ཕྱི་ལོ་ ༢༠༢༠ ཟླ་ ༨ ཚེས་ ༡༢ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ནང་རྟེན་གཞི་བྱས་པའི་ཞི་བདེ་གོང་འཕེལ་སློབ་གཉེར་བསྟི་གནས་ཁང་གིས་ཇི་ལྟར་སྔོན་ནས་གསོལ་འདེབས་ཞུས་པ་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༢༠ ཟླ་ ༨ ཚེས་ ༡༢ ཉིན་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་ཞི་བདེ་གོང་འཕེལ་སློབ་གཉེར་བསྟི་གནས་ཁང་ United States Institute of Peace གི་འགན་འཛིན་ལྕམ་སྐུ་ནེན་སེ་ལིན་བྷོག་ Nancy Linborg ལགས་དང་། ཞི་བདེ་གོང་འཕེལ་སློབ་གཉེར་བསྟི་གནས་ཁང་གི་མི་རབས་འཕོ་འགྱུར་གྱི་གཞོན་སྐྱེས་ཉམས་ཞིབ་པ་རྣམས་ལ་རྩོད་རྙོག་དང་། ཏོག་དབྱིབས་གཉན་རིམས། བྱམས་བརྩེ་བཅས་ཀྱི་སྐོར་དྲ་རྒྱ་བརྒྱུད་བཀའ་སློབ་སྩལ་དོན། ལོ་མང་རིང་ནེན་སེ་ལིན་བྷོག་ལགས་དང་གཞོན་སྐྱེས་ཚོ་རྡ་སར་སླེབས་པ་རེད། ངོས་ཀྱིས་དུས་རྟག་ཏུ་དེ་དྲན་གྱི་ཡོད།
ངོས་ཀྱིས་ཁྱེད་རང་ཚོས་འདི་འདྲའི་ལས་གཞིའི་སླད་དུ་དང་དོད་དང་འབད་བརྩོན་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱིས་འཛམ་གླིང་འདི་བཞིན་དུས་རབས་གོང་མ་དང་། ད་ལྟའི་དུས་རབས་འགོ་སྟོད་སྨད་དབར་བསྡུར་ན་ཁྱད་པར་ཆེན་པོ་ཡོད་པ་རེད་བསམ་གྱི་འདུག དུས་རབས་འདིའི་འགོ་སྟོད་ལ་ང་ཚོས་དམག་ཤུགས་ཀྱི་སྟོབས་ལ་ཧ་ཅང་དང་དོད་བྱས་ཡོད་པ་མ་ཟད། དམག་དོན་སླད་དཔལ་འབྱོར་གྱི་འགྲོ་གྲོན་ཡང་ཆེན་པོ་བཏང་ཡོད། ཚན་རིག་པ་གྲགས་ཅན་དེ་ཚོས་སོ་སོའི་ཕུལ་དུ་བྱུང་བའི་རྣམ་དཔྱོད་གོ་མཚོན་བཟོ་སྐྲུན་ཆེད་དུ་བེད་སྤྱོད་བཏང་ཡོད། ད་ལྟ་དེ་ལྟ་བུའི་བསམ་བློ་གཏོང་སྟངས་ཉུང་དུ་འགྲོ་བཞིན་ཡོད། རྒྱུ་མཚན་ནི་དུས་རབས་གོང་མའི་ནང་འཛམ་གླིང་དམག་ཆེན་དང་པོ་དང་གཉིས་པའི་སྐབས་རྡུལ་ཕྲན་མཚོན་ཆ་བེད་སྤྱོད་བཏང་བའི་ཉམས་མྱོང་ལས་བྱུང་བ་རེད།
