ཕྱི་ལོ་ ༢༠༢༠ ཟླ་ ༨ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༡༩༤༥ ལོར་འཛམ་གླིང་དམག་ཆེན་གཉིས་པའི་རྗེས་སུ་ཉི་ཧོང་གི་གྲོང་ཁྱེར་ཧི་རོ་ཤི་མ་ Hiroshima དང་ན་ག་ས་ཀི་ Nagasaki གཉིས་ནང་རྡུལ་ཕྲན་མཚོན་ཆ་གཡུགས་ནས་མི་ལོ་ ༧༥ ཧྲིལ་པོ་འཁོར་བའི་དུས་དྲན་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་སྩལ་བའི་ནང་འཁོད་དོན། ངོས་ཀྱིས་དེ་རིང་གྲོང་ཁྱེར་ཧི་རོ་ཤི་མ་དང་ན་ག་ས་ཀི་གཉིས་ནང་རྡུལ་ཕྲན་མཚོན་ཆ་གཡུགས་ནས་མི་ལོ་ ༧༥ འཁོར་བའི་དུས་དྲན་གྱི་གོ་སྐབས་བརྒྱུད་རྒྱལ་ཁབ་ཁག་གི་གཞུང་དང་། ཚོགས་པ་ཁག དེ་བཞིན་མི་མང་བཅས་ལ་ང་ཚོའི་མི་ཚེ་འདི་ཞི་བདེ་ལྡན་པ་ཞིག་བསྐྲུན་དགོས་པའི་འབོད་སྐུལ་དང་། དུས་རབས་ཉི་ཤུ་པའི་ནང་ཡར་རྒྱས་ཕྱིན་ཡོད་ནའང་དུས་རབས་ཉི་ཤུ་པ་ནི་དྲག་པོའི་དུས་རབས་ཤིག་ཏུ་གྱུར་ཡོད་པ་མ་ཟད། དམག་འཁྲུག་དང་། ལྷག་པར་རྡུལ་ཕྲན་མཚོན་ཆ་བེད་སྤྱོད་བྱས་པར་བརྟེན་མི་མང་ས་ཡ་ ༢༠༠ ཙམ་གྱི་ཚེ་སྲོག་ཤོར་ཡོད།
ད་ཆ་འཛམ་གླིང་ནང་ང་ཚོ་ཚང་མ་གཅིག་ལ་གཅིག་བརྟེན་གྱི་རྣམ་པ་ཤུགས་ཆེ་རུ་འགྲོ་བཞིན་པའི་སྐབས་འདིར། ང་ཚོས་དུས་རབས་ ༢༡ འདི་བཞིན་ཞི་བདེའི་དུས་རབས་ཤིག་བསྐྲུན་རྒྱུའི་གོ་སྐབས་ཡོད། གལ་ཏེ་དཀའ་རྙོག་བྱུང་ཚེ་གྲོས་མོལ་གྱི་ལམ་ནས་སེལ་དགོས་པ་ལས་དྲག་པོའི་ཐབས་ལམ་བེད་སྤྱོད་བྱ་རྒྱུ་མེད། ང་ཚོས་རྡུལ་ཕྲན་མཚོན་ཆའི་འཇིགས་པ་མེད་པར་བཟོ་དགོས་པ་ཙམ་མ་ཟད། ང་ཚོའི་མཐར་ཐུག་གི་དམིགས་ཡུལ་ནི་འཛམ་གླིང་འདི་ཞི་བདེ་ལྡན་པ་ཞིག་བསྐྲུན་རྒྱུ་དེ་ཡིན། དམག་འཁྲུག་ཟེར་བ་ནི་སྲོག་གཅོད་པར་གོ་དགོས་ཤིང་། དྲག་པོའི་ཐབས་ལམ་ལ་བརྟེན་ནས་དྲག་པོ་འབྱུང་བཞིན་ཡོད་པས། ང་ཚོས་དམག་འཁྲུག་དང་རྡུལ་ཕྲན་མཚོན་ཆ་བཟོ་བསྐྲུན་བྱ་རྒྱུ་སྤངས་ཏེ་ཞི་བདེ་ལྡན་པའི་འཛམ་གླིང་ཞིག་བསྐྲུན་དགོས།
དེང་སང་འཛམ་གླིང་གི་དཀའ་ངལ་མང་པོ་ཞིག་འགྲོ་བ་མིས་བཟོས་པ་རེད། ཇི་སྲིད་ང་ཚོར་ཆགས་སྡང་གི་བློ་ཤུགས་ཆེན་པོ་ཡོད་ན་དེ་སྲིད་ང་ཚོ་དང་ཁོང་ཚོ་ཞེས་དབྱེ་བ་འབྱེད་པ་དང་། རིམ་པས་རྒྱུད་ལ་ཕ་རོལ་པོ་འཕམ་པར་བཟོ་འདོད་ཀྱི་བློ་སྐྱེ་ཡི་ཡོད། ང་ཚོས་འགྲོ་བ་མི་ཚང་མ་གཅིག་གྱུར་ཡིན་པའི་འདུ་ཤེས་འཛིན་དགོས་པ་དང་། ཤེས་དགོས་པ་ཞིག་ལ་ཞི་བདེ་ཟེར་བ་དེ་སྨོན་ལམ་གཅིག་པུ་བརྒྱབ་ནས་ཡོང་མི་ཐུབ། ང་ཚོས་ལག་ལེན་འཁེལ་བ་ཞིག་བྱེད་དགོས། ཞེས་འཁོད་འདུག །
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས། ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
