ཕྱི་ལོ་ ༢༠༢༠ ཟླ་ ༨ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་༢༠༢༠ ཟླ་ ༨ ཚེས་ ༢༠ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ཉི་ཤུ་རྩ་གཅིག་པ་དེ་སྤེལ་ཡོད།
དེ་ཡང་གསལ་བསྒྲགས་ཞུ་མཁན་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་དང་ཕྱི་ལུགས་སྨན་པ་བསྟན་འཛིན་རྣམ་གྲོན་ལགས། བོད་ལུགས་སྨན་པ་ཚེ་རིང་མཚམས་གཅོད་ལགས་བཅས་ཡིན།
དང་པོ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ནས་འཕྲོད་བསྟེན་ལས་ཁུངས་ཀྱི་ཚབ་ཞུས་ཏེ་ལམ་སྟོན་ཁག་ཅིག་ཞུ་རྒྱུར། ད་ཆ་སྒོ་རྒྱ་ཕྱེ་བའི་དུས་ཚོད་ཀྱི་རིམ་པའི་ནང་མི་མང་པོ་གཅིག་ལྷོད་གཡེང་རྣམ་གཡེང་གི་རྣམ་པ་ཞིག་མཐོང་གི་འདུག་པས་ད་ལྟའི་དུས་ཚོད་འདིར་རང་གཞན་ཚང་མ་ནད་ཡམས་འདི་ལས་སྲུང་སྐྱོབ་དང་ཁྱབ་གདལ་བཀག་འགོག་གི་དུས་ཚོད་ཤིག་ཆགས་ཀྱི་ཡོད་པས་ཚང་མས་འཕྲོད་བསྟེན་ཐོག་ལྷོད་གཡེང་མ་གནང་བར་ཁ་རས་གྱོན་ཡས་སོགས་སྔོན་འགོག་གི་ཐབས་ལམ་རྣམས་ངེས་པར་བསྟེན་དགོས་པ་ཡིན། དེ་ནས་འགོག་དབྱེ་ཟུར་འཇོག་ཁང་དང་འབྲེལ་འགོག་དབྱེ་ཟུར་འཇོག་ཁང་དུ་ཉུང་མཐར་ཉིན་གྲངས་ ༡༤ འདུག་དགོས་ཅིང་ཐོག་མའི་ཉིན་གྲངས་དྲུག་ཙམ་རྗེས་གཉན་སྲིན་ནད་འབུ་ཡོད་མེད་བརྟག་དཔྱད་བྱས་རྗེས་ནད་གཞི་མེད་པའི་གྲུབ་འབྲས་ཐོན་ཚེ་རང་ཁྱིམ་དུ་ལོག་གི་ཡོད་ཀྱང་ཉིན་གྲངས་ལྷག་མ་དེ་རང་ཁྱིམ་ནང་ཟུར་བཀག་ཐོག་བཞུགས་དགོས་ཀྱི་ཡོད་པ་ལམ་སྟོན་གནང་། ད་ཆ་ཕྱི་མི་འགྲུལ་བཞུད་བྱེད་མཁན་ཉུང་དུ་འགྲོ་བཞིན་འདུག་ཀྱང་མི་ཁག་ཅིག་གིས་སོ་སོ་བསྐྱོད་ཡུལ་ས་གནས་འགོ་འཛིན་ལ་འབྲེལ་བ་མ་གནང་བའི་ཐོག་ས་གནས་སུ་འཛུལ་ཡོང་གི་འདུག ཉེ་བའི་ཆར་རྡ་ས་ཁུལ་དུའང་དེ་འདྲའི་གནས་ཚུལ་གོ་རྒྱུ་འདུག