ཕྱི་ལོ་ ༢༠༢༠ ཟླ་ ༩ ཚེས་ ༢༩ རེས་གཟའ་མིག་དམར།

 ༄༅། །བོད་དང་ཤུར་ཏུར་ཀི་སི་ཐན་སྐོར་རང་དབང་གི་ཉམས་ཞིབ་པ་ཨེ་ཌི་རི་ཨན་ཛན་ཛི་ Adrian Zenz ལགས་ཀྱིས་བརྗོད་པ་ལྟར་ན། བོད་རང་སྐྱོང་ལྗོངས་དབུལ་སྐྱོར་གསར་སྤེལ་ལས་དོན་ཞེས་པའི་སྲིད་བྱུས་འོག་རྒྱ་ནག་གཞུང་གིས་བོད་ནང་ངལ་རྩོལ་བསྒྱུར་བཀོད་ཁང་ཞེས་པ་གསར་འཛུགས་བྱས་ཏེ་ཕྱི་ལོ་ ༢༠༢༠ ལོའི་ལོ་འགོ་ནས་བཟུང་ཕྱི་ཟླ་ ༧ བར་ཁྱོན་བོད་མི་འབུམ་ལྔ་ལྷག་བཙན་དབང་གིས་ངལ་རྩོལ་བསྒྱུར་བཀོད་ཁང་དུ་བཅུག་ནས་ངལ་རྩོལ་བྱེད་དུ་འཇུག་གི་ཡོད་པ་མ་ཟད། བོད་མི་རྣམས་ལ་བཙན་གྱིས་ལྟ་བ་བསྒྱུར་ཐབས་བྱས་པ་དང་།  སོ་ལྟའི་པར་ཆས་བཙུགས་པ། ཉེས་ཆད་ལྕི་མོ་བཅད་པ། དམག་མི་ལྟ་བུའི་སྦྱོང་བརྡར་སྤྲད་ཡོད་པ་ཁོང་གི་ཉམས་ཞིབ་ཀྱི་སྙན་ཐོའི་ནང་བཀོད་ཡོད།

རྒྱ་ནག་གཞུང་གིས་བོད་ནང་བོད་མི་རྣམས་ལ་དམག་མི་ལྟ་བུའི་ངལ་རྩོལ་བསྒྱུར་བཀོད་ཁང་བཙུགས་ཏེ་བོད་ཀྱི་ཆོས་དང་རིག་གཞུང་རྩ་གཏོར་གཏོང་བཞིན་ཡོད་པ་མ་ཟད། རྒྱ་ནག་གཞུང་གིས་དབུལ་ཕོངས་ངལ་སེལ་དང་ཡར་རྒྱས་ལས་གཞི་ཟེར་བར་ཁ་གཡར་ནས་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་འཚོ་བ་སྐྱེལ་སྟངས་ལ་རྩིས་མེད་རྡོག་རོལ་བཏང་སྟེ་བོད་པའི་འབྲོག་པ་རྣམས་ཀྱི་རྩྭ་ས་དང་།  ཞིང་པ་རྣམས་ཀྱི་ཞིང་ས་རྣམས་ཁྲིམས་འགལ་གྱིས་བཙན་འཕྲོག་བྱས་དང་བྱེད་བཞིན་ཡོད། རྒྱ་ནག་གཞུང་གིས་དེ་ལྟ་བུའི་དྲག་གནོན་ཅན་གྱི་སྲིད་བྱུས་དེ་སྔ་བོད་ནང་ཚོད་ལྟ་བྱས་ཡོད་པ་མ་ཟད། དེ་བཞིན་ཤར་ཏུར་ཀི་སི་ཐན་ནང་ལའང་ཚོད་ལྟ་བྱས་ཡོད་པ་དང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་སླར་ཡང་ངལ་རྩོལ་བསྒྱུར་བཀོད་ཁང་ཞེས་དྲག་གནོན་ཅན་གྱི་སྲིད་བྱུས་དེ་བོད་ནང་ལག་བསྟར་བྱས་ཡོད།

