ཕྱི་ལོ་ ༢༠༢༠ ཟླ་ ༨ ཚེས་ ༡༤ རེས་གཟའ་པ་སངས། 

༄༅།།ཕྱི་ལོ་ ༢༠༢༠ ཟླ་ ༧ ཚེས་ ༣༡ ཉིན་རྒྱ་གར་དབུས་གཞུང་གིས་རྒྱལ་ཡོངས་ཤེས་ཡོན་སྲིད་བྱུས་གསར་པ་ཞིག་གཏན་འབེབས་གནང་ཡོད་པར་བརྟེན་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་བརྙན་འཕྲིན་ཁང་གི་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་སྲིད་བྱུས་དེའི་ངོ་སྤྲོད་དང་། དེ་བརྒྱུད་ནས་རྒྱ་གར་ནང་དུ་ཡོད་པའི་བཙན་བྱོལ་བོད་མིའི་སློབ་གྲྭ་ཁག་ཏུ་ཤུགས་རྐྱེན་ཇི་ལྟར་ཐེབས་ཚུལ་སོགས་ཀྱི་སྐོར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གདན་འདྲེན་གྱིས་བཅར་འདྲི་ཞུས་པ་ཁག་གཤམ་གསལ། 

གསར་འགོད་པས། ཕྱི་དྲིལ་བོད་ཀྱི་བརྙན་འཕྲིན་གྱི་ལས་རིམ་ཐོག་ཕེབས་པར་འཚམས་འདྲི་དང་སྦྲགས། གོང་དུ་ངས་ཞུས་པ་བཞིན་ཉེ་ཆར་རྒྱ་གར་དབུས་གཞུང་ནས་རྒྱལ་ཡོངས་ཤེས་ཡོན་སྲིད་བྱུས་གསར་པ་གཏན་འབེབས་གནང་ཡོད། ང་ཚོས་དེའི་སྐོར་གླེང་སློང་མ་གནང་གོང་སྤྱིར་བཏང་རྒྱལ་ཁབ་ཅིག་ལ་ཤེས་ཡོན་སྲིད་བྱུས་གསར་པ་ཞིག་དགོས་གལ་ཆེ་ཚུལ་སྐོར་གསུང་རོགས། 

བཀའ་བློན་མཆོག་གིས། སྤྱིར་རྒྱལ་ཁབ་དང་གཞུང་། སྒྲིག་འཛུགས་སོགས་གང་ཡིན་ནའང་རྒྱལ་ཁབ་ཡར་རྒྱས་གོང་འཕེལ་འགྲོ་དང་མི་འགྲོ་སྔོན་འགྲོའི་ཆ་རྐྱེན་ནམ་དགོས་མཁོ་གཅིག་ནི། ཤེས་ཡོན་ཆགས་ཀྱི་ཡོད་པ་དང་། གལ་ཏེ་ཤེས་ཡོན་གྱི་གོ་སྐབས་ཡོད་ན། འགྲོ་བ་མིའི་ཐོབ་ཐང་དང་གང་ཅིའི་ཐད་གོ་རྟོགས་མང་བ་སྤེལ་ཐུབ་རྒྱུའི་ནུས་པ་ཡོད། 

