ཕྱི་ལོ་ ༢༠༢༠ ཟླ་ ༩ ཚེས་ ༡ རེས་གཟའ་མིག་དམར། 
༄༅། །བོད་རྒྱལ་ལོ་ ༢༡༤༧ ཕྱི་ལོ་ ༢༠༢༠ ཟླ་ ༩ ཚེས་ ༢ རེས་གཟའ་ལྷག་པའི་ཉིན་གངས་སྐྱིད་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་ཚང་འཛོམས་ཐོག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་མི་རྣམས་ལ་མང་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་མི་ལོ་ ༦༠ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་བཅས་སྲིད་སྐྱོང་ཚོགས་ཁང་དུ་ཕེབས་མཚམས་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་དར་བརྙན་དཔར་ཐོག་སྤྱན་འབུལ་ཞུས་པ་དང་འབྲེལ་བོད་ཀྱི་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར། དེ་ནས་རྒྱ་གར་གྱི་སྲིད་འཛིན་ཟུར་པ་སྐུ་ཞབས་པར་ནམ་མུ་ཁར་ཇི་མཆོག་སྐུ་ཚེའི་འཕེན་པར་རྫོགས་པར་མྱ་ངན་གུད་འདུད་ཆེད་མྱ་ངན་ངག་གཅད་སྐར་གཅིག་རིང་ཞུས་གྲུབ་མཚམས་བོད་ཀྱི་ཟློས་གར་ཚོགས་པས་མང་གཙོ་གསར་གཞས་འབུལ་ལམ་ཞུས།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་འདི་ལོ་སྲིད་སྐྱོང་སློབ་ཡོན་བཞེས་མཁན་སློབ་ཕྲུག་རྣམས་ལ་གཟེངས་རྟགས་གནང་བ་དང་། ཕྱོགས་མཚུངས་བོད་ཀྱི་ཟློས་གར་ཚོགས་པའི་དབྱར་སྐྱིད་ ༢༠༢༠ ལོའི་བརྙན་འཕྲིན་མཐེབ་སྡེར་དབུ་འབྱེད་གནང་།
དེ་ནས་འདི་ལོའི་སྲིད་སྐྱོང་རིགས་གཅིག་རྐང་འཛིན་ཆེད་བསྟོད་བཞེས་མཁན་སློབ་ཕྲུག་རྣམ་པའི་མཚན་གཞུང་སྙན་སྒྲོན་ཞུས་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཚོག་གིས་ཕྱི་ལོ་ ༢༠༢༠ ལོའི་འཛིན་རིམ་བཅུ་གཉིས་ཀྱི་སྡེ་ཚན་གསུམ་གྱི་རྩེ་ཕུད་ཨང་རིམ་དང་པོ་དང་གཉིས་པ། གསུམ་པ་སོན་པ་བཅས་ཀྱི་སློབ་ཕྲུག་རྣམས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་གནང་།
དེ་རྗེས་སྦར་སིལ་དོན་ཁང་ནས་བཟོ་བསྐྲུན་ཞུས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་གིས་ I Admire the spirit of the Eurpoean Union ཞེས་པའི་བརྙན་ཐུང་ཞིག་དང་ཨ་རི་ནས་བཟོ་བསྐྲུན་ཞུས་པའི་བོད་དོན་དང་འབྲེལ་བའི་ Documentary གཟིགས་འབུལ་ཞུས་མཚམས་དཔལ་ལྡན་བོད་མི་མང་སྤྱི་འཐུས་ཚོགས་གཅོ་པདྨ་འབྱུང་གནས་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་།
