ཕྱི་ལོ་ ༢༠༢༠ ཟླ་ ༩ ཚེས་ ༢༤ རེས་གཟའ་ཕུར་བུ།

༄༅། །ཕྱི་ལོ་ ༢༠༢༠ ཟླ་ ༩ ཚེས་ ༢༣ ཉིན་རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་གྲོང་ཁྱེར་མ་ན་ལིར་གནས་སྡོད་ཚེ་རིང་དབང་འདུས་རང་ལོ་ ༤༣ དང་། ཚེ་རིང་དོན་གྲུབ་རང་ལོ་ ༤༧ ། ཆུང་བདག་རང་ལོ་ ༦༥ ཅན་བཅས་བོད་མི་གསུམ་གྱིས་མ་ན་ལི་ནས་རྒྱ་གར་གྱི་རྒྱལ་ས་ལྡི་ལི་བར་བོད་དོན་སླད་དུ་ཞི་བའི་གོམ་བགྲོད་ཀྱི་ལས་འགུལ་ཞིག་འགོ་འཛུགས་གནང་འདུག

དེ་ཡང་ཁོང་རྣམ་པས་ཐེངས་འདིའི་གོམ་བགྲོད་བརྒྱུད་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་ཡོང་ཐབས་དང་། ལྷག་པར་རྒྱ་ནག་གཞུང་ནས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་བོད་ནང་ཆིབས་བསྒྱུར་གནང་འཇུག་དགོས་པ་དང་།  དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱ་གྲོས་མོལ་བསྐྱར་གསོ་དགོས་པ། ༧ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ཆ་རྐྱེན་གང་ཡང་མེད་པའི་ཐོག་ནས་མགྱོགས་མྱུར་གློད་བཀྲོལ་གཏོང་དགོས་པ་བཅས་དགོས་འདུན་དོན་ཚན་གསུམ་བཏོང་གནང་འདུག 

བོད་དོན་ཞི་བའི་གོམ་བགྲོད་པ་རྣམས་ལྡི་ལིར་འབྱོར་མཚམས་ཕྱི་ཟླ་ ༡༠ ཚེས་ ༢༣ ཉིན་ལྡི་ལིར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་གོང་གསལ་དགོས་འདུན་དོན་ཚན་གསུམ་གྱི་ཐོག་ཞི་བའི་ལས་འགུལ་ཞིག་ཀྱང་སྤེལ་རྒྱུ་ཡིན་ཞིང་། ཟླ་བ་གཅིག་ལྷག་རིང་གི་ཞི་བའི་གོམ་བགྲོད་ཀྱི་ལས་འགུལ་སྐབས་འགྲོ་གྲོན་ཡོངས་རྫོགས་རང་ངོས་ནས་གཏོང་རྒྱུ་ཡིན་འདུག་པ་བཅས། །