ཅི་སྟེ་འགོག་དབྱེ་ཟུར་འཇོག་ཁང་དུ་མ་བཞུགས་པར་རང་ཁྱིམ་དུ་ཁུ་སེམ་མེར་ལོག་པའི་མི་གང་ཞིག་ལ་ནད་གཞི་ཡོད་མེད་བརྟག་དཔྱད་བྱས་རྗེས་ནད་གཞི་ཕོག་པ་ར་འཕྲོད་འབྱུང་ཚེ་དེར་རྒྱ་གར་གཞུང་ནས་དེ་སྔ་ཁྲིམས་གསལ་བསྒྲགས་གནང་བ་ལྟར་མི་དེས་མི་གཞན་ལ་ནད་གཞི་འགོ་བའི་ནག་ཉེས་ཏེ་མི་གཞན་གྱི་སྲོག་ལེན་པའི་ནག་ཉེས་ཀྱང་ཕོག་སྲིད་པས་དེ་འདྲའི་རིགས་ལ་བོད་མིའི་སྒྲིག་འཛུགས་དང་འཕྲོད་བསྟེན་ལས་ཁུངས་ནས་རྒྱབ་སྐྱོར་གང་ཡང་གནང་ཐབས་མེད་པ་དེ་ནན་ཏན་ཞུ་རྒྱུ་ཡིན་པས་ཚང་མས་དེའི་ཐོག་དགོངས་པ་བཞེས་དགོས། འགོག་དབྱེ་ཟུར་འཇོག་དང་འབྲེལ་འདི་ག་འཕྲོད་བསྟེན་ལས་ཁུངས་ནས་ཟུར་འཇོག་ཁང་དུ་བཞུགས་མཁན་རྣམས་ལ་ཁ་པར་ཐོག་འབྲེལ་བ་ཞུ་སྐབས་མི་རེ་གཉིས་ནས་སུན་སྣང་གནང་གི་འདུག སྒྲིག་འཛུགས་ནས་ཟུར་འཇོག་ཁང་དུ་བཞུགས་མཁན་རྣམས་ཀྱི་ལུས་པོ་དང་སེམས་ཁམས་འཕྲོད་བསྟེན་གནས་སྟངས་ཤེས་དགོས་གལ་ཆེ་བས་མང་ཚོགས་ནས་སྒྲིག་འཛུགས་ལ་རྒྱབ་སྐྱོར་གནང་དགོས་གལ་ཆེ་བས་ཚང་མས་དེ་ལྟར་གནང་དགོས་པ་གསུངས། དེ་ནས་ཡང་འཕྲོད་བསྟེན་དང་འབྲེལ་མང་ཚོགས་ལ་དྲ་ལམ་བརྒྱུད་སློབ་གསོ་ལམ་སྟོན་གནང་མཁན་དེ་འདྲ་འདུག སྤྱིར་འཕྲོད་བསྟེན་ཆེད་ལས་པའི་རྒྱབ་ལྗོངས་ཡོད་ན་ལས་དེ་མིན་སྤྱི་ཚོགས་དྲ་བའི་ནང་མི་ཁག་ཅིག་གིས་སེམས་ཚབ་དང་སེམས་པ་ཆུང་ངུས་སློབ་གསོ་ལམ་སྟོན་གནང་མཁན་འདུག་པ་དེ་ཚོ་ཡིན་ན་ Social Media Fake news ཞེས་གཞུང་ནས་ཉེས་པ་ཕོག་མ་སྲིད་པ་མིན། རྩ་བའི་སོ་སོའི་ངོས་ནས་གཞན་ལ་ཕན་སེམས་བཅངས་ཀྱང་གནང་སྟངས་མ་ཤེས་ཚེ་རང་ཉིད་ལ་ཁྲིམས་ཀྱིས་ཉེས་པ་ཕོག་ཅིང་སོ་སོ་དང་ནང་མི་བུ་ཕྲུག་ལ་དཀའ་ངལ་འཕྲད་སྲིད་པས་ཚང་མས་ཡིད་གཟབ་གནང་རྒྱུ་ཤིན་ཏུ་གལ་ཆེ། དེ་ནས་འཕྲོད་བསྟེན་ལས་ཁུངས་ནས་བདུན་རེའི་རེས་གཟའ་ལྷག་པ་འཆར་ཅན་ས་གནས་འགོ་འཛིན་ལྷན་དྲ་ཐོག་ཚོགས་འདུ་འཚོག་བཞིན་ཡོད་པས་ས་གནས་ནས་དེ་གར་གསོ་བ་རིག་པའི་ལུས་སེམས་ནུས་གསོའི་སྨན་མི་མང་ལ་བགོས་འགྲེམས་བྱེད་བཞིན་ཡོད་པ་དེ་མང་ཚོགས་ལ་སྔོན་འགོག་ཆེད་ཕན་ཐོགས་ཆེན་པོ་འདུག་པ་གསུངས་ཀྱི་འདུག འོན་ཀྱང་བོད་མི་རེ་གཉིས་ནས་གསོལ་སྨན་ཆ་ཚང་མ་མཆོད་པར་འཕྲོ་རླག་གཏོང་གི་ཡོད་པའི་གནས་ཚུལ་གོ་ཐོས་ཡོང་གི་འདུག་ན་བོད་ཀྱི་སྨན་རྩིས་ཁང་ནས་ད་ལྟ་དབྱར་ཆར་དུས་ལ་མ་ལྟོས་པར་སྨན་བསྟུད་མར་བཟོ་བསྐྲུན་བྱེད་བཞིན་ཡོད་པས་མང་ཚོགས་ནས་གསོ་རིག་ལུས་སེམས་ནུས་གསོའི་སྨན་དེ་ཆ་ཚང་མཆོད་དགོས་པའི་རེ་སྐུལ་ཞུས་གནང་། མཐའ་དོན་ད་ལྟའི་ཆར་དུས་སུ་ནད་རིགས་གཞན་ Typhoid, Dengue སོགས་ཉེན་ཁ་ཡོད་པས་ཚང་མས་སྔོན་འགོག་གི་ཐབས་ལམ་རྣམས་ངེས་པར་བསྟེན་དགོས་པའི་ལམ་སྟོན་གནང་།
དེ་རྗེས་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ནས་བཙན་བྱོལ་བོད་མིའི་སྤྱི་ཚོགས་ཁྲོད་གནས་སྟངས་ཇི་ཆགས་ཐད་ངོ་སྤྲོད་གནང་དོན། འདས་པའི་བདུན་ཕྲག་ཅིག་གི་ནང་རྒྱ་གར་ནང་གི་བོད་མིའི་གཞིས་ཆགས་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་༦ བྱུང་ཡོད། དེ་ཡང་ལ་དྭགས་ཁུལ་ནས་༡ ༼བུད་མེད་རང་ལོ་༣༠༽ཁོང་མོར་དམིགས་བསལ་ནད་རྟགས་གང་ཡང་མེད་ལ་ད་ཆ་རང་ཁྱིམ་དུ་ཟུར་བཀག་ཐོག་གནས་མུས། དེ་ནས་མོན་གྷོ་འདོད་རྒུ་གླིང་གཞིས་ཆགས་ནས་མི་༣ ༼བུད་མེད་རང་ལོ་༦༧ སྐྱེས་པ་རང་ལོ་༣༢ རང་ལོ་༤༡ བཅས་༽ བྱུང་འདུག་པ་ལས་སྐྱེས་མ་རང་ལོ་༦༧ སོན་པ་དེ་རྒྱུན་དུ་ཁྲག་ཤེད་ནད་གཞི་ཡོད་པས་སྨན་ཁང་དུ་བརྟག་དཔྱད་ཕྱིན་སྐབས་ཛ་དྲག་སྨན་བཅོས་བྱེད་དགོས་བྱུང་། དེ་རྗེས་སྨན་ཁང་ནང་གཉན་རིམས་འདི་འགོས་འདུག་མིན་བརྟག་དཔྱད་བྱས་པ་ལས་གཉན་སྲིན་ཡོད་པ་ཐོན་ནས་ཉིན་ཤས་རྗེས་འདས་གྲོངས་སུ་གྱུར་ཡོད། དེ་ནས་སྐྱེས་པ་རང་ལོ་༤༡ ལ་བླ་གཉན་ནད་གཞི་ལས་གཞན་པའི་གཉན་རིམས་འདིའི་ནད་རྟགས་གང་ཡང་མེད་པ་དང་། སྐྱེས་པ་རང་ལོ་༣༢ སོན་པ་ཁོང་འགྲུལ་བཞུད་བྱས་པ་ལས་ནད་འགོས་པས་དམིགས་བསལ་ནད་རྟགས་གང་ཡང་མེད་ཅིང་ཁོང་གཉིས་ཀ་ད་ཆ་མོན་གྷོ་གཞུང་གི་ཀོ་ཝིཌ་སྨན་ཁང་ནང་གསོ་བཅོས་བྱེད་བཞིན་ཡོད། དེ་ནས་ལྡི་ལི་ཁུལ་ནས་མི་གྲངས་༢ ༼བུད་མེད་རང་ལོ་༣༥ སྐྱེས་པ་རང་ལོ་༣༤༽ བུད་མེད་རང་ལོ་༣༤ སོན་པར་ནད་རྟགས་ཅུང་མངོན་པ་ལས་སྐྱེས་པ་རང་ལོ་༣༤ བྱེད་པ་ཁོང་ལ་དམིགས་བསལ་ནད་རྟགས་མེད། ཁོང་གཉིས་ཀ་ད་ཆ་ཚོགས་སྡེའི་ཟུར་འཇོག་ཁང་ནང་ཟུར་བཀག་ཐོག་གནས་བཞིན་ཡོད་པ་བཅས་ད་བར་ཁྱོན་རྒྱ་གར་དང་བལ་ཡུལ་ནང་བོད་མི་གྲངས་༩༤ ལ་ནད་གཞི་ཕོག་པ་ར་ཕྲོད་བྱུང་ཞིང་མི་གྲངས་ ༣ ཚེ་འདས་སོང་ཡོད་པ་དང་། མི་གྲངས་ ༦༨ དྲག་སྐྱེད་བྱུང་ཡོད་པ་དང་། ད་ཆ་མི་གྲངས་༢༣ ནད་མནར་བཞིན་པའི་གནས་སྟངས་ངོ་སྤྲོད་གནང་།
ནད་གཞི་ཕོག་པའི་མི་རྣམས་ལ་ས་གནས་འཕྲོད་བསྟེན་ཚོགས་ཆུང་ནས་གསོ་རིག་གསོ་བཅོས་སྨན་ཕུལ་ཡས་དང་དེ་བཞིན་འདི་ག་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཆེད་ལས་པའི་ངོས་ནས་གནས་སྟངས་བརྒྱུད་ལོན་དང་སློབ་གསོ་ལམ་སྟོན་རིགས་གནང་ཐུབ་པ་བྱུང་།
འདས་པའི་བདུན་ཕྲག་ཅིག་གི་ནང་དབུས་དང་ས་གནས་ཀྱི་ལས་དོན་ཚོགས་ཆུང་གི་གྲུབ་ཐོན་ཞུ་རྒྱུར། དང་པོ་འགོག་དབྱེ་ཟུར་འཇོག་དང་འབྲེལ་འཕྲོད་བསྟེན་ལས་ཁུངས་ཀྱི་གྲངས་ཐོ་ཚན་པའི་སྡེ་ཚན་ནས་གནས་ཚུལ་བསྡུས་ལེན་བྱུང་བ་གཞིར་བཟུང་བདུན་ཕྲག་འདིའི་ནང་རྒྱ་གར་ནང་ས་གནས་གྲངས་༢༩ དང་བལ་ཡུལ་ནང་ས་གནས་གྲངས་༦ བཅས་ནང་ཁྱོན་བོད་མི་གྲངས་༤༩༣ ཏེ་མི་གྲངས་༢༥༣ རང་ཁྱིམ་དུ་ཟུར་བཀག་ངང་གནས་བཞིན་ཡོད་པ་དང་མི་གྲངས་༢༤༠ བོད་མིའི་སྒྲིག་འཛུགས་ནས་མཐུན་རྐྱེན་སྦྱར་བའི་ཟུར་འཇོག་ཁང་ནང་གནས་བཞིན་ཡོད། དེའི་ནང་ནས་རྡ་ས་ཁུལ་དུ་མི་གྲངས་༥༩ འགོག་དབྱེ་ཟུར་བཀག་ཏུ་བཞུགས་བཞིན་པའི་གནས་སྟངས་ཞུ།