སྤྱི་ཡོངས་ནས་རྒྱལ་ཁབ་ཡར་རྒྱས་འགྲོ་བར་ཚན་རིག་དང་འཕྲུལ་ཆས། དཔལ་འབྱོར། ཆབ་སྲིད། འཛུགས་སྐྲུན། གསོ་བ་རིག་པ། བཟོ་རིག་པ། ཁྲིམས་ལུགས་སོགས་ཡག་པོ་ཡོད་དགོས། དེ་དག་ཡོང་བར་གཙོ་བོ་ཤེས་ཡོན་ལ་རག་ལས་ཡོད། དེ་བཞིན་རྒྱལ་ཁབ་ཀྱི་བདེ་འཇགས་དང་མི་མང་གི་འཕྲོད་བསྟེན། མིའི་བསམ་བློ་ཡར་རྒྱས་ཚད་མཐོ་བོ་འགྲོ་དང་མི་འགྲོ་གཙོ་བོ་ཤེས་ཡོན་གྱི་གོ་སྐབས་ཐོབ་ཡོད་མེད་ལ་རག་ལས་ཡོད། རྒྱལ་ཁབ་དང་སྒྲིག་འཛུགས་ག་འདྲ་ཞིག་ཡིན་ནའང་ན་གཞོན་རྣམས་ལ་ཤེས་ཡོན་སློབ་སྦྱོང་གི་གོ་སྐབས་བསྐྲུན་དགོས་པ་ཚང་མས་གལ་ཆེན་པོ་རྩི་བཞིན་ཡོད། ཤེས་ཡོན་ཧ་ཅང་གལ་ཆེན་པོ་རྩི་ཡི་ཡོད་སྟབས། ན་གཞོན་རྣམས་ལ་ཤེས་ཡོན་སློབ་གསོ་སྤྲོད་རྒྱུ་གལ་ཆེན་པོ་གང་ཆགས་ཡོད་དམ་ཞེ་ན། ཤེས་ཡོན་སྲིད་བྱུས་སམ་ལམ་སྲོལ། འཆར་གཞི་བཅས་རྒྱལ་ཁབ་སོ་སོའི་དམིགས་ཡུལ་དང་དགོས་མཁོ་ལ་དཔག་པའི་མཐུན་འགྱུར་ཡག་པོ་གནང་ཐུབ་མཁན་གྱི་ཤེས་ཡོན་སྲིད་བྱུས་ཤིགདགོས་རྒྱུ་གལ་ཆེན་པོ་ཆགས་ཡོད། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་ནམ་པ་ཀུན་ཏུ་དེང་དུས་ཤེས་ཡོན་དང་མཉམ་དུ་སྲོལ་རྒྱུན་གྱི་ཤེས་ཡོན་དགོས་པའི་སྐོར་བཀའ་སློབ་ཕེབས་བཞིན་ཡོད། ད་ལྟའི་རྒྱ་གར་རྒྱལ་ཡོངས་ཀྱི་ཤེས་ཡོན་སྲིད་བྱུས་ ༢༠༢༠ འདི་བཞིན་དུས་རབས་ཉི་ཤུ་རྩ་གཅིག་གི་ཤེས་ཡོན་སྲིད་བྱུས་དང་པོ་དེ་རེད་ཅེས་གསུང་གི་འདུག  སྲིད་བྱུས་འདིའི་ནང་རྒྱ་གར་གནའ་རབས་སྲོལ་རྒྱུན་གྱི་བཟང་སྤྱོད་དང་། སྐད་ཡིག་བཅས་ཚུད་འདུག་པས་འདི་ངས་ཡག་པོ་ཞིག་མཐོང་གི་འདུག 

འཛམ་གླིང་གི་མི་ཚང་མར་དགོས་པ་ནི་ཞི་བདེ་བག་ཕེབས་རེད། དེར་བརྟེན་རྒྱལ་ཁབ་སོ་སོའི་ཤེས་ཡོན་སྲིད་བྱུས་ནང་དེ་དགོས་རྒྱུ་གལ་ཆེན་པོ་རེད། ལྷག་པར་རྒྱ་གར་ལ་ཆ་མཚོན་ན། འབྱུང་འགྱུར་ལོ་བཅུའི་ནང་རྒྱ་གར་ནང་ན་གཞོན་མི་འབོར་འཛམ་གླིང་ནང་མང་ཤོས་ཆགས་ཀྱི་རེད། ཅེས་ཚོད་དཔག་རྒྱག་གི་འདུག རྒྱལ་ཁབ་ཡར་རྒྱས་ནི་ན་གཞོན་རྣམས་ལ་ཤེས་ཡོན་ཇི་ལྟར་སྤྲོད་མིན་ལ་རག་ལས་ཡོད་པ་ཤེས་ཡོན་སྲིད་བྱུས་ཀྱི་ངོ་སྤྲོད་ནང་འདི་ལྟར་གསུང་འདུག 

