ཕྱི་ལོ་ ༢༠༢༠ ཟླ་ ༩ ཚེས་ ༢༧ རེས་གཟའ་ཉི་མ།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༤༥ འཚོགས་བཞིན་པ་དང་བསྟུན། ཕྱི་ལོ་ ༢༠༢༠ ཟླ་ ༩ ཚེས་ ༢༥ ཉིན་སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་ Society for Threatened Peoples ཞེས་པའི་གཞུང་འབྲེལ་མ་ཡིན་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པའི་ཚབ་ཞུས་ཏེ། རྒྱ་ནག་གཞུང་གིས་ངལ་རྩོལ་བསྒྱུར་བཀོད་ཁང་ཞེས་པ་གསར་འཛུགས་བྱས་ཏེ་ཕྱི་ལོ་ ༢༠༢༠ ལོའི་ལོ་འགོ་ནས་བཟུང་ཕྱི་ཟླ་ ༧ བར་ཁྱོན་བོད་མི་འབུམ་ལྔ་ལྷག་བཙན་དབང་གིས་ངལ་རྩོལ་བསྒྱུར་བཀོད་ཁང་དུ་བཅུག་ནས་ངལ་རྩོལ་བྱེད་དུ་འཇུག་གི་ཡོད་པ་མ་ཟད། བོད་མི་རྣམས་ལ་བཙན་གྱིས་ལྟ་བ་བསྒྱུར་ཐབས་བྱས་པ་དང་། སོ་ལྟའི་པར་ཆས་བཙུགས་པ། ཉེས་ཆད་ལྕི་མོ་བཅད་པ། དམག་མི་ལྟར་སྦྱོང་བརྡར་སྤྲད་པ་སོགས་ཀྱི་སྐོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུའི་སྟེང་གླེང་སློང་ཤུགས་ཆེ་གནང་ཡོད།
དེ་བཞིན་འཕྲིན་ལས་ཆོས་སྐྱིད་ལགས་ཀྱིས། རྒྱ་ནག་གཞུང་གིས་དབུལ་ཕོངས་ངལ་སེལ་དང་ཡར་རྒྱས་ལས་གཞི་ལ་ཁ་གཡར་ནས་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་འཚོ་བ་སྐྱེལ་སྟངས་ལ་རྩིས་མེད་རྡོག་རོལ་བཏང་སྟེ་བོད་པའི་འབྲོག་པ་རྣམས་ཀྱི་རྩྭ་ས་དང་། ཞིང་པ་རྣམས་ཀྱི་ཞིང་ས་རྣམས་ཁྲིམས་འགལ་གྱིས་བཙན་འཕྲོག་བྱས་ཡོད་པ་མ་ཟད། ད་ལྟ་རྒྱ་ནག་གཞུང་གིས་བོད་མི་འབུལ་ལྔ་ལྷག་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པའི་སྐོར་འགྲེལ་བརྗོད་ཁ་གསལ་གནང་ཡོད།
ཕྱོགས་མཚུངས་རྒྱ་ནག་གཞུང་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་པ་ནས་བཟུང་ད་བར་ལོ་ངོ་ ༢༥ རིང་གར་སོང་ཆ་མེད་དུ་གྱུར་ཡོད་པའི་སྐོར་དང་། བོད་ཀྱི་སྐད་ཡིག་སྲུང་སྐྱོབ་ལས་འགུལ་བ་བཀྲ་ཤིས་དབང་ཕྱུག་ལགས་དང་། བསོད་ནམས་དཔལ་ལྡན་ལགས། ཁོར་ཡུག་སྲུང་སྐྱོབ་ལས་འགུལ་བ་ཨ་ཉག་སེང་སྒྲ་ལགས་བཅས་ཀྱི་གནད་དོན་སྐོར་ཡང་གླེང་སློང་ཤུགས་ཆེ་གནང་ཡོད།།