དབུས་དང་ས་གནས་སུ་ནད་རྟགས་ཡོད་མེད་བརྟག་ཞིབ་གནང་ཐད་རྡ་ས་ཁུལ་དུ་ས་གནས་འགོ་འཛིན་དང་། དེ་བཞིན་བོད་མིའི་སྒྲིག་འཛུགས་གཙོས་ཚོགས་སྡེ་སོ་སོས་འགན་འཁུར་བའི་ཐོག་བདུན་ཕྲག་འདིའི་ནང་མི་གྲངས་༢༤༣༤ ༼སྒྲིག་འཛུགས་ལས་བྱེད་གྲངས་༥༢༤ རྡ་ས་ས་གནས་འགོ་འཛིན་ནས་མི་གྲངས་༤༧༡ གནས་ཆུང་གྲ་ཚང་།༨༠ དགའ་གདོང་གྲ་ཚང་།༡༦ བོད་ཀྱི་དཔེ་མཛོད་ཁང་། ༤༧ བོད་ཀྱི་སྨན་རྩིས་ཁང་།༨༠༥ གངས་སྐྱིད་ཁུང་ལོ་ན་བགྲེས་པ་སོགས་ཉེན་ཚབས་ཆེ་བའི་མི་གྲངས་༧༣ གངས་སྐྱིད་རྒྱལ་སྒོ་ནས་ནང་འཛུལ་ཕྱི་མི་གྲངས་༤༡༨༽ ལ་ནད་རྟགས་ཡོད་མེད་ཚོགས་སྡེ་སོ་སོས་འགན་འཁུར་གནང་བའི་ཐོག་བརྟག་ཞིབ་གནང་ཡོད་ལ་དེའི་ནང་དམིགས་བསལ་ནད་རྟགས་ཐོན་པ་སུའང་བྱུང་མེད། གཞན་ཡང་རྒྱ་གར་ནང་གི་བོད་མིའི་གཞིས་ཆགས་ས་གནས་གྲངས་༣༤ དང་བལ་ཡུལ་ནང་ས་གནས་གྲངས་༢ བཅས་ནང་ཁྱོན་མི་གྲངས་༧༢༧༢ ལ་ (ལོ་ན་༦༠ ཡན་མི་གྲངས་ – ༥༧༣༧ ཉེན་ཚབས་ཆེ་བ་མི་གྲངས་ – ༡༥༣༥) ཞལ་པར་བརྒྱུད་ནད་རྟགས་ཡོད་མེད་བརྟག་དཔྱད་གནང་ཐུབ་པ་བྱུང་ཡོད། གཞན་ཡང་ས་གནས་ཁག་ལ་ནད་ཡམས་ཁྱབ་གདལ་སྔོན་འགོག་ཆེད་ལས་དོན་སྤེལ་བའི་ཁོངས་སུ། ས་གནས་ཕལ་མོ་ཆེར་བདུན་ཕྲག་རེའི་ནང་གཞིས་ཆགས་ཕྱི་ནང་དང་མི་མང་འདུ་འཛོམས་ཆེ་སར་དུག་སེལ་མུ་མཐུད་གནང་བཞིན་ཡོད་པ་དང་། ཡང་བདུན་ཕྲག་འདིའི་ནང་རྡ་ས་ཁུལ་དུ་ཕྱི་མི་འབྱོར་བ་འགོག་དབྱེ་ཟུར་འཇོག་ཁང་དུ་བཞུགས་མཁན་༢༨ ལ་གཉན་སྲིན་ནད་འབུ་ཡོད་མེད་བརྟག་དཔྱད་བྱས་ཡོད།
