ཕྱི་ལོ་ ༢༠༢༠ ཟླ་ ༨ ཚེས་ ༢༧ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༨ ཚེས་ ༢༥ ཉིན་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ Wang Yi གསང་བའི་ངང་ཨི་ཊ་ལི་ནང་ལྟ་སྐོར་དུ་སླེབ་སྐབས་ཨི་ཊ་ལིའི་ཕྱི་སྲིད་བློན་ཆེན་ལུའི་ཇི་དེ་མ་ཡོ་ Luigi Di Maio མཆོག་གིས་སྣེ་ལེན་གནང་ཡོད་པ་དང་། སྐབས་དེར་བོད་མི་དང་ཧོང་ཀོང་བ་ཚོས་ཨི་ཊ་ལིའི་ཕྱི་སྲིད་ལྷན་ཁང་གི་མདུན་ཐང་དུ་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དང་། ཧོང་ཀོང་ནང་རྒྱལ་ཁབ་བདེ་འཇགས་ཀྱི་བཅའ་ཁྲིམས་གཏན་འབེབས་བྱས་པ་སོགས་ལ་ངོ་རྒོལ་གནང་ཡོད།

དེ་ཡང་ཝང་དབྱི་ཕྱི་ཟླ་ ༨ ཚེས་ ༢༥ ནས་ཕྱི་ཟླ་ ༩ ཚེས་ ༡ བར་ཨི་ཊ་ལི་དང་། ནེ་ཐར་ལན་ཊི། ནོར་ཝེ། ཕ་རན་སི། འཇར་མན་ནི་བཅས་ཡུ་རོབ་ཀྱི་རྒྱལ་ཁབ་ཁག་ལྔའི་ནང་ལྟ་སྐོར་དུ་བསྐྱོད་རྒྱུ་ཡིན་པ་རེད། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་བརྡལ་དུ་ཕྱིན་པར་བརྟེན་མི་ཁྲི་ཕྲག་མང་པོའི་ཚེ་སྲོག་ཤོར་བ་དང་མི་ས་ཡ་མང་པོར་རྒྱུ་ནོར་གྱི་གྱོང་གུན་ཕོག་ཡོད་པའི་སྐབས་འདིར། རྒྱ་ནག་གི་ཧཱ་ཝེ་འཕྲུལ་ཆས་བཟོ་སྐྲུན་ཁང་གི་དྲ་རྒྱ་ཐོན་ལྔ་པ་ 5G ཚོང་འབྲེལ་དང་རྒྱ་ནག་གི་ཕྱི་འབྲེལ་བསྐྱར་གསོ་ཡོང་སླད་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ཡུ་རོབ་རྒྱལ་ཁབ་ཁག་གི་ནང་ལྟ་སྐོར་དུ་བསྐྱོད་ཡོད།

ཨི་ཊ་ལིའི་གྲོས་ཚོགས་གོང་མའི་གྲོས་ཚོགས་འཐུས་མི་ཁག་གཅིག་གིས་ཧོང་ཀོང་གི་གཞོན་སྐྱེས་མང་གཙོ་དོན་གཉེར་བ་དང་གྲོས་ཚོགས་འཐུས་མི་ནཱ་ཐན་ལའོ་ལགས་ཨི་ཊ་ལིའི་ཕྱི་སྲིད་བློན་ཆེན་མཆོག་དང་ཐུག་འཕྲད་ཆེད་མགྲོན་འབོད་གནང་ཡོད། ནཱ་ཐན་ལའོ་ལགས་ཀྱིས་གསར་འགོད་པ་ཚོར་རྒྱ་ནག་གཞུང་གིས་བོད་དང་ཤར་ཏུར་ཀི་སི་ཐན་སོགས་ཀྱི་ནང་འགྲོ་བ་མིའི་ཐོབ་ཐང་དང་། ཆོས་དད་རང་དབང་། སྨྲ་བརྗོད་རང་དབང་སོགས་རྩིས་མེད་རྡོག་རོལ་གཏོང་བཞིན་པ་སོགས་ཀྱི་སྐོར་འགྲེལ་བརྗོད་གནང་ཡོད་པ་བཅས།།