རྒྱ་གར་ལ་ཆ་བཞག་ན་ཤེས་ཡོན་སྲིད་བྱུས་དང་སྒྲོམ་གཞི། ལམ་སྲོལ་བཅས་ཇི་ཙམ་ཡག་པོ་བཟོས་པ་ཡིན་ནའང་མི་ཚང་མར་སྙོབ་ཐུབ་པ་ཞིག་དང་། ཚང་མར་གོ་སྐབས་གཅིག་མཚུངས་བསྐྲུན་དགོས་རྒྱུ་ཧ་ཅང་གལ་ཆེན་པོ་རེད། དཔེར་ན་རྒྱ་གར་ལ་དཀའ་ངལ་གཅིག་གང་ཡོད་ཅེ་ན། རྒྱ་གར་ནི་འཛམ་གླིང་ནང་མི་འབོར་ཆེ་ཤོས་ཨང་གཉིས་པ་ཡིན་སྟབས། ཤེས་ཡོན་སློབ་སྦྱོང་གི་གོ་སྐབས་ཚང་མ་ལ་སྤྱི་མཚུངས་སུ་སྤྲོད་ཐུབ་ཀྱི་རེད་དམ་མ་རེད། འདི་དྲི་བ་ཞིག་རེད། དེ་དག་ཚང་མ་ཡག་པོ་ཡོང་བར་དཔལ་འབྱོར་གྱི་རྒྱབ་རྟེན་དགོས་རྒྱུ་ཧ་ཅང་གལ་ཆེན་པོ་རེད། 

གསར་འགོད་པས། རྒྱ་གར་གཞུང་གི་ཤེས་ཡོན་སྲིད་བྱུས་གསར་པ་འདིའི་ནང་དམིགས་བསལ་འགྱུར་བ་གང་དང་གང་བཏང་ཡོད་དམ།

བཀའ་བློན་མཆོག་གིས། དེ་སྔ་ཡིན་ན་ཤེས་ཡོན་གྱི་སྒྲོམ་གཞི་ནང་རིམ་པ་གཉིས་མ་གཏོགས་མེད། ལོ་དྲུག་མན་གྱི་སློབ་ཕྲུག་རྣམས་གཞི་རིམ་ཤེས་ཡོན་གྱི་སྒྲོམ་གཞི་ནང་མེད། ལོ་དྲུག་ནས་འགོ་བཙུགས་ཏེ་ལོ་བཅུའི་རིང་འཛིན་གྲྭ་བཅུ་པ་བར་ཚར་རྒྱུ་དང་། དེའི་རྗེས་དུས་ཡུན་ལོ་གཉིས་ཅན་གྱི་རིམ་པ་བཅས་རིམ་པ་གཉིས་མ་གཏོགས་མེད། ད་ཆ་རིམ་པ་བཞི་ཙམ་བཟོས་འདུག རིམ་པ་དང་པོ་དེར་ལོ་ལྔའི་དུས་ཡུན་འདུག དེ་ཡང་ལོ་གཉིས་་ཀྱི་རིང་དང་ལོ་གསུམ་རིང་བཅས་དུམ་བུ་གཉིས་ལ་ཕྱེ་འདུག ལོ་གསུམ་ཅན་པ་དེ་བཙན་བྱོལ་བོད་མིའི་ཤེས་ཡོན་སྒྲོམ་གཞི་ནང་ཕྱིན་ན་སྔོན་འགྲོ་ལྟ་བུ་རེད་འདུག དེ་ནས་འཛིན་གྲྭ་དང་པོ་དང་གཉིས་པ་རེད་འདུག དེའི་སྟེང་འཛིན་གྲྭ་གསུམ་པ་ནས་ལྔ་པ་བར་ལོ་གསུམ་རིང་གི་རིམ་པ་ཞིག་དང་འཛིན་གྲྭ་དྲུག་པ་ནས་བརྒྱད་པ་བར་ལོ་གསུམ་རིང་གི་རིམ་པ་བརྒྱད་འདུག མཐར་འཛིན་གྲྭ་དགུ་པ་ནས་བཅུ་གཉིས་བར་ལོ་བཞིའི་རིང་གི་དུས་ཡུན་བཅས་རིམ་པ་བཞི་རུ་ཕྱེ་འདུག  ཐེངས་འདིའི་སྲིད་བྱུས་གསར་པའི་ནང་སྔོན་འགྲོ་དང་དམའ་རིམ་གྱི་ཤེས་ཡོན་བཞག་ཐུབ་པ་འདི་ཧ་ཅང་གནད་འགག་ཆེན་པོ་ཆགས་ཡོད། ཕྲུ་གུ་ཆུང་དུས་སྐབས་ཤེས་ཡོན་སློབ་གསོ་ཡག་པོ་སྤྲད་ཐུབ་པ་ཡིན་ན། མ་འོངས་ཤེས་ཡོན་འཕེལ་རྒྱས་སླད་ཕན་ཐོགས་ཆེན་པོ་ཡོད། དེ་བཞིན་ཡིག་རྒྱུགས་གཏོང་སྟངས་ལ་འགྱུར་བ་གང་ཙམ་བཏང་འདུག འབྲི་ཀློག་ཙམ་མིན་པར་ཉིན་རེའི་བྱེད་སྒོ་ཐོག་ནས་བརྒྱ་ཆ་སྤྲོད་རྒྱུ་དང་། གཞུང་དང་སྒེར་གྱིས་གཉེར་བཞིན་པའི་སློབ་གྲྭ་ཁག་འཛིན་སྐྱོང་གནང་སྟངས་ལ་འགྱུར་བ་ཕྲན་བུ་འགྲོ་རྒྱུ་མ་ཟད། ངོས་འཛིན་གནང་ཕྱོགས་ཐད་ལའང་ད་ལྟ་ནང་བཞིན་མིན་པར་སྟབས་བདེ་པོ་དང་ཚགས་ཚུད་པོའི་འགྱུར་བ་གཏོང་གི་རེད། ཅེས་གསུང་གི་འདུག 

