ཕྱི་ལོ་ ༢༠༢༠ ཟླ་ ༨ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༨ ཚེས་ ༢༨ ནས་ ༢༩ བར་ཉིན་གྲངས་གཉིས་རིང་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བ་རྒྱ་ནག་གི་རྒྱལ་ས་པེ་ཅིང་དུ་འཚོགས་སྐབས་རྒྱ་ནག་གི་སྲིད་འཛིན་ཞི་ཅིན་ཕིང་གིས། དུས་རབས་གསར་པའི་ནང་ཁ་བྲལ་བ་ལ་ངོ་རྒོལ་དང་སྤྱི་ཚོགས་བརྟན་ལྷིང་། མཐའ་སྲུང་སྲ་བརྟན་དང་མཐའ་མཚམས་ཀྱི་བདེ་འཇགས་འགན་ལེན་བཅས་བྱས་ནས་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ཧུར་ཐག་བྱེད་དགོས། བོད་བརྒྱུད་ནང་བསྟན་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཆམ་མཐུན་ཡོང་བ་བྱ་རྒྱུ་དང་། བོད་བརྒྱུད་ནང་བསྟན་དེ་རྒྱ་ནག་ཅན་དུ་འགྱུར་བར་སྐུལ་འདེད་གཏོང་དགོས་ཞེས་གཙོ་བོ་སྲིད་བྱུས་བཞིའི་ཐོག་ཁ་ཕྱོགས་བསྟན་ཡོད།
དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་ནག་གི་སྲིད་འཛིན་ཞི་ཅིན་ཕིང་གིས་བོད་བརྒྱུད་ནང་བསྟན་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་རྒྱ་ནག་ཅན་དུ་སྒྱུར་ཐབས་ཀྱིས་བོད་མིའི་ཆོས་དད་རང་དབང་དང་བླ་སྤྲུལ་ངོས་འཛིན་ལམ་ལུགས་ཐོག་དམ་བསྒྲགས་བྱེད་བཞིན་ཡོད་པས། རྒྱ་ནག་གཞུང་གིས་བོད་མི་ཚོར་བོད་ཀྱི་ཐུན་མོང་མ་ཡིན་པའི་ཆོས་དད་རང་དབང་ལོངས་སུ་སྤྱོད་འཇུག་དགོས། ཞེས་དང་།
བོད་མིར་མཚོན་ན་རྒྱ་ནག་དམར་ཤོག་ཚོགས་པ་ལས་བོད་བརྒྱུད་ནང་བསྟན་གལ་ཆེ་བ་ཡིན་ཞིང་། རྒྱ་ནག་གཞུང་གིས་བཙན་དབང་གིས་བོད་མི་ཚོར་བོད་བརྒྱུད་ནང་བསྟན་ལས་རྒྱ་ནག་དམར་ཤོག་ཚོགས་པ་གལ་ཆེན་པོར་བརྩིས་བཅུག་པ་ནི་རྒྱལ་སྤྱིའི་ཆོས་དད་རང་དབང་ལ་རྩིས་མེད་རྡོག་རོལ་བཏང་བ་ཙམ་མ་ཟད། མི་མང་ལམ་ལོག་ཏུ་འཁྲིད་བཞིན་ཡོད།
རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་ཐབས་བྱེད་བཞིན་ཡོད་པ་དེ་ནམ་ཡང་ལམ་ལྷོངས་ཡོང་གི་མ་རེད། རྒྱ་ནག་གཞུང་གིས་འདས་པའི་ལོ་ངོ་ ༦༠ ལྷག་གི་རིང་བོད་ས་ཡོངས་རྫོགས་རྒྱ་ནག་ཅན་དུ་བསྒྱུར་ཐབས་བྱས་ཡོད་ཀྱང་ལམ་ལྷོངས་བྱུང་མེད་པ་ལས་ར་འཕྲོད་བྱེད་ཐུབ། ཅེས་དང་།
