ཕྱི་ལོ་ ༢༠༢༠ ཟླ་ ༨ ཚེས་ ༢༧ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༩ ཚེས་ ༢ ཉིན་བཙན་བྱོལ་བོད་མིའི་མང་གཙོ་དབུ་བརྙེས་ཏེ་མི་ལོ་ ༦༠ འཁོར་བཞིན་ཡོད་པ་དང་། ཕྱོགས་མཚུངས་དབུས་འོས་བསྡུ་ལས་ཁང་ནས་ཟླ་ཤས་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་ཀྱི་འོས་བསྡུ་ཆེན་མོའི་ལས་རིམ་སྤེལ་རྒྱུ་ཡིན་སྟབས། གོང་ཚེས་ཉིན་རྒྱ་གར་ནང་གི་དགོང་དྲོ་ཆུ་ཚོད་ ༧།༣༠ དང་ཨ་རི་ནང་གི་སྔ་དྲོ་ཆུ་ཚོད་ ༡༠ ཐོག་བྱང་ཨ་རིའི་སྐུ་ཚབ་དོན་ཁང་གི་གོ་སྒྲིག་འོག་དྲ་ལམ་བརྒྱུད་བཙན་བྱོལ་བོད་མིའི་མང་གཙོ་དབུ་བརྙེས་ནས་ལོ་ ༦༠ འཁོར་བའི་དུས་དྲན་སྲུང་བརྩི་དང་འབྲེལ་བགྲོ་གླེང་གི་ལས་རིམ་ཞིག་འཚོགས་གཏན་འཁེལ་ཡོད་པ་དང་། 

སྐབས་དེར་ཁེ་ན་ཌའི་ཨོན་ཊེ་རིའོ་ Ontario ས་གནས་གྲོས་ཚོགས་འཐུས་མི་བུ་ཁྲིད་དཀར་པོ་ཆེ་ལགས་དང་། ཨ་རི་ཐེབས་རྩའི་ཨེ་ཤི་ཡ་ཁུལ་གྱི་འཛིན་སྐྱོང་འགན་འཛིན་ལས་རོགས་ལྕམ་སྐུ་ཨན་མཱ་རི་ཡ་སི་ཏིས་ཧོཀ Ann Marie Yastishock ལགས།  ཨ་རིའི་མང་གཙོ་བསྟི་གནས་ཁང་ National Democratic Institute གི་ཚོགས་གཙོ་  Derek Mitchell ལགས།  དེ་བཞིན་དབུས་འོས་བསྡུའི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་མཆོག་བཅས་ནས་གསུང་བཤད་གནང་རྒྱུ་ཡིན་ཞིང་། 

དྲ་ཐོག་བགྲོ་གླེང་ཚོགས་འདུ་དེ་བཞིན་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་བརྙན་འཕྲིན་ཚན་པའི་ངོ་དེབ་བརྒྱུད་ཐད་སྲིང་གནང་རྒྱུ་རེད་འདུག་པ་བཅས། །