གལ་ཆེན་པོ་གཞན་ཞིག་ནི་གཞི་རིམ་གྱི་འབྲི་ཀློག་དང་ཨང་རྩིས་ཆུང་དུས་སྐབས་ནས་ཤུགས་བརྒྱག་རྒྱུ་ཧ་ཅང་གལ་ཆེན་པོ་རེད་འདུག  གང་ལ་ཟེར་ན། སློབ་ཕྲུག་མང་པོ་ཞིག་འཛིན་གྲྭ་ཐོན་པའི་སྐབས་གནས་ཚད་ལ་དཔག་པའི་འབྲི་ཀློག་དང་རྩིས་སོགས་མི་ཤེས་པའི་དཀའ་ངལ་མང་དག་འཕྲད་པ་དང་། དེ་ལ་དཔག་པའི་ཚད་ཅིག་འཛིན་ཐུབ་ཀྱི་མེད་སྟབས་དེ་ལའང་སྔར་ལྷག་ཤུགས་སྣོན་བརྒྱག་རྒྱུ་ཡིན་པ་མ་ཟད། འཛིན་རིམ་བཅུའི་སྐབས་སློབ་ཚན་བགོས་པ་ལྟར་འགྲོ་དགོས་ཀྱི་ཡོད་པ་དང་དེར་འགྲོ་བར་བརྒྱ་ཆ་དགོས་པ་སོགས་ཀྱི་དཀའ་ངལ་འཕྲད་ཀྱི་ཡོད་སྟབས། དེ་ལ་སློབ་ཕྲུག་སོ་སོའི་དགའ་མོས་ཀྱི་སློབ་ཚན་ལ་དོ་དབྱིངས་ཡོད་པའི་སློབ་ཚན་ཐོག་འདེམས་ཀ་མང་པོ་ཡོད་པ་སོགས་ཀྱི་ཐད་བསྒྱུར་བཅོས་ཀྱི་གོ་སྐབས་ཤིག་ཡོད་པ་གསུང་གི་འདུག གཞན་གནད་འགག་གཅིག་ནི། ལས་རིག་སྦྱོང་བརྡར་ཐོག་ཡར་རྒྱས་ཕྱིན་ཡོད་ཀྱང་གཟིགས་ཚུལ་མི་འདྲ་བ་ཞིག་ཡོད། ད་ལྟའི་ཤེས་ཡོན་སྲིད་བྱུས་གསར་པ་དེའི་ནང་ལས་རིག་སྦྱོང་བརྡར་དེ་བཞིན་འཛིན་རིམ་དྲུག་པ་ནས་ངོ་སྤྲོད་གནང་རྒྱུ་དང་། སློབ་འཁྲིད་གནང་བའི་སྐབས་སུ་བརྒྱུད་རིམ་འདི་བཞིན་དམའ་མཐའ་ནས་སོ་སོའི་ཕ་སྐད་དང་གཞན་ས་གནས་ཀྱི་སྐད་ཀྱི་ཐོག་འཁྲིད་དགོས་པ། མཐར་སློབ་ཕྲུག་གི་ཤེས་ཡོན་གྱི་མཐའ་མའི་བསྡོམས་དེ་བཞིན་ཡིག་རྒྱུགས་ཀྱི་གྲུབ་འབྲས་དང་སློབ་གྲྭ་བྱེད་སྒོ་ཙམ་མ་ཟད་སྤྱི་ཡོངས་ཀྱི་སློབ་ཕྲུག་གི་བཟང་སྤྱོད་དང་མཐུན་ལམ། རིག་རྩལ་གཞན་ལ་སོགས་ཚང་མར་དཔྱད་ཞིབ་ཀྱིས་ཐོག་ནས་སློབ་ཕྲུག་གི་ཤེས་ཡོན་ཡར་རྒྱས་ཇི་ལྟར་འགྲོ་བ་རྣམས་གཟིགས་རྟོག་བྱེད་དགོས། དགེ་རྒན་གྱི་ཆ་རྐྱེན་ནི། སློབ་གྲྭ་ཐོན་པའི་རྗེས་མཐོ་སློབ་ཏུ་ལོ་བཞིའི་རིང་སློབ་སྦྱོང་བྱས་ཟིན་པའི་ཆ་རྐྱེན་དང་དགེ་རྒན་འོས་སྦྱོང་ཐོན་དགོས། མཐོ་སློབ་ཁག་ལ་འགྱུར་བ་ཕྱིན་པའི་ནང་སྤྱིར་མཐོ་སློབ་ཁག་ཏུ་ཉེ་བའི་གཙུག་ལག་རམ་འབྱམས་པའི་དུས་ཡུན་ལོ་གསུམ་རེད་དེ་ད་ཆ་ཤེས་ཡོན་སྲིད་བྱུས་གསར་པ་དེའི་ནང་ཡང་ན་དུས་ཡུན་ལོ་ ༣ དང་ ༤ ཞེས་བསྒྱུར་བཅོས་གཏང་རྒྱུ་རེད་འདུག ཤེས་ཡོན་སྲིད་བྱུས་གསར་པའི་ནང་། གལ་ཏེ་སློབ་ཕྲུག་ཞིག་དཀའ་ངལ་འཕྲད་དེ་སློབ་སྦྱོང་མུ་མཐུད་བྱེད་མ་ཐུབ་ཚེ་མཐོ་སློབ་མཚམས་བཞག་པ་དང་། དེ་རྗེས་མཐོ་སློབ་གཞན་དུ་བསྐྱོད་པར་དེ་སྔོན་སློབ་ཕྲུག་དེའི་མཐོ་སློབ་ཀྱི་ credit འདི་བཞིན་མཐོ་སློབ་གསར་པར་འཁྱེར་སྟེ་མུ་མཐུད་སློབ་སྦྱོང་བྱེད་ཆོག་གི་ཡོད། དེ་ངས་ཡག་པོ་ཞིག་མཐོང་སོང་། མཐོ་སློབ་ནང་ Multi disciplinary བཟོ་གི་རེད། རྒྱ་གར་གཞུང་ནས་དེ་སྔོན་སྒེར་གྱི་མཐོ་སློབ་རྣམས་ལ་Affiliation ངོས་འཛིན་གནང་ཕྱོགས་དེ་ཕྱིས་སུ་རིམ་བཞིན་དེ་མེད་པ་བཟོ་རྒྱུའི་སོགས་འཁོད་ཡོད། 