རྒྱ་ནག་གཞུང་གིས་གསེར་རྟ་བླ་རུང་སྒར་དང་ཡ་ཆེན་ཆོས་སྒར་གཏོར་བཤིག་བཏང་སྟེ་བོད་བརྒྱུད་ནང་བསྟན་ལ་གོད་ཆགས་ཆེན་པོ་ཐེབས་ཡོད། རང་དབང་ཁང་པས་ལོ་ལྔ་བསྟུད་མར་བོད་ནི་འཛམ་གླིང་ནང་རང་དབང་ཆེས་ཚད་དམའ་ཤོས་ཨང་གཉིས་པ་རེད་ཅེས་སྙན་ཐོ་བཏོན་ཡོད། བོད་ནང་གི་བོད་མི་ཚོས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དད་པ་དམ་ཚིག་གཡོ་བ་མེད་པར་ཡིད་ཆེས་ཞུས་དང་ཞུ་བཞིན་ཡོད། བོད་ནང་ད་བར་བོད་མི་ ༡༥༤ ཙམ་གྱིས་རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་སྲེག་གནང་ཡོད་པ་དང་། བོད་མི་ཚོས་དེ་ནམ་ཡང་བརྗེད་ཀྱི་མ་རེད། བོད་ནང་བརྟན་ལྷིང་མི་ཡོང་བའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་བོད་ནང་དྲག་གནོན་ཅན་གྱི་སྲིད་བྱུས་ལག་བསྟར་བྱས་པ་ལ་བརྟེན་ནས་བྱུང་བ་ཡིན།
རྒྱ་ནག་གཞུང་གིས་མུ་མཐུད་མཁྲེགས་འཛིན་ཅན་གྱི་སྲིད་བྱུས་ལག་བསྟར་དང་དྲག་གནོན་བྱས་པ་ཡིན་ན། བོད་ཀྱི་གནད་དོན་སྡུག་ནས་སྡུག་ཏུ་འགྲོ་ངེས་རེད། བོད་ཀྱི་གནད་དོན་གསལ་བར་དབུ་མའི་ལམ་གྱི་སྲིད་བྱུས་ནི་དངོས་ཡོད་དང་མཐུན་པ་ཞིག་ཡིན། བོད་མི་ཚོས་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་རྩོད་ཀྱི་ཡོད། བོད་ཀྱི་གནད་དོན་གསལ་བར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། ཡང་ན་མགོན་པོ་གང་ཉིད་མཆོག་གི་སྐུ་ཚབ་ལྷན་དུ་བོད་རྒྱ་གྲོས་མོལ་བསྐྱར་གསོ་བྱེད་དགོས།
དེ་སྔ་རྒྱ་ནག་གི་གཙོ་འཛིན་མའོ་ཙེ་ཏུང་དང་ལས་རོགས་ཚོས་བོད་ནི་ལག་མཐིལ་ཡིན་ཞིང་། མཛུག་གུ་ལྔ་ནི་ལ་དྭགས་དང་། འབྲས་ལྗོངས། ཨ་རུ་ནཱ་ཅལ། བལ་ཡུལ། འབྲུག་བཅས་རེད། ཅེས་བརྗོད་ཡོད། མ་འོངས་པར་ཁོ་པ་ཚོས་ས་ཁུལ་དེ་དག་དབང་སྒྱུར་བྱ་རྒྱུའི་འཆར་གཞི་ཡོད་པ་མ་ཟད། ཧི་མ་ཅལ་དང་ཨུ་ཏྟར་ཁཎྜ་ཡང་དབང་སྒྱུར་བྱ་འཆར་ཡོད། རྒྱ་ནག་གཞུང་གིས་འདས་པའི་ལོ་ངོ་ ༦༠ རིང་ཡར་རྒྱས་དང་དེང་རབས་ཅན་ཟེར་ནས་བོད་མཐོ་སྒང་དེ་བཞིན་དམག་ས་ལྟ་བུར་བསྒྱུར་ཐབས་བྱེད་བཞིན་ཡོད། རྒྱ་ནག་གཞུང་གིས་བོད་ནང་རྒྱ་རིགས་དང་། དམག གོ་མཚོན་སོགས་དབོར་འདྲེན་བྱེད་ཀྱི་ཡོད། རྒྱ་ནག་གཞུང་གིས་བོད་མཐོ་སྒང་དམག་ས་ལྟ་བུར་བསྒྱུར་ཐབས་བྱེད་བཞིན་པ་དེས་བོད་མི་རྣམས་ཀྱིས་གཙོས་རྒྱ་གར་དང་ཨེ་ཤི་ཡའི་བདེ་འཇགས་བཅས་ལ་སེམས་འཚབ་བྱེད་དགོས་པ་ཆགས་ཡོད། ཨེ་ཤི་ཡ་ཞི་བདེ་ཡོང་བར་ཐབས་ལམ་གཅིག་པུ་ནི་བོད་དེ་ལོ་རྒྱུས་ཐོག་ཞི་བདེའི་ས་ཁུལ་ཡིན་པ་དེ་བསྐྱར་གསོ་བྱེད་དགོས། ཞེས་གསུངས།།