དམག་ཆེན་གཉིས་པའི་རྗེས་མི་མང་པོས་ལོ་མང་རིང་དམག་ཆེན་གསུམ་པའི་སྐོར་བསམ་བློ་གཏོང་ཕྱོགས་ཡོལ་ཚར་བ་རེད། ད་བར་ངོས་ཀྱིས་དུས་རྟག་ཏུ་མི་རྣམས་ལ་ཡུ་རོབ་སྤྱི་མཐུན་ཚོགས་པར་མིག་དཔེ་ལྟ་དགོས་པའི་སྐོར་རྗོད་ཀྱི་ཡོད། དུས་རབས་གོང་མའི་སྐབས་ཡུ་རོབ་ནང་ཁུལ་དང་། ལྷག་པར་ཕ་རན་སི་དང་འཇར་མན་ནི་དབར་དགྲ་ཟླ་ལྟ་བུ་གྱུར་ཡོད་པ་མ་ཟད། མི་གསོད་ཁྲག་སྦྱོར་བྱས་ཡོད། དེ་ནས་འཇར་མན་སྲིད་བློན་སྐུ་ཞབས་ཨ་ཌི་ནར་ Adenauer མཆོག་དང་ཕ་རན་སིའི་སྲིད་འཛིན་སྐུ་ཞབས་ཅར་ལེ་སི་ཌི་གོལ་ Charles de Gaulle མཆོག་གིས་ཡུ་རོབ་སྤྱི་མཐུན་ཚོགས་པ་གསར་འཛུགས་གནང་རྗེས། ཡུ་རོབ་ནང་ཁུལ་དབར་དམག་འཁྲུག་བྱུང་མྱོང་མེད།
རིམ་པས་མི་ཚོས་རྡུལ་ཕྲན་མཚོན་ཆ་ཟེར་བ་དེ་ཧ་ཅང་ཉེན་ཁ་ཆེན་པོ་ཡིན་པ་ངོས་འཛིན་བྱས་ཐུབ་ཡོད། ཕྱིས་སུ་གོམ་པ་རིམ་སྤོས་ཀྱིས་མི་མང་གིས་གོ་མཚོན་མེད་པའི་འཛམ་གླིང་ཞིག་བསྐྲུན་རྒྱུའི་འབད་བརྩོན་བྱས་དང་བྱེད་བཞིན་ཡོད། དུས་རབས་སྔོན་མའི་ནང་མི་ཚོས་འཕྲུལ་ཆས་རིགས་ལ་དང་དོད་བྱས་ཏེ་རྡུལ་ཕྲན་མཚོན་ཆ་སོགས་བཟོ་སྐྲུན་བྱས་ཡོད། དུས་རབས་སྔོན་མའི་ནང་ང་ཚོས་ཕྱིའི་དངོས་པོ་དང་འཕྲུལ་ཆས་རིགས་བཟོ་སྐྲུན་བྱ་རྒྱུ་གལ་ཆེན་དུ་བརྩིས་ཡོད། རིམ་པས་ང་ཚོ་འགྲོ་བ་མིའི་བདེ་སྡུག་ལ་བསམ་བློ་གཏོང་མཁན་ཞིག་ཆགས་ཡོད།
ཚན་རིག་པས་འགྲོ་བ་མིའི་ལྷན་སྐྱེས་རང་བཞིན་ནི་བྱམས་བརྩེའི་རང་བཞིན་རེད། ཅེས་རྗོད་ཀྱི་འདུག ང་ཚོ་སྤྱི་ཚོགས་ལ་བརྟེན་པའི་སྲོག་ཆགས་རེད། དེར་བརྟེན་ང་ཚོ་གཅིག་ལ་གཅིག་བརྟེན་ནས་འཚོ་དགོས་པ་ལས། གཅིག་ལ་གཅིག་མ་བརྟེན་པར་འཚོ་མི་ཐུབ། ང་ཚོ་སྐྱེས་མ་ཐག་ཨ་མའི་བྱམས་སྐྱོང་འོག་འཚར་ལོངས་བྱེད་དགོས། ཨ་མས་ཀྱང་རང་གི་ཕྲུ་གུ་ལ་འོ་མ་འཐུང་བཅུག་སྟེ་བྱམས་སྐྱོང་བྱེད་ཀྱི་ཡོད་པ་ནི་རང་བཞིན་རེད། འཇིག་རྟེན་འདིའི་སྒང་ལ་གཞན་ཕན་གྱི་བློ་ལ་བརྟེན་ནས་འབུ་སྲིན་དང་། བྱ་བྱིའུ། སྲོག་ཆགས་བཅས་འཚོ་ཐུབ་ཀྱི་ཡོད་པ་དང་། དེ་ནི་རང་བཞིན་ཡིན་པ་ལས་ཆོས་ལུགས་དང་འབྲེལ་བ་མེད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་ཡོད་པ་བཅས།།