གསར་འགོད་པས། སྲིད་བྱུས་གསར་པ་དེའི་ནང་བསྒྱུར་བཅོས་མང་པོ་བཏང་འདུག དེའི་ནང་ནས་འཛིན་རིམ་ལྔ་པ་བར་དུ་སློབ་འཁྲིད་ཀྱི་ཐབས་ལམ་ Medium of Instruction ཞིག་བསྒྱུར་བཅོས་ཀྱིས་ཕ་སྐད་ཀྱི་ལམ་ནས་བསླབ་དགོས་ཀྱི་ཡོད་སྟབས་རྒྱ་གར་ནང་ཡོད་པའི་བཙན་བྱོལ་བོད་མིའི་སློབ་གྲྭ་ཁག་གི་ནང་ཤུགས་རྐྱེན་ཇི་ལྟར་ཐེབས་སྲིད་པ་རེད་དམ།  དཔེར་ན། སྦེལ་ཀོབ་ཏུ་ཡོད་པའི་བོད་པའི་སློབ་གྲྭ་ལྟ་བུ་ཆ་བཞག་ན། དེར་ས་གནས་སྐད་ཡིག་ཀར་ན་ཊ་ཀའི་སྐད་ཐོག་ནས་སློབ་འཁྲིད་གནང་དགོས་པའི་གནས་སྟངས་ཤིག་བྱུང་ཚེ་བོད་མིའི་སློབ་གྲྭའི་གནས་སྟངས་གང་འདྲ་ཆགས་ཀྱི་ཡོད་དམ། 