རྒྱ་ནག་གཞུང་གིས་ཕྱི་ལོ་ ༢༠༠༥ ལོ་ནས་བཟུང་དྲག་གནོན་ཅན་གྱི་སྲིད་བྱུས་ལག་བསྟར་བྱེད་འགོ་བཙུགས་ཏེ་བོད་ཀྱི་རྒྱལ་ས་ལྷ་ས་ཁུལ་དུ་ཞིང་པ་ཚོར་ངལ་རྩོལ་ལས་རིགས་སྦྱོང་བརྡར་ཟེར་བ་སྤྲད་ཡོད། ཕྱི་ལོ་ ༢༠༠༦ ལོ་ནས་བཟུང་ལོ་ལྔའི་འཆར་གཞི་ཐེངས་ ༡༡ ལག་བསྟར་བྱས་ཏེ་བོད་རང་སྐྱོང་ལྗོངས་ནང་གཞི་རྒྱ་ཆེ་བའི་ངལ་རྩོལ་ལས་རིགས་སྦྱོང་བརྡར་སྤྲད་པ་དང་། ཕྱི་ལོ་ ༢༠༡༢ ལོར་ཆབ་མདོ་ཁུལ་དུ་ངལ་རྩོལ་ལས་རིགས་སྦྱོང་བརྡར་ལག་བསྟར་བྱས་ཏེ་ཕྱི་ལོ་ ༢༠༡༦ བར་ངལ་རྩོལ་བསྒྱུར་བཀོད་ཁང་ ༤༥ ལྷག་འཛུགས་སྐྲུན་བྱས་ཡོད།   

རྒྱ་ནག་གཞུང་གི་འཆར་གཞི་ལྟར་ན།  དམག་མི་ལྟ་བུའི་ངལ་རྩོལ་སྒྱུར་བཀོད་ཁང་དུ་བོད་མི་ངལ་རྩོལ་བ་ཚོར་ལས་རིགས་སྦྱོང་བརྡར་སྤྲད་དེ་ཕྱི་ལོ་ ༢༠༢༤ བར་ངལ་རྩོལ་བ་བརྒྱ་ཆ་ ༦༠ ལྷག་ལ་ལས་ཀ་སྤྲོད་ཐུབ་པའི་ཚོད་དཔག་བྱེད་བཞིན་ཡོད། བོད་རང་སྐྱོང་ལྗོངས་ཁུལ་དུ་བོད་མི་ངལ་རྩོལ་བ་ ༥༤༣༠༠༠ ལ་ཟླ་གྲངས་བདུན་རིང་ངལ་རྩོལ་ལས་རིགས་སྦྱོང་བརྡར་སྤྲད་རྗེས། དེའི་ཁྲོད་ནས་ངལ་རྩོལ་བ་ ༤༩ ༠༠༠ ཙམ་བོད་རང་སྐྱོང་ལྗོངས་ཀྱི་ས་ཁུལ་གཞན་དག་ལ་བཏང་ཡོད་པ་དང་།

ངལ་རྩོལ་བ་ ༣༡༠༩ ཙམ་རྒྱ་ནག་ལ་བཏང་ཡོད། ཕྱི་ལོ་ ༢༠༢༠ ལོའི་ལོ་མཇུག་བར་བོད་རང་སྐྱོང་ལྗོངས་ཡོངས་རྫོགས་ལ་ངལ་རྩོལ་ལས་རིགས་སྦྱོང་བརྡར་ངེས་པར་དུ་སྤྲོད་དགོས་པ་བཀོད་ཡོད། གནས་སྤོ་བྱས་པའི་བོད་མི་ངལ་རྩོལ་བ་ཚོར་གླ་ཆ་ཉུང་བའི་ལས་རིགས་དཔེར་ན་གཏེར་ཁ་སྔོག་འདོན་དང་། ལམ་བཟོ། མ་བྱན། ཁ་ལོ་པ་སོགས་ཀྱི་ལས་ཀ་སྤྲོད་ཀྱི་ཡོད། །