ཕྱི་ལོ་ ༢༠༢༠ ཟླ་ ༩ ཚེས་ ༧ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཐེ་སྡོད་བོད་རིགས་ཚོགས་པའི་གོ་སྒྲིག་འོག་འདི་ཚེས་ ༦ རེས་གཟའ་ཉི་མའི་ཉིན་ཐེ་པེ་གྲོང་ཁྱེར་ཕྱི་མི་གསར་འབྱོར་འདུ་འཛོམས་ཁང་ཆེན་ནང་བོད་ཀྱི་མང་གཙོ་དབུ་བརྙེས་ནས་ལོ་དྲུག་ཅུ་འཁོར་བའི་དུས་ཆེན་སྲུང་བརྩི་གཟབ་རྒྱས་ཞུས་གནང་ཡོད།
སྔ་དྲོ་ཆུ་ཚོད་ ༡༠།༣༠ ཐོག་མཛད་སྒོ་དབུ་འཛུགས་བསྐྱངས། ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་། མང་གཙོ་གསར་བཞད་དབྱངས་སུ་ལེན། དེ་རྗེས་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་གུས་འདུད་མྱ་ངན་དང་། བོད་རིགས་ཚོགས་པས་ཆེད་དུ་གསར་བཟོ་གནང་བའི་བོད་ཀྱི་མང་གཙོའི་འཕེལ་རིམ་བརྙན་ཐུང་གཟིགས་འབུལ་ཞུས།
སྐུ་མགྲོན་གྱི་གསུང་བཤད་ཁོངས་ཐོག་མར་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་འདི་ལོ་༸གོང་ས་མཆོག་གི་བཀའ་དྲིན་རྗེས་དྲན་གྱི་ལོ་ཡིན་པས་མིང་དོན་མཚུངས་པ་ཞིག་ཡིན་པ་དང་། བོད་རིགས་ཚོགས་པས་བརྙན་ཐུང་བཟོས་པའི་ནང་དོན་ལྟར་བཙན་བྱོལ་བོད་མིའི་མང་གཙོའི་བརྒྱུད་རིམ་སྙིང་བསྡུས་ངོ་སྤྲོད་དང་། བོད་རིགས་ཚོགས་པའི་ལས་དོན་ལ་བསྔགས་བརྗོད་གནང་།
ཆོས་རིག་བཀའ་ཟུར་སྐྱབས་རྗེ་ཀིརྟི་རིན་པོ་ཆེ་མཆོག་ནས་ཐེ་སྡོད་བོད་མི་རྣམས་ལ་བཀའ་སློབ་ལམ་སྟོན་ཕེབས་དོན། འདི་ལོ་བཀའ་དྲིན་རྗེས་དྲན་གྱི་ལོ་ཡིན་ལ་གནད་འགག་ཅན་གྱི་ལོ་ཞིག་ཀྱང་ཡིན་པ་དང་། ༸གོང་ས་མཆོག་ནས་མང་གཙོ་གསོལ་རས་གནང་བ་དེ་མི་རེ་ངོ་རེས་འགན་ཁུར་གྱི་ལག་ལེན་ཐོག་འཁེལ་ཐུབ་པ་ཞིག་དགོས་པ་དང་། འདས་པའི་འོས་བསྡུའི་ཞན་ཆ་ལས་བསླབ་བྱ་བླངས་ཏེ་མ་འོངས་པའི་འོས་བསྡུ་ཆེན་མོའི་སྐབས་མི་ཚང་མས་དགོངས་པ་ཡག་པོ་བཞེས་ཏེ་འོས་བསྡུའི་ཆ་ཤས་ཡག་པོ་ལེན་དགོས་པའི་ལམ་སྟོན་དང་། ཐེ་སྡོད་བོད་རིགས་ཚོགས་པ་སྔར་བཞིན་བོད་གཞུང་གི་ལམ་སྟོན་འོག་ཤར་བསྐྱོད་ཐུབ་པ་དགོས་པ་སོགས་ཀྱི་བཀའ་སློབ་སྩལ།
