ཕྱི་ལོ་ ༢༠༢༠ ཟླ་ ༨ ཚེས་ ༣༡ རེས་གཟའ་ཟླ་བ། 

༄༅། །ཨོ་སི་ཀྲོ་ལི་ཡ་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༢༠ ཟླ་ ༩ ཚེས་ ༥ རེས་གཟའ་སྤེན་པའི་ཉིན་བོད་མིའི་བླ་ན་མེད་པའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་པའི་སྐོར་དྲ་རྒྱའི་ལམ་ནས་བགྲོ་གླེང་ཞིག་བསྐོང་ཚོགས་གནང་གཏན་འཁེལ་འདུག་པ་དང་། ལས་རིམ་དེ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ལས་འཆར་གྱི་ཆ་ཤས་ཤིག་ཡིན།

བགྲོ་གླེང་ཐོག་སྐུ་ཞབས་ཨན་ཀོ་གྷན་ Ian Coghian ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་དང་ཚན་རིག་གཉིས་ཀྱི་བགྲོ་གླེང་བརྒྱུད་མ་འོངས་འགྲོ་བ་མིར་ཕན་ཐོགས་ཇི་ལྟར་ཞུ་ཐུབ་པའི་སྐོར་དང་། Dr Anna Alomes ལགས་ནས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སྐོར། Mr Gabriel Lafitte ལགས་ཀྱིས་མགོན་པོ་གང་ཉིད་མཆོག་གི་ཐུགས་བསྐྱེད་དམ་བཅའ་བཞིའི་ནང་ནས་ཁོར་ཡུག་གི་གལ་གནད་སྐོར། Mr Tony Stee ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་བསྒྱུར་གྱིས་རྒྱལ་སྤྱིས་གཙོས་ཨོ་གླིང་ནང་ཤུགས་རྐྱེན་ཇི་ལྟར་ཐེབས་ཚུལ་བཅས་ཀྱི་སྐོར་ལ་བགྲོ་གླེང་གནང་རྒྱུ་ཡིན་ཞིང་།

དྲ་ཐོག་གི་བགྲོ་གླེང་དེ་བཞིན་གོང་ཚེས་ཉིན་རྒྱ་གར་ནང་གི་སྔ་དྲོའི་ཆུ་ཚོད་ ༩ དང་ཨོ་གླིང་ནང་གི་ཕྱེད་ཡོལ་ཆུ་ཚོད་ ༡།༣༠ ཐོག་ཕྱི་དྲིལ་བོད་ཀྱི་བརྙན་འཕྲིན་གྱི་ངོ་དེབ་བརྒྱུད་ཐད་སྲིང་གནང་རྒྱུ་ཡིན་པ་བཅས། །