ཕྱི་ལོ་ ༢༠༢༠ ཟླ་ ༩ ཚེས་ ༡༠ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༩ ཚེས་ ༡༠ ཉིན་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་མདུན་དུ་དྲུང་ལས་རིན་ཆེན་བཟང་མོ་ལགས་ཀྱིས་ལྷོ་ཕྱོགས་ས་གནས་ཁྲིམས་ཞིབ་པའི་ལས་ཁུར་དམ་བཅའ་འབུལ་བཞེས་ཀྱི་མཛད་སྒོ་ཞིག་ཚོགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་མཛད་སྒོའི་ཐོག་མར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་། ཁྲིམས་ཞིབ་པ་གཞན་ཀརྨ་དགྲ་འདུལ་མཆོག་དང་བསྟན་འཛིན་ལུང་རྟོགས་མཆོག དྲུང་ཆེ་བཀྲ་ཤིས་རྒྱ་མཚོ་ལགས། གཞན་ཡང་འབྲེལ་ཡོད་ལས་བྱེད་བཅས་ཚང་འཛོམས་ཀྱི་ཐོག་མར་ཁྲིམས་ཞིབ་པ་ཆེ་བ་མཆོག་དྭགས་པོ་བསོད་ནམས་ནོར་བུ་མཆོག་གིས་༸རྒྱལ་བའི་བཞུགས་ཁྲི་རིན་པོ་ཆེར་མཎྜལ་རྟེན་དོད་འབུལ་ལམ་ཞུས་གྲུབ་བསྟུན། དྲུང་ལས་རིན་ཆེན་བཟང་མོ་ལགས་ཀྱིས་ཀྱང་མཎྜལ་རྟེན་དོད་འབུལ་ལམ་ཞུས་ཏེ་ཁྲིམས་ཞིབ་པ་ཆེ་བ་མཆོག་གི་དྲུང་དུ་ལས་ཁུར་དམ་བཅའ་འབུལ་བཞེས་གྲུབ་མཚམས་ཁྲིམས་ཞིབ་པ་ཆེ་བ་མཆོག་གིས་རྟེན་འབྱུང་མཇལ་དར་དང་རྟེན་འབྲེལ་མཚོན་བྱེད་སྒྲོན་འབུལ་གནང་།

དེ་ནས་སྐུ་མགྲོན་རྣམ་པར་གྲོ་སོ་ཕྱེ་མར་དང་ཆང་ཕུད་འདེགས་འབུལ་དང་། རྟེན་འབྱུང་གསོལ་ཇ་དང་འབྲས་སིལ་ཕུལ་ཏེ་ཁྲིམས་ཞིབ་པ་རྣམ་གཉིས་ཀྱིས་གཙོས་འབྲེལ་ཡོད་ལས་བྱེད་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་རིན་པོ་ཆེར་མཎྜལ་རྟེན་དོད་དང་མཇལ་དར་སྒྲོན་འབུལ་དང་འབྲེལ་འཕྲལ་སེལ་ས་གནས་ཁྲིམས་ཞིབ་པ་དྲུང་ལས་རིན་ཆེན་བཟང་མོ་ལགས་ལ་འཚམས་འདྲིའི་མཇལ་དར་སྒྲོན་ཏེ་དམ་འབུལ་གྱི་མཛད་སྒོ་གྲོལ། 

སྤྱིར་ལྷོ་ཕྱོགས་ས་གནས་ཁྲིབས་ཞིབ་ཁང་དུ་ཞུ་གཏུག་བྱུང་བའི་ཁ་མཆུར་ཁྲིམས་ཞིབ་ཐག་གཅོད་བྱེད་མཁན་ས་གནས་ཁྲིམས་ཞིབ་པ་ཞིག་དགོས་པར། བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༩ གཞིར་བཟུང་དྲུང་ལས་རིན་ཆེན་བཟང་མོ་ལགས་འཕྲལ་སེལ་ས་གནས་ཞིབ་པར་བསྐོ་གཞག་གནང་བ་ཞིག་ཡིན་འདུག་པ་བཅས། །