ཐེ་ཝན་གྲོས་ཚོགས་འཐུས་མི་སྐུ་ཞབས་ Freddy Lim ལགས་ཀྱིས་ཐེ་ཝན་གྲོས་ཚོགས་ནང་སྲིད་དོན་ཚོགས་པ་འདྲ་མིན་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཙུགས་སྐོར་ངོ་སྤྲོད་དང་། འདི་ལོ་གྲོས་ཚོགས་འཐུས་མི་ཚོགས་པ་ཞིག་བཞུགས་སྒར་དུ་འཚམས་གཟིགས་ལ་བཅར་རྒྱུའི་འཆར་གཞི་ཡོད། འོན་ཀྱང་ནད་ཡམས་ཀྱིས་རྐྱེན་པས་ཕེབས་ཐུབ་མེད་ཀྱང་ལོ་རྗེས་མར་ཕེབས་ཐུབ་རྒྱུའི་རེ་བ་དང་། དེ་བཞིན་༸གོང་ས་མཆོག་ཐེ་ཝན་ནང་ཕེབས་ཐུབ་རྒྱུར་རེ་བ་ཞུ་བཞིན་ཡོད་སྐོར་གསུངས།
གྲོས་ཚོགས་འཐུས་མི་སྐུ་ཞབས་ཧུང་ཧྲེང་ཧན་ལགས་ཀྱིས་བཙན་བྱོལ་བོད་མིས་མང་གཙོའི་ལམ་ཐོག་ཤར་བསྐྱོད་ཐུབ་ཡོད་པ་དང་། ཐེ་ཝན་ཡང་ད་ཆ་མང་གཙོའི་ལམ་ཐོག་འགྲོ་བཞིན་ཡོད། ཕྱོགས་གཉིས་ཀྱི་མང་གཙོའི་ནུས་སྟོབས་ལ་བརྟེན་ནས་མཐུན་སྒྲིལ་གྱིས་གཉའ་གནོན་ལ་མགོ་བོ་མི་སྒུར་བར་དམར་པོའི་གཅིག་བསྡུས་རིང་ལུགས་ལ་མཉམ་དུ་གདོང་ལེན་བྱ་དགོས་པ་སོགས་བརྗོད།
དེ་བཞིན་སྐུ་མགྲོན་གཙོ་བོའི་ཁོངས་ཐེ་ཝན་ཧཱ་ཀཱ་མི་རིགས་ལས་དོན་ལྷན་ཁང་གི་བློན་ཆེན་སྐུ་ཞབས་ཡཱང་གྲན་ཀྲན་ལགས་དང་། གྲོས་ཚོགས་འཐུས་མི་ཟུར་པ་ལྕམ་ཡུའུ་མེའེ་ཉུའུ་ལགས། ཐེ་པེ་གྲོང་ཁྱེར་གྲོས་ཚོགས་འཐུས་མི་སྲས་མོ་མེའོ་བྷོ་ཡཱ་བཅས་ཀྱིས་ཀྱང་བཙན་བྱོལ་བོད་མིའི་མང་གཙོའི་ལམ་ལུགས་ལ་བསྔགས་བརྗོད་དང་། མང་གཙོའི་བརྒྱུད་རིམ་ནང་བསམ་ཚུལ་དང་ལྟ་བ་མི་འདྲ་བ་ཡོང་དགོས་ངེས་ཡིན་ཡང་། རྒྱ་ནག་གི་མ་རུངས་ཁོག་བཅངས་ཀྱིས་དབྱེན་སྦྱོར་དཀྲུག་ཤིང་ལ་གཟབ་གཟབ་བྱ་དགོས་པ་སོགས་གསུངས།
གཞན་ཡང་ཐེ་ཝན་རིག་མཛོད་དགེ་ཆེ་དང་། ཐེ་ཝན་བོད་རྒྱ་མཐུན་ཚོགས། ཐེ་ཝན་བོད་ཀྱི་གྲོགས་པོའི་མཐུན་ཚོགས་སོགས་ཀྱི་འགན་ཁུར་མི་སྣས་ཀྱང་གསུང་བཤད་གནང་རྗེས། ཐེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་ཐུགས་རྗེ་ཆེ་ཞུས་ནས་ཚོགས་ཞུགས་ཡོངས་ལ་ཉིན་གུང་གསོལ་ཚིགས་འདེགས་འབུལ་ཞུས།
ཐེངས་འདིར་ཐེ་སྡོད་བོད་མི་སེར་སྐྱ་དང་། བོད་དོན་རྒྱབ་སྐྱོར་གནང་མཁན་སོགས་མི་གྲངས་བདུན་ཅུ་ལྷག་མཉམ་འཛོམས་གནང་ཡོད་པ་བཅས། །
