ཕྱི་ལོ་ ༢༠༢༠ ཟླ་ ༨ ཚེས་ ༦ རེས་གཟའ་ཕུར་བུ།
༄༅། །ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་ནས་ལོ་ངོ་ ༢༥ འཁོར་བཞིན་པ་དང་བསྟུན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དང་། རང་སྣང་གང་དྲན་གྱིས་བཙོན་འཇུག་བྱས་པའི་ལས་དོན་ཚོགས་ཆུང་། རིག་གཞུང་གི་ཐོབ་ཐང་ལས་དོན་ཚོགས་ཆུང་། གྲངས་ཉུང་མི་རིགས་ཀྱི་ཐོབ་ཐང་ལས་དོན་ཚོགས་ཆུང་། ཆོས་དད་རང་དབང་གི་ཐོབ་ཐང་ལས་དོན་ཚོགས་ཆུང་བཅས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་ཚོགས་ཆུང་ལྔ་ནས་རྒྱ་ནག་གཞུང་ལ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་སྐོར་འདྲི་རྩད་གནང་བར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གོང་གི་གནད་དོན་དེ་དང་འབྲེལ་ནས་གསུང་དོན།
ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་ནས་ལོ་ངོ་ ༢༥ འཁོར་བཞིན་ཡོད་སྟབས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་ཚོགས་ཆུང་ལྔ་ནས་རྒྱ་ནག་གཞུང་ལ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་སྐོར་གནས་ཚུལ་ཁ་གསལ་སྤྲོད་དགོས་པའི་འབོད་སྐུལ་གནང་ཡོད་པ་མ་ཟད། རྒྱ་ནག་གཞུང་གི་ཐེ་བྱུས་མེད་པར་བོད་པའི་ནང་པ་ཚོས་ཆོས་དང་རིག་གཞུང་སོགས་རང་དབང་གི་སྒོ་ནས་ཉམས་ལེན་བྱེད་འཇུག་དགོས་པའི་འབོད་སྐུལ་གནང་ཡོད། བོད་མིའི་སྒྲིག་འཛུགས་ཀྱིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་ཚོགས་ཆུང་ལྔ་ནས་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་སྐོར་འདྲི་རྩད་གནང་བར་དགའ་བསུ་དང་ཐུགས་རྗེ་ཆེ་ཞུ་རྒྱུ་ཡིན།
རྒྱ་ནག་གཞུང་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཡབ་ཡུམ་བཅས་བཙན་ཁྲིད་བྱས་ཡོད་པ་དང་། སྐབས་དེར་ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་དྲུག་ལས་སོན་མེད། རྒྱ་ནག་གཞུང་གིས་འདས་པའི་ལོ་ངོ་ ༢༥ རིང་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་ཆོས་ཀྱི་སློབ་སྦྱོང་བཙན་འཕྲོག་བྱས་པ་ནི་རྒྱལ་སྤྱིའི་ཁྲིམས་དང་བཟང་སྤྱོད་གཉིས་ཀའི་ཐོག་ནས་འགལ་ཡོད་པས་མཐའ་གཅིག་ཏུ་ངོ་རྒོལ་ཡོད། ཅེས་དང་། རྒྱ་ནག་གཞུང་གིས་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་བྱས་པ་དེས་བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྩིས་མེད་རྡོག་རོལ་བཏང་ཡོད།
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་ཚོགས་ཆུང་ལྔ་ནས་གསུངས་པ་ལྟར། ཆབ་སྲིད་ཐོག་ནས་བོད་ནང་གི་བོད་མིའི་ཐོག་སྟངས་འཛིན་བྱ་ཆེད་རྒྱ་ནག་གཞུང་གིས་བོད་ཀྱི་བླ་ཆེན་ཁག་གི་ཡང་སྲིད་འཚོལ་ཞིབ་ཀྱི་གནད་དོན་ཐད་ཐེ་གཏོགས་བྱེད་བཞིན་ཡོད། དེར་བརྟེན་ང་ཚོའི་ངོས་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་ཚོགས་ཆུང་ལྔ་ནས་རྒྱ་ནག་གཞུང་ལ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གིས་དབུས་ཡབ་ཡུམ་རྣམ་པ་དང་བྱ་བྲལ་རིན་པོ་ཆེ་མཆོག་གི་གནས་སྟངས་སྐོར་གནས་ཚུལ་ཁ་གསལ་སྤྲོད་དགོས་པའི་འབོད་སྐུལ་གནང་བ་དེར་རྒྱ་ནག་གཞུང་གིས་བརྩི་བཀུར་ཞུ་དགོས་པའི་འབོད་སྐུལ་དང་། རྒྱ་ནག་གཞུང་གིས་བོད་མིའི་རིག་གཞུང་གཏོར་བཤིག་གཏོང་བཞིན་པ་དང་བོད་མིའི་ཆོས་དད་རང་དབང་ཐོག་ཐེ་གཏོགས་བྱེད་བཞིན་པ་འཕྲལ་དུ་མཚམས་འཇོག་དགོས་པའི་འབོད་སྐུལ་བྱེད་བཞིན་ཡོད། ཅེས་གསུངས།།
