ཕྱི་ལོ་ ༢༠༢༠ ཟླ་ ༨ ཚེས་ ༢༩ རེས་གཟའ་སྤེན་པ།

༄༅། །ཉི་ཧོང་གི་སྲིད་བློན་ཤིན་ཛོ་ཨ་བྷེ་ Shinzo Abe མཆོག་ནད་མནར་གྱི་དབང་གིས་སྲིད་བློན་གྱི་ལས་གནས་ནས་རྩ་དགོངས་ཞུས་པར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་བློན་ཤིན་ཛོ་ཨ་བྷེ་མཆོག་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། ངོས་ཀྱིས་སྐུ་ཉིད་ཀྱི་སྨན་བཅོས་ལེགས་གྲུབ་ཡོང་བའི་ཐུགས་སྨོན་དང་། སྐུ་ཉིད་ནས་རྒྱལ་ཁབ་ཀྱི་ཁེ་ཕན་ལ་ཐུགས་ཁུར་ཆེ་བཞེས་དང་སྨན་བཅོས་སླད་སྲིད་བློན་གྱི་ལས་གནས་ནས་རྩ་དགོངས་ཞུས་པ་ནི་རྗེས་སུ་ཡི་རངས་བྱེད་འོས་པ་ཞིག་རེད། ངོས་ཀྱིས་སྐུ་ཉིད་ཀྱིས་དབུ་ཁྲིད་གནང་བའི་རིང་མི་མང་གི་ཆེད་དུ་བློས་བཏང་གིས་ཕྱག་ལས་གནང་བར་གུས་ཞབས་ཆེན་པོ་ཞུ་བཞིན་ཡོད།

ཤིན་ཛོ་ཨ་བྷེ་མཆོག་ནི་ཉིན་ཧོང་གི་སྲིད་བློན་དུས་ཡུན་རིང་ཤོས་གནང་མཁན་ཞིག་ཡིན། ཁོང་གིས་ཉི་ཧོང་གི་རྒྱལ་ཁབ་དེ་ཉིད་འཛམ་གླིང་ནང་ཆེ་མཐོང་ལྡན་པ་ཞིག་བསྐྲུན་གནང་ཡོད། ཅེས་འཁོད་འདུག །

                                                                                 གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས། ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།