ཕྱི་ལོ་ ༢༠༢༠ ཟླ་ ༩ ཚེས་ ༢༥ རེས་གཟའ་པ་སངས། 

༄༅། །ཁེ་ན་ཌའི་ཨོན་ཊེ་རིའོ་ Ontario མངའ་སྡེའི་གྲོས་ཚོགས་འཐུས་མི་རྣམ་པས་སྤྱི་མོས་ཐོག་ཕྱི་ཟླ་བདུན་པ་ནི། བོད་ཀྱི་རིག་གཞུང་གཅེས་སྐྱོང་གི་ཟླ་བ་ Tibetan Heritage month ཞེས་ངོས་འཛིན་གྱིས་ཁྲིམས་འཆར་ཞིག་གཏན་འབེབས་གནང་འདུག

དེ་ཡང་ཁེ་ན་ཌའི་ཨོན་ཊེ་རིའོ་ Ontario ས་གནས་གྲོས་ཚོགས་འཐུས་མི་བུ་ཁྲིད་དཀར་པོ་ཆེ་ལགས་ཀྱིས་ཁེ་ན་ཌའི་ཨོན་ཊེ་རིའོ་ས་གནས་གྲོས་ཚོགས་སུ་ཕྱི་ཟླ་བདུན་པ་ནི་བོད་ཀྱི་རིག་གཞུང་གཅེས་སྐྱོང་གི་ཟླ་བ་ལ་ངོས་འཛིན་གནང་དགོས་པའི་ཁྲིམས་འཆར་བཏོན་གནང་བ་ཞིག་ཡིན་ཞིང་། ཕྱི་ཟླ་བདུན་པ་ནི་བོད་ཀྱི་རིག་གཞུང་གཅེས་སྐྱོང་གི་ཟླ་བ་ཞེས་གཏན་འབེབས་གནང་དགོས་པའི་དམིགས་ཡུལ་གཙོ་བོ་ནི། ཁེ་ན་ཌའི་ཨོན་ཊེ་རིའོ་མངའ་སྡེའི་ནང་གནས་སྡོད་བོད་མི་ཚོས་ས་གནས་སུ་སྤྱི་ཚོགས་ལ་ཕན་པའི་ཞབས་འདེགས་གལ་ཆེན་བསྒྲུབས་པར་ངོས་འཛིན་དང་། བོད་དོན་གོ་རྟོགས་སྤེལ་ཆེད་གཏན་འབེབས་གནང་བ་ཞིག་ཡིན་འདུག 

ཨོན་ཊེ་རིའོ་མངའ་སྡེའི་ས་གནས་གྲོས་ཚོགས་འཐུས་མི་བོད་རིགས་བུ་ཁྲིད་དཀར་པོ་ཆེ་ལགས་ཀྱིས། ཕྱི་ཟླ་བདུན་པ་ནི་གཞིས་བྱེས་བོད་མིར་མཚོན་ན་ཧ་ཅང་གལ་ཆེན་པོ་ཆགས་ཀྱི་ཡོད་པ་མ་ཟད། ཨོན་ཊེ་རིའོ་མངའ་སྡེའི་ནང་ལོ་ལྟར་ཕྱི་ཟླ་ ༧ ཚེས་ ༦ ཉིན་ཁེ་ན་ཌའི་ཆེས་མཐོའི་མི་སེར་ཡིན་པ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་གྱི་ཉིན་མོ་སྲུང་བརྩི་ཞུ་ཡི་ཡོད། ཅེས་གསུངས། །