ཕྱི་ལོ་ ༢༠༢༠ ཟླ་ ༨ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༨ ཚེས་ ༡༧ ཉིན་ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་དམིགས་བསལ་འབྲེལ་ལམ་ལས་དོན་ཚོགས་ཆུང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་བོད་མིའི་སྒྲིག་འཛུགས་ཀྱི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་བོད་རྒྱ་གྲོས་མོལ་སླར་གསོ་ཡོང་བའི་གྲོས་འཆར་ལ་སྤྱི་མོས་ཐོག་རྒྱབ་སྐྱོར་གནང་འདུག
དེ་ཡང་ཕྱི་ལོ་ ༢༠༢༠ ཟླ་ ༨ ཚེས་ ༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བདེན་དཔང་གནང་བའི་སྐབས་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་གྷར་ནེ་ཊི་འཇི་ནི་སི་ Garnett Genuis མཆོག་གིས་གྲོས་འཆར་དེ་ངོ་སྤྲོད་གནང་ཡོད། སྤྱིར་གྲོས་འཆར་དེ་བཞིན་དེ་སྔ་ཁེ་ན་ཌ་དང་རྒྱ་ནག་དམིགས་བསལ་འབྲེལ་ལམ་ལས་དོན་ཚོགས་ཆུང་གིས་ཕར་འགྱངས་གནང་ཡོད་ནའང་། བྱང་ཨ་རིའི་སྐུ་ཚབ་དོན་ཁང་དང་། ཁེ་ན་ཌའི་བོད་དོན་རྒྱབ་སྐྱོར་ཚོགས་པ། བོད་རིགས་སྤྱི་མཐུན་ཚོགས་པ་སོགས་ཀྱིས་ཁེ་ན་ཌའི་ཆབ་སྲིད་ཚོགས་པ་ཡོངས་ལ་གྲོས་འཆར་དེར་རྒྱབ་སྐྱོར་གནང་དགོས་པའི་ཞུ་གཏུག་གི་ལས་འགུལ་རྒྱ་ཆེ་སྤེལ་བར་བརྟེན་ནས་བྱུང་བ་ཞིག་ཡིན་ཞིང་། ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་དམིགས་བསལ་འབྲེལ་ལམ་ལས་དོན་ཚོགས་ཆུང་གིས་སྤྱི་མོས་ཐོག་གྲོས་འཆར་གཏན་འབེབས་གནང་བ་དེ་བཞིན་འབྱུང་འགྱུར་ཕྱི་ཟླ་ ༩ ནང་ཁེ་ན་ཌའི་གྲོས་ཚོགས་འོག་མའི་ནང་ངོ་སྤྲོད་གནང་གཏན་འཁེལ་འདུག་པ་བཅས།།
