ཕྱི་ལོ་ ༢༠༢༠ ཟླ་ ༨ ཚེས་ ༡༧ རེས་གཟའ་ཟླ་བ།

༄༅། །འཛམ་གླིང་ཞི་བདེ་དེད་དཔོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༠ ཟླ་ ༨ ཚེས་ ༢༥ རེས་གཟའ་མིག་དམར་ཉིན་རྒྱ་གར་ནང་གི་སྔ་དྲོ་ཆུ་ཚོད་ ༩ ནས་ ༡༠ བར་དེང་རབས་ཀྱི་ཤེས་ཡོན་ལམ་ལུགས་ནང་ཆོས་ལུགས་དང་མ་འབྲེལ་བའི་བཟང་སྤྱོད་མཁོ་ཚུལ་ The Need for Secular Ethics in the Modern Education System གྱི་བགྲོ་གླེང་དང་། དེ་འབྲེལ་དྲི་བར་བཀའ་ལན་བསྩལ་རྒྱུ་ཡིན་ཞིང་། བགྲོ་གླེང་འདི་བཞིན་སེམས་བསྲེ་བ་ Mind Mingle ཞེས་པའི་ལས་འཆར་ཚོགས་པས་གོ་སྒྲིག་ཞུས་པ་ཞིག་ཡིན་འདུག

ལས་འཆར་དེ་ནི་ཕྲུ་གུའི་ལུས་དང་སེམས་ཁམས་ཕྱོགས་ཡོངས་ནས་གསོ་སྐྱོང་བྱ་ཐབས་ལ་དམིགས་ཏེ་ཉམས་མྱོང་དངོས་དང་འབྲེལ་བའི་ཤེས་ཡོན་སྤེལ་བའི་ཐབས་ལམ་འཚོལ་བ་དང་། དགོས་དོན་ལྡན་པའི་ཤེས་ཡོན་སྤྲོད་པ། དེ་བཞིན་ཕྲུ་གུ་སོ་སོའི་མོས་བློ་དང་ནུས་པ་མི་འདྲ་བ་རྣམས་ཤེས་པའི་ཐོག་ནས་ཤེས་ཡོན་སྤྲོད་ཐབས་བཅས་ཀྱི་བསམ་བློའི་འཆར་སྒོ་ལྡན་པའི་ཚོགས་པའི་ལས་འཆར་ཞིག་ཡིན།

ཐེངས་འདིའི་ཐད་སྲིང་བགྲོ་གླེང་གསན་གཟིགས་གནང་མཁན་ཚོས་འདོད་ཡོད་ཚེ་ས་གནས་སོ་སོར་བཅས་པའི་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་ལས་མི་འདའ་བར་བོད་དབྱིན་རྒྱ་སྐད་སོགས་སྐད་རིགས་མི་འདྲ་བ་དུ་མའི་ནང་དགའ་ལྡན་ཕོ་བྲང་གི་དྲ་རྒྱ་དང་ངོ་དེབ་སོགས་བརྒྱུད་གསན་གཟིགས་གནང་དགོས་པ་དགོངས་འཇགས་འཚལ། །