དེ་ནས་དཔལ་ལྡན་སྲིད་སྐྱོང་མཆོག་གིས། ཕྱི་ལོ་ ༢༠༢༠ ཟླ་ ༨ ཚེས་ ༢༨ ནས་ ༢༩ བར་ཉིན་གྲངས་གཉིས་རིང་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བ་རྒྱ་ནག་གི་རྒྱལ་ས་པེ་ཅིང་དུ་འཚོགས་སྐབས་རྒྱ་ནག་གི་སྲིད་འཛིན་ཞི་ཅིན་ཕིང་གིས་གཏམ་བཤད་བྱས་པ་དེ་འཆར་ཅན་ལྟ་བུ་རེད། འོན་ཀྱང་ཕྱོགས་གཞན་ཞིག་ནས་བལྟས་ན། ཛ་དྲག་གི་གནས་སྟངས་རེད་འདུག རྒྱ་ནག་གུང་བྲན་ཏང་གི་དམིགས་ཡུལ་ནི་བོད་རྒྱ་སྡེ་ལ་བསྒྱུར་རྒྱུ་དང་། བོད་རིགས་རྒྱ་རིགས་ལ་བསྒྱུར་རྒྱུ་རེད། ཁོ་ཚོའི་དམིགས་ཡུལ་ངན་པ་འདི་དྲག་གནོན་དང་བཙན་གནོན་ཐོག་ནས་བྱེད་ཀྱི་ཡོད། བོད་མི་རྣམས་ལ་དབྱེ་འབྱེད་དང་སྡུག་རྩུབ་གཏོང་བཞིན་ཡོད། རྒྱ་ནག་གི་ཕྱི་སྲིད་བློན་ཆེན་བོད་དུ་ཕྱིན་ནས་གཏམ་བཤད་བྱས་པ་དེ་བོད་འདི་ཕྱི་སྲིད་ཐོག་ནས་ཀྱང་ཇི་ཙམ་གལ་ཆེན་པོ་ཡིན་པ་ཧ་ཅང་གསལ་པོ་ཆགས་ཡོང་གི་འདུག
ཞི་ཅིན་ཕིང་གིས་བོད་མིར་གདུག་རྩུབ་མནར་གཅོད་གཏོང་རྒྱུའི་བསམ་བློ་དོར་དགོས་པ་དང་། གཞིས་བཞུགས་བོད་མི་མང་གི་བསམ་ཚུལ་ལ་ངེས་པར་དུ་དང་ལེན་བྱེད་དགོས་ཅིང་། ༸གོང་ས་མཆོག་གི་སྐུ་ཚབ་བརྒྱུད་རྒྱ་ནག་གཞུང་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཕུལ་བ་བཞིན་དབུ་མའི་ལམ་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་ཞི་བའི་གྲོས་མོལ་གང་མགྱོགས་འགོ་འཛུགས་གནང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། དེ་ལྟར་བྱས་ན་སྤྱི་ཚོགས་བརྟན་ལྷིང་བསམ་དོན་བཞིན་འགྲུབ་རྒྱུ་ཉག་གཅིག་ཡིན།
ཉེ་ལམ་དབུས་འོས་བསྡུ་ལས་ཁང་ནས་སྲིད་སྐྱོང་དང་། སྐབས་བཅུ་བདུན་པའི་སྤྱི་འཐུས་ཀྱི་འོས་བསྡུ་ཆེན་མོའི་ལས་དོན་འགོ་འཛུགས་གསལ་བསྒྲགས་གནང་ཟིན་པ་ལྟར། འཛམ་གླིང་གང་སར་གནས་པའི་བོད་རིགས་ཡོངས་ཀྱིས་སྔོན་འགྲོ་དང་དངོས་གཞིའི་འོས་བསྡུ་གཉིས་ཀར་ཆ་ཤས་ངེས་པར་དུ་ལེན་རྒྱུ་ཧ་ཅང་གལ་ཆེན་པོ་ཡིན། ལོ་ལྔའི་ནང་མང་གཙོ་དང་འབྲེལ་བའི་འགན་ཞིག་ཡོད་པ་དེ་ངེས་པར་དུ་བཞེས་རོགས་ཞུ་རྒྱུ་ཡིན། དེ་དང་ཆབས་ཅིག་ཏུ་སྤྱི་ཚོགས་དྲྭ་ལམ་བེད་སྤྱོད་ལོག་པར་བཏང་ནས་འཆལ་གཏམ་དང་དཀྲུག་ཤིང་སོགས་བོད་མིའི་ཆིག་སྒྲིལ་ལ་གནོད་པའི་བྱེད་བབ་རིགས་ཀྱི་མགོ་སྐོར་འོག་ལ་མ་ཚུད་པར་ཡིད་གཟབ་གནང་རྒྱུ་གལ་ཆེན་པོ་ཡིན།
གསར་འགྱུར་བརྒྱུད་ལམ་ཁག་ནང་གནས་ཚུལ་གོ་ཐོས་ལྟར་ན། རྒྱ་ནག་གཞུང་གིས་ང་ཚོའི་འོས་བསྡུ་ལ་ཐེ་བྱུས་དང་། དཀྲོག་གཏམ་སྤེལ་ནས་སྤྱི་ཚོགས་གཏོར་བཤིག་གཏོང་རྒྱུའི་འབད་བརྩོན་བྱེད་ཀྱི་ཡོད་པ་ཧ་ཅང་གསལ་པོ་རེད་འདུག བཙན་བྱོལ་ནང་བོད་མི་ཉུང་ཤས་ལས་མེད་སྟབས། བཙན་བྱོལ་བོད་མི་རྣམས་ནས་གཟབ་གཟབ་མ་བྱས་པ་ཡིན་ན། རྔ་པེ་ཅིང་གིས་རྡུང་། ཆབ་སྲིད་རགས་པའི་བྲོ་ང་ཚོས་འཁྲབ་པ་ཡིན་ན། དགྲ་དགའ་གཉེན་སྡུག་རེད། དེར་བརྟེན་མང་གཙོ་ཁ་ལ་འཁྱེར་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་ན་རྩ་བ་ཉིད་ནས་འགྲིག་གི་མ་རེད། དེ་བཞིན་དབུ་མའི་ལམ་ཁ་ལ་འཁྱེར་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཛད་དཀའ་བཟོ་ན་རྩ་བ་ཉིད་ནས་འགྲིག་གི་མ་རེད། ཕྱོགས་མཚུངས་འོས་བསྡུ་ཁ་ལ་འཁྱེར་ནས་འདྲ་མིན་བཤད་ན་འགྲིག་གི་མ་རེད། འོས་བསྡུ་ཁ་ལ་འཁྱེར་ནས་ཆོལ་ཁའི་འཐེན་འཁྱེར་དང་ཆོས་ལུགས་ཀྱི་འཐེན་འཁྱེར། སྤྱི་ཚོགས་དཀྲུག་རྒྱུའི་ལས་འགུལ་སྤེལ་ན་རྩ་བ་ཉིད་ནས་འགྲིག་གི་མ་རེད། ཅེས་སོགས་ཀྱི་གསུང་བཤད་གནང་གྲུབ་མཚམས་བོད་མི་མང་སྤྱི་འཐུས་ཚོགས་གཙོ་མཆོག་གིས་དབུས་རང་ཁོངས་ལས་བྱེད་ཞབས་ལོ་ ༢༥ ཡན་འཁོར་བ་རྣམས་ལ་ལེགས་གསོལ་ཕྱག་འཁྱེར་དང་། ན་གཞོན་ནུས་སྤེལ་ལས་གཞིའི་གཟེངས་བསྟོད་བཞེས་མཁན་ན་གཞོན་གཅིག་ལ་ལེགས་གསོལ་ལག་འཁྱེར་གནང་།
སྤྱིར་ལོ་ལྟར་བོད་མིའི་མང་གཙོ་དུས་ཆེན་སྲུང་བརྩི་ཞུ་སྐབས་རིག་གཞུང་གཞས་སྣ་འཁྲབ་སྟོན་སོགས་གཟིགས་འབུལ་ཞུ་ཡི་ཡོད་ཀྱང་ཕྱི་ཟླ་ ༨ ཚེས་ ༣༡ ཉིན་རྒྱ་གར་གྱི་སྲིད་འཛིན་ཟུར་པ་སྐུ་ཞབས་པར་ནམ་མུ་ཁར་ཇི་མཆོག་སྐུ་ཚེ་འཕེན་པ་རྫོགས་པར་བོད་མིའི་སྒྲིག་འཛུགས་ནས་མྱ་ངན་མཚོན་ཆེད་གཞས་སྣ་ལ་འཁྲབ་སྟོན་གཟིགས་འབུལ་ཞུས་མེད་པ་བཅས། །
