ཕྱི་ལོ་ ༢༠༢༠ ཟླ་ ༨ ཚེས་ ༣༡ རེས་གཟའ་ཟླ་བ། 

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་འབངས་ཡོངས་ལ་མང་གཙོ་གསོལ་རས་སྩལ་ཏེ་ལོ་ངོ་ ༦༠ འཁོར་བའི་དུས་ཆེན་དང་བསྟུན། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་སྦེལ་ཇམ་སྐུ་ཚབ་དོན་གཅོད་ལས་ཁུངས་གཉིས་ཟུང་འབྲེལ་གྱིས་སྒྲིག་སྦྱོར་གནང་བའི་བརྙན་ཐུང་ངོས་ཀྱིས་ཡུ་རོབ་སྤྱི་མཐུན་ཚོགས་པའི་མཉམ་རུབ་ཀྱི་འདུ་ཤེས་ལ་ཡིད་སྨོན་བྱེད་ཀྱི་ཡོད། I admire the spirit of the European Union ཅེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་བཀའ་སློབ་འགོ་བརྗོད་གཞིར་བཞག་ཐོག་དུས་ཡུན་སྐར་མ་བཅུ་བདུན་ཅན་གྱི་བརྙན་ཐུང་ཞིག་ཕྱི་ལོ་ ༢༠༢༠ ཟླ་ ༩ ཚེས་ ༢ མང་གཙོའི་དུས་ཆེན་ཉིན་མོར་དབུ་འབྱེད་གནང་གཏན་འཁེལ་ཡོད། 

དེ་ཡང་བརྙན་ཐུང་དེའི་ནང་ཕྱི་ལོ་ ༡༩༨༨ ཟླ་ ༦ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕ་རན་སིའི་སི་ཏྲས་སི་བྷག་ཏུ་ཡོ་རོབ་གྲོས་ཚོགས་སུ་ལོ་རྒྱུས་རང་བཞིན་ལྡན་པའི་བོད་རྒྱ་ཞི་མོལ་གྱི་གྲོས་འཆར་གསལ་བསྒྲགས་བསྐྱངས་པའི་སྐབས་ནས་བཟུང་འདས་པའི་ལོ་ངོ་ ༣༠ ལྷག་གི་རིང་ཡུ་རོབ་སྤྱི་མཐུན་ཚོགས་པའི་སྐོར་བཀའ་སློབ་སྩལ་བ་དང་། ཡུ་རོབ་སྤྱི་མཐུན་ཚོགས་པ་ལྷན་དུ་བགྲོ་གླེང་གནང་བ། ཕྱི་ལོ་ ༢༠༡༦ བར་ཡུ་རོབ་གྲོས་ཚོགས་ནང་ཐེངས་བདུན་ཙམ་ཆིབས་སྒྱུར་བསྐྱངས་པ་སོགས་ཚུད་ཡོད།

འཛམ་གླིང་དམག་ཆེན་གཉིས་པ་རྗེས་ཡུ་རོབ་ཀྱི་རྒྱལ་ཁབ་ཁག་གཅིག་གིས་ཡུ་རོབ་སྤྱི་མཐུན་ཚོགས་པ་གསར་འཛུགས་གནང་བ་ནས་བཟུང་། ཡུ་རོབ་སྤྱི་མཐུན་ཚོགས་པས་ཡུ་རོབ་ནང་ཞི་བདེ་དང་། བདེ་སྐྱིད། སྤྱི་ཚོགས་བདེ་འཇགས་སོགས་ཡོང་སླད་ཞབས་འདེགས་རླབས་ཆེན་ཞུས་ཡོད་པ་མ་ཟད། ཡུ་རོབ་ཀྱི་མི་འབོར་ས་ཡ་ ༥༠༠ ལྷག་ལ་ཕན་ཐོགས་ཆེན་པོ་བསྒྲུབས་ཡོད། ཡུ་རོབ་གྲོས་ཚོགས་ནས་བོད་དོན་དང་ལྷག་པར་བོད་ནང་གི་འགྲོ་བ་མིའི་ཐོབ་ཐང་སོགས་ཀྱི་སྐོར་གླེང་སློང་ཆེན་པོ་གནང་ཡོད། དེ་བཞིན་ཡུ་རོབ་སྤྱི་མཐུན་ཚོགས་པས་ཀྱང་རྒྱ་ནག་གཞུང་དང་ལྷན་བོད་དོན་སྐོར་གླེང་སློང་ཤུགས་ཆེན་པོ་གནང་དང་གནང་བཞིན་ཡོད།

ཉེ་ཆར་ཡུ་རོབ་སྤྱི་མཐུན་ཚོགས་པ་དང་རྒྱ་ནག་གཉིས་དབར་ཆེས་མཐོའི་གྲོས་མོལ་ཚོགས་འདུ་འཚོགས་སྐབས་ཡུ་རོབ་སྤྱི་མཐུན་ཚོགས་པས་བོད་དོན་སྐོར་གླེང་སློང་གནང་ཡོད། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་ Tibet Interest Group དང་། སྦེལ་ཇམ་སྐུ་ཚབ་དོན་ཁང་གིས་ཡུ་རོབ་སྤྱི་མཐུན་ཚོགས་པའི་ནང་བོད་དོན་སྐོར་གང་ཐུབ་གླེང་སློང་གནང་ཡོད། །