བཀའ་བློན་མཆོག་གིས། སློབ་འཁྲིད་གནང་རྒྱུའི་སྐད་ཡིག་བརྒྱུད་རིམ་འདི་ནི་སོ་སོའི་ཕ་སྐད་དང་ས་གནས་ཀྱི་སྐད་ཡིག་གཉིས་ཐོག་གནང་དགོས། བོད་པ་རྣམས་ལ་ཕ་སྐད་བོད་ཀྱི་སྐད་ཡིག་ཆགས་ཀྱི་ཡོད་པ་རེད།  ངེས་པར་ས་གནས་དེ་རང་གི་སྐད་ཡིག་ཐོག་འཁྲིད་དགོས་ཞེས་བཀའ་ཕེབས་མེད། དཔེར་ན། རྒྱ་གར་ནང་དེ་སྔོན་ཤེས་ཡོན་སྲིད་བྱུས་གསར་པ་སྐད་ཡིག་གསུམ་གྱི་ལམ་ལུགས་ཐོག་མཐར་ཕྱིན་པ་བསྐྱོད་མི་ཐུབ་མཁན་མང་པོ་ཡོད། མངའ་སྡེ་སོ་སོའི་དགོས་མཁོ་ལ་དཔག་པའི་འགྲོ་གི་ཡོད་པ་རེད། སྐད་ཡིག་གི་སློབ་འཁྲིད་ཐོག་བཙན་བྱོལ་བོད་མིའི་སློབ་གྲྭར་དཀའ་ངལ་འཕྲད་ཀྱི་མ་རེད། སྔར་ལྟར་སོ་སོའི་སྐད་ཡིག་ཐོག་བསླབས་ནས་འགྲོ་དང་འགྲོ་མུས་རེད། ངས་བལྟས་ཚེ་ཕན་ཐོགས་པ་ལྟ་བུ་དྲན་གྱི་འདུག དེ་སྔོན་རྒྱ་གར་ལྷོ་ཕྱོགས་སུ་ཡོད་པའི་བོད་པའི་སློབ་གྲྭ་ཁ་ཤས་ལ་དཀའ་ངལ་ཏོག་ཙམ་འཕྲད་པ་རེད། སྐབས་དེར་ས་གནས་སུ་འཛིན་གྲྭ་དང་པོ་ནས་ས་གནས་ཀྱི་སྐད་ཡིག་ཐོག་ནས་སློབ་འཁྲིད་བྱེད་དགོས་ཞེས་བཀའ་ཕེབས་པའི་དཀའ་ངལ་འཕྲད་ཡོད་སྟབས། ས་གནས་ཀྱི་ཤེས་རིག་བློན་ཆེན་ཐུག་འཕྲད་ཀྱིས་བོད་པའི་གནས་སྟངས་དང་བོད་པའི་སློབ་གྲྭ་ཟུར་དུ་བཙུགས་དགོས་པའི་རྒྱུ་མཚན་ལ་སོགས་ཀྱི་ཐོག་གསལ་བཤད་ཆ་ཚང་ཞུས་པ་རེད། 

