ཕྱི་ལོ་ ༢༠༢༠ ཟླ་ ༩ ཚེས་ ༤ རེས་གཟའ་པ་སངས།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ནང་སྲིད་ཁྱབ་ཁོངས་བལ་ཡུལ་མཆོད་འཇོར་ས་གནས་འགོ་འཛིན་ལས་ཁུངས་ནས་ཏོག་དབྱིབས་གཉན་རིམས་ ༡༩ COVID-19 སྔོན་འགོག་ལས་དོན་རྒྱ་ཆེ་སྤེལ་དོན།
༡༽ འདི་ག་ས་གནས་ལས་ཁུངས་སུ་གངས་ཅན་བདེ་རྩ་བརྒྱུད་ཁ་རས་གྲངས་ ༤༦༥༠ ཐམ་པ་གནང་འབྱོར་བྱུང་དོན་ལྟར་ཁྱབ་ཁོངས་སྐྱིད་སྡུག་ཁག་གི་ཚོགས་གཙོ་བརྒྱུད་མི་མང་རྣམས་ལ་བགྲོ་འགྲེམས་ཞུས་ཡོད།
༢༽བདུན་ཕྲག་རེར་ས་གནས་ལས་ཁུངས་ཁོར་ཡུག་གཡས་གཡོན་དང་བདེ་སྐྱིད་ཁང་གསར་དང་ཁམས་པ་གཞིས་ཆགས་གཉིས་ལ་དུག་སེལ་ལས་དོན་ཞུ་མུས་ཡིན།
༣༽བལ་ཡུལ་གངས་ཅན་བདེ་རྩའི་ལས་ཁུངས་བརྒྱུད་ UHNCR རོགས་ཚོགས་ནས་ཏོག་དབྱིབས་ངལ་སེལ་ཟ་འབྲུ་བགོ་འགྲེམས་སླད་རོགས་དངུལ་བལ་སྒོར་ ༦༣༠,༠༠༠ གནང་སོན་བྱུང་བ་བཞིན་མཆོད་འཇོར་ཁྱབ་ཁོངས་མི་མང་རྣམས་ལ་ཟ་འབྲུ་བགོ་འགྲེམས་ཞུས་ཡོད།
༤༽བལ་ཡུལ་གངས་ཅན་བདེ་རྩའི་ལས་ཁུངས་བརྒྱུད་རྒྱུན་ལྡན་པི་ཨར་ཨེམ་རྒན་ཕོགས་བཞེས་མཁན་མི་གྲངས་ ༦༠ ཐམ་པར་ཟླ་རེར་རྒན་ཕོགས་བལ་སྒོར་ ༡,༠༠༠ ཡོད་པའི་ཁར་ཏོག་དབྱིབས་ངལ་སེལ་རོགས་དངུལ་མི་རེར་ ༡༤,༤༠༠ གནང་ཡོད་པ་ལྟར་དོ་བདག་སོ་སོར་བགོ་འགྲེམས་ཞུས་ཟིན། དེ་བཞིན་དབང་པོ་སྐྱོན་ཅན་མི་གྲངས་ ༡༨ དང་གཉན་ནད་རེག་དུག་འཚོ་སྣོན་བཞེས་མཁན་མི་གྲངས་ ༡ ལ་རྒྱུན་ལྡན་འཚོ་སྣོན་ཟླ་རེར་སྒོར་ ༢,༠༠༠ ཐམ་པ་ཡོད་པའི་ཁར་སྐབས་འདིར་མི་རེར་བལ་སྒོར་ ༩,༦༠༠ ཐམ་པའི་མ་གནས་ཀྱི་ཏོག་དབྱིབས་ངལ་སེལ་ཟ་འབྲུ་ཐོབ་ཡོད་པ་ལྟར་དོ་བདག་སོ་སོའི་སྒོ་འཁྲིས་སུ་བསྐྱེལ་ནས་བགོ་འགྲེམས་ཞུས་ཡོད།
