ཕྱི་ལོ་ ༢༠༢༠ ཟླ་ ༨ ཚེས་ ༤ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༨ ཚེས་ ༣ རེས་གཟའ་ཟླ་བའི་ཉིན་བྱང་ཨར་ལན་ཌིའི་ཆབ་སྲིད་པ་དང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཇོན་ཧུམ་John Hume མཆོག་དགུང་ལོ་ ༨༣ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུན་ཐོན་པར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༠ ཟླ་ ༨ ཚེས་ ༤ ཉིན་དམ་པ་དེ་ཉིད་ཀྱི་སྐུ་ཟླ་ Patricia Hume མཆོག་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། ངོས་རང་དེ་སྔ་བྱང་ཨར་ལན་ཌའི་ནང་ཐེངས་འགའ་ཤས་སྐྱོད་སྐབས་སྐུ་ཉིད་ཀྱི་བཟའ་ཟླ་དམ་པ་དེ་ཉིད་མཆོག་དང་ཐུག་འཕྲད་བྱུང་བར་ཧ་ཅང་དགའ་ཚོར་བྱུང་། དམ་པ་ཁོང་གིས་དཀའ་རྙོག་རྣམས་གྲོས་མོལ་གྱི་ལམ་ནས་སེལ་ཐུབ་པར་ཆོད་སེམས་དང་ཡིད་ཆེས་བརྟན་པོ་གནང་བར་བརྟེན། ཕྱི་ལོ་ ༡༩༩༨ ཟླ་ ༤ ཚེས་ ༡༠ རེས་གཟའ་པ་སངས་ཉིན་དམ་པ་དེ་ཉིད་ནས་སྣེ་ཁྲིད་དེ་ཞི་བའི་ཆིངས་ཡིག་བཞག་ཐུབ་པ་བྱུང་ཡོད། དམ་པ་ཁོང་གིས་ཞི་བའི་གྲོས་མོལ་ཨུ་ཚུགས་མཐར་སྐྱེལ་གྱིས་ང་ཚོ་ཚང་མར་མིག་དཔེ་བཟང་པོ་བསྟན་ཡོད། དམ་པ་དེ་ཉིད་ཀྱིས་ཞི་བདེ་དང་འཚེ་མེད་ཞི་བའི་ཐབས་ལམ་ལ་བློས་གཏོང་གིས་དཀའ་རྙོག་ཆེ་ཆུང་ལ་མ་ལྟོས་པར་སེལ་ཐབས་གནང་སྟེ་མི་ཚེ་དོན་དང་ལྡན་པ་ཞིག་བསྐྱལ་ཡོད། ཅེས་འཁོད། །
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས། ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
