྐོར་གསུངས།
སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་ཀྱི་ཁྲིམས་ལུགས་དབང་འཛིན་དང་དྲང་བདེན་སོགས་ལ་རྒྱབ་སྐྱོར་མཛད་བཞིན་པའི་སྐོར་དང་། ཡུ་རོབ་སྤྱི་མཐུན་ཚོགས་པའི་ཚོགས་མི་རྒྱལ་ཁབ་ཚོས་ད་བར་བོད་དོན་དང་བོད་མི། ལྷག་པར་སྦེལ་ཇམ་ནང་ཡོད་པའི་བོད་མི་ཚོའི་སླད་དུ་རྒྱབ་སྐྱོར་ཤུགས་ཆེ་གནང་དང་གནང་བཞིན་པ་བཅས་ཀྱི་སྐོར་གསུངས།
བོད་མིའི་སྒྲིག་འཛུགས་ཕྱི་དྲིལ་བོད་ཀྱི་བརྙན་འཕྲིན་ལས་ཁང་གིས་ཐེངས་འདིའི་བགྲོ་གླེང་ཐད་གཏོང་གནང་ཡོད་པ་བཅས། །