༥༽ དབུས་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༢༠ ཟླ་ ༧ ཚེས་ ༡༠ ཉིན་བཀའ་རྒྱ་ཕེབས་པ་བཞིན། རང་ལོ་ ༦༥ ཡན་སོན་བོད་མི་དང་། ས་གནས་འགོ་འཛིན་གཙོས་གཉན་རིམས་ ༡༩ དང་འབྲེལ་བའི་དྭང་བླངས་ཞབས་ཞུ་གནང་མཁན། གཅིན་སྙི་དང་ཁྲག་གཤེད་ནད་པ་བཅས་ལ་ལུས་སེམས་གསོ་བྱེད་གསོལ་སྨན་བགོ་འགྲེམས་གནང་བར་འདི་གའི་ས་གནས་ཁྱབ་ཁོངས་རང་ལོ་ ༦༥ ཡན་སོན་མི་གྲངས་ ༤༣༢ དང་། གཅིན་སྙི་དང་ཁྲག་གཤེད་ནད་པ་མི་གྲངས་ ༦༤ ལས་བྱེད་དང་དང་བླངས་ཞབས་ཞུ་བ་གྲངས་ ༡༥ བཅས་ལ་ལུས་སེམས་གསོ་བྱེད་གསོལ་སྨན་བགོ་འགྲེམས་ཞུས་ཐུབ་པ་བྱུང་ཡོད།
༦༽ མཆོད་རྟེན་གནས་སྡོད་རྡ་ས་ཀྲི་སི་བི་བོད་ཁྱིམ་སློབ་གྲྭའི་ནང་སློབ་གཉེར་གནང་བཞིན་པ་སློབ་ཕྲུག་གྲངས་བརྒྱད་རྒྱ་གར་ནས་བལ་ཡུལ་དུ་ ༢༠༢༠།༠༧།༢༠ ཉིན་འབྱོར་སྐབས་ས་གནས་ཚོགས་ཁང་ནང་ཉིན་གྲངས་ ༡༥ རིང་ཟུར་སྡོད་བྱས་ནས་ཉིན་མཐའ་མར་ PCR བརྟག་དཔྱད་བྱས་འབྲས་སུ་ནད་རྟགས་མེད་པ་ཐོན་ཡོད། དེ་རྗེས་སླར་ཡང་རྒྱ་གར་ནས་མཆོད་རྟེན་གནས་སྡོད་སློབ་ཕྲུག་གྲངས་ ༢༡ བལ་ཡུལ་དུ་ ༢༠༢༠།༨།༠༧ ཉིན་འབྱོར་སྐབས་སློབ་ཕྲུག་དེ་དག་མགྲོན་ཁང་ནང་དུ་ཟུར་བཀག་ཞུས་ཡོད། དེ་བཞིན་སློབ་ཕྲུག་དེ་དག་ཀྱང་ཟུར་སྡོད་ཉིན་མཐར་ PCR བརྟག་དཔྱད་བྱས་འབྲས་སུ་ནད་རྟགས་མེད་པ་ཐོན་ཡོད།
༧༽ དབུས་ཤེས་རིག་ལས་ཁུངས་ནས་མཐོ་སློབ་ཏུ་བསྐྱོད་བཞིན་པ་སྟེ་ཤེས་རིག་ཉམ་ཐག་སློབ་ཕྲུག་གྲངས་ ༥ ལ་ཏོག་དབྱིབས་ངལ་སེལ་རོགས་དངུལ་སློབ་ཕྲུག་རེེར་བལ་སྒོར་ ༨,༠༠༠ ཐམ་པ་གངས་ཅན་བདེ་རྩའི་བརྒྱུད་གནང་སོན་བྱུང་བར་དོ་བདག་སོ་སོར་བགོ་འགྲེམས་ཞུས་ཟིན་པ་བཅས། །
