ཕྱི་ལོ་ ༢༠༢༠ ཟླ་ ༨ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༨ ཚེས་ ༢༨ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་བཙན་བྱོལ་བོད་མིའི་གཞི་རིམ་འོག་མ་དང་བར་མའི་ཨིན་ཡིག་སློབ་ཚན་བསླབ་གཞི་རྩ་འཛིན་སྒྲོམ་གཞིའི་སྐོར་དྲ་ཐོག་ཚོགས་འདུ་བསྐོང་ཚོགས་གནང་ཡོད།
སྐབས་དེར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་དབུ་བཞུགས་ཐོག་རྒྱ་གར་ལྷོ་ཕྱོགས་སུ་ཡོད་པའི་སཾ་བྷོ་ཊ་སློབ་གྲྭ་ཁག་བཅུ་ནས་དགེ་རྒན་ཁྱོན་མི་གྲངས་ཉི་ཤུ་མཉམ་ཞུགས་ཀྱིས་ཆུ་ཚོད་གཉིས་རིང་གོ་བསྡུར་གནང་ཡོད།
ཐེངས་འདིར་འཛིན་རིམ་བཞི་པ་ནས་བརྒྱད་པ་བར་གྱི་ཨིན་ཡིག་སློབ་ཚན་བསླབ་གཞི་རྩ་འཛིན་སྒྲོམ་གཞི་བཟོ་འགོད་གནང་དགོས་དོན་ནི། དེ་སྔ་ཕྱི་ལོ་ ༢༠༡༠ ལོར་ཨིན་ཡིག་བསླབ་གཞི་གཏན་འབེབ་ཟིན་པ་ནང་མི་འདང་བ་དང་ཆད་པ་འགའ་རེ་ཡོད་པ་རྣམས་བསྐྱར་བཅོས་བྱ་རྒྱུ་ཡིན་པ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཨིན་ཡིག་བསླབ་གཞི་རྩ་འཛིན་གསར་པ་གཏན་འབེབས་ནང་རྒྱ་གར་ནང་ཡོད་པའི་བཙན་བྱོལ་བོད་མིའི་སློབ་གྲྭ་ཁག་ཏུ་ཨིན་ཡིག་སློབ་འཁྲིད་གནང་ཕྱོགས་ཐད་འགྱུར་ལྡོག་གིས་ཕྲུ་གུ་དང་དགེ་རྒན་དབར་གོ་བསྡུར་གྱི་ལས་རིམ་ཤུགས་ཆེར་གཏང་རྒྱུ་དང་དེང་དུས་ཀྱི་ཤེས་ཡོན་ཚད་ལྡན་ཞིག་བསྐྲུན་ཆེད་ཡིན།
སྤྱིར་ཕྱི་ལོ་ ༢༠༢༠ ཟླ་ ༨ ཚེས་ ༡༣ རེས་གཟའ་ཕུར་བུའི་ཉིན་རྒྱ་གར་བྱང་ཤར་དང་དབུས་སུ་རྟེན་གཞི་བྱས་པའི་སམ་བྷོ་ཊ་སློབ་གྲྭ་ཁག་གི་སློབ་སྤྱི་དང་དགེ་རྒན་ལྷན་དུ་དྲ་རྒྱ་བརྒྱུད་ཚོགས་འདུ་ཐེངས་དང་པོ་བསྐོང་ཚོགས་གནང་ཡོད་པ་དང་། སྐབས་དེར་དགེ་རྒན་བཞི་བཅུ་ཞེ་གཉིས་མཉམ་ཞུགས་གནང་ཡོད། ཚོགས་འདུ་ཐེངས་གཉིས་པ་ཕྱི་ཚེས་ ༢༡ རེས་གཟའ་པ་སངས་ཉིན་ཚོགས་ཡོད། ཚོགས་འདུ་དེའི་ཐོག་མ་སུ་རི་བོད་ཁྱིམ་ཁྱབ་ཁོངས་ཀྱི་སློབ་གྲྭ་བཞིའི་དགེ་རྒན་ ༣༡ མཉམ་ཞུགས་གནང་ཡོད།
གཞན་ཡང་དེ་སྔོན་རྒྱ་གར་ནང་ཐེམ་སྤང་བཀའ་རྒྱ་མ་བསྡམས་པའི་སྐབས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་མཆོག་གིས་སློབ་གྲྭ་ཁག་གི་སློབ་སྤྱི་དང་དགེ་རྒན་ལྷན་དུ་ཟབ་སྦྱོང་ཞིག་ཀྱང་ཚོགས་ཡོད།
དྲ་རྒྱའི་ཐོག་ཚོགས་འདུ་མཐའ་མ་དེ་བཞིན་ལ་དྭགས་བོད་ཁྱིམ་གྱི་སློབ་སྤྱི་དང་ཨིན་ཡིག་དགེ་རྒན་ལྷན་དུ་འཚོགས་རྒྱུ་ཡིན་འདུག་པ་བཅས། །