གསར་འགོད་པས།  རྒྱ་གར་གཞུང་གི་ཤེས་ཡོད་སྲིད་བྱུས་གསར་པ་གཏན་འབེབས་གནང་བ་དེས་བཙན་བྱོལ་བོད་མིའི་ཤེས་ཡོན་སྲིད་བྱུས་ལམ་ལྷོངས་ཡོང་བར་ཕན་ཐོགས་གང་ཡོད་དམ།

བཀའ་བློན་མཆོག་གིས། སྤྱིར་བཙན་བྱོལ་བོད་མིའི་སློབ་གྲྭ་ཁག་ནི་བོད་པའི་སློབ་ཕྲུག་ཆེད་བཙུགས་པ་ཞིག་ཡིན། བཙན་བྱོལ་བོད་མིའི་སློབ་གྲྭ་ཁག་གི་ནང་རྒྱ་གར་གྱི་ཁྲིམས་དང་ཐད་ཀར་འབྲེལ་བ་འཛིན་གྲྭ་བཅུ་པ་དང་བཅུ་གཉིས་ཀྱི་ཡིག་རྒྱུགས་གཏོང་བའི་སྐབས་ཆགས་ཀྱི་ཡོད། སྐབས་དེར་རྒྱ་གར་གཞུང་གི་ཤེས་ཡོན་སྒྲོམ་གཞི་དང་། བསླབ་གཞི་རྩ་འཛིན་གཏན་འབེབས་གང་གནང་བ་ཇི་མ་ཇི་བཞིན་འཁྲིད་དགོས་ཀྱི་ཡོད། སྟབས་ལེགས་པ་ཞིག་ལ་འཛིན་རིམ་བཅུ་གཉིས་བར་བོད་ཡིག་སློབ་ཁྲིད་ཡོད། འཛིན་གྲྭ་བཅུ་པའི་ཡིག་རྒྱུགས་སླད་འཛིན་རིམ་དགུ་པའི་སྐབས་ནས་ཐོ་འགོད་བྱེད་དགོས་ཀྱི་ཡོད་སྟབས། འཛིན་བཅུ་པ་དང་བཅུ་གཉིས་བར་ཡོད་པའི་སློབ་གྲྭ་ཁག་རྒྱ་གར་གཞུང་ལ་ཁྲིམས་མཐུན་གྱི་ཐོ་འགོད་གནང་ཡོད་པར་བརྟེན་ཁྲིམས་ཐོག་ནས་དཀའ་ངལ་གང་ཡང་འཕྲད་ཀྱི་མ་རེད། འཛིན་གྲྭ་བརྒྱད་པ་མན་གྱི་ཤེས་ཡོན་སློབ་གསོའི་ནང་ང་ཚོར་རང་དབང་གང་ཙམ་ཡོད་སྟབས། ད་བར་བཙན་བྱོལ་བོད་མིའི་ཤེས་ཡོན་སྲིད་བྱུས་ཡག་པོ་ལག་བསྟར་གནང་ཐུབ་པའི་གནས་སྟངས་ཆགས་ཡོད། ཅེས་གསུངས། །