དེ་སྔ་ཕྱི་ཟླ་༣ པའི་ཟླ་མཇུག་ནས་འགོ་འཛུགས་ཀྱིས་ད་བར་གསོ་རིག་ལུས་སེམས་ནུས་གསོའི་གསོལ་སྨན་གྲངས་༡༥༡༤༤ ༼འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༡༣༨༦ ལོ་ན་༦༥ ཡན་བོད་མི་གྲངས་༩༤༧༦ སྨན་ཞབས་སོགས་མདུན་ལ་ཕྱག་ལས་གནང་མཁན་མི་གྲངས་༧༨༨ བླ་གཉན་ནད་གཞི་ཡོད་པ་མི་གྲངས་༡༢༠༡ དང་ཕྱི་རྒྱལ་ཁག་ལ་གསོལ་སྨན་གྲངས་༢༢༩༣ ༽ རིན་མེད་བགོ་འགྲེམས་ཐུབ་པ་བྱུང་ཡོད།
དེ་བཞིན་སེམས་ཁམས་འཕྲོད་བསྟེན་དང་འབྲེལ་བོད་མིའི་གཞིས་ཆགས་གྲངས་༢༢ ནང་འགོག་དབྱེ་ཟུར་འཇོག་ཏུ་བཞུགས་མཁན་མི་གྲངས་༢༠༤ ལ་ཞལ་པར་ཐོག་འབྲེལ་བ་གནང་ནས་གནས་སྟངས་རྒྱུད་ལོན་དང་སློབ་གསོ་ལམ་སྟོན་གནང་ཡོད་པ་དང་དེ་བཞིན་ནད་གཞི་ཕོག་པའི་མི་གྲངས་དྲུག་པོར་ཁ་པར་བརྒྱུད་འབྲེལ་བ་གནང་ཐུབ་པ་བྱུང་ཡོད།
གསུམ་པ། མི་མང་ལ་ཐུགས་སྣང་ལམ་སྟོན་ཚུལ་དུ་ཞུ་རྒྱུར།
གཞི་རྩའི་འཛམ་གླིང་ཁྱོན་ཡོངས་ལ་མི་ས་ཡ་༢༡ ལྷག་ལ་ནད་གཞི་ཕོག་ཡོད་པ་དང་མི་གྲངས་འབུམ་༧ ལྷག་ནད་གཞི་འདིིའི་རྐྱེན་པས་འདས་གྲོངས་སུ་ཕྱིན་ཡོད་པ་དང་ཉིན་རེར་མི་འབུམ་༢ ལྷག་ལ་ནད་གཞི་ཕོག་པའི་གནས་ཚུལ་ཐོན་གྱི་ཡོད། རྒྱ་གར་ནང་ཆ་བཞག་ན་འཛམ་གླིང་ཡུལ་རྒྱལ་ཁབ་ནང་ད་ཆ་ཏོག་དབྱིབས་གཉན་རིམས་༡༩ ཕོག་མཁན་གྲངས་མཐོ་ཤོས་གསུམ་པ་དེ་ཆགས་ཀྱི་ཡོད། ཨ་རིར་མི་འབུམ་༥༣ དང་བཱ་རཱ་སིལ་ནང་མི་གྲངས་འབུམ་༣༣ ལྷག་དང་གསུམ་པ་རྒྱ་གར་ནང་ད་ཆ་མི་གྲངས་འབུམ་༢༧ ལྷག་ལ་ནད་གཞི་འདི་ཕོག་ཡོད། དེའི་ནང་ནས་མི་གྲངས་ཁྲི་ལྔ་ལྷག་ཏེ་བརྒྱ་ཆ་༡།༩༡ ཙམ་རྐྱེན་འདས་སུ་ཕྱིན་ཡོད་པ་དང་མི་གྲངས་འབུམ་༢༠ ལྷག་ཏེ་བརྒྱ་ཆ་༧༣།༦༤ ཙམ་དྲག་སྐྱེད་ཕྱིན་ཡོད་པ་དང་ད་ཆ་ནད་མནར་བཞིན་པའི་མི་གྲངས་འབུམ་༦ ལྷག་ཟིན་ཡོད། རྒྱ་གར་ནང་ད་བར་མི་གྲངས་ས་ཡ་༣༡ ལ་ནད་གཞི་ཕོག་ཡོད་མེད་བརྟག་དཔྱད་བྱས་ཡོད་པ་དང་ཉིན་མ་གཅིག་ནང་མི་འབུམ་༨ ལྷག་ལ་བརྟག་དཔྱད་བྱེད་མུས་རེད་འདུག
དེ་ནས་མི་མང་ལ་སློབ་གསོ་ལམ་སྟོན་ཚུལ་དུ། བོད་ཀྱི་གསོ་བ་རིག་པའི་གཞུང་ལས་ནད་ཡམས་ཁྱབ་གདལ་གྱི་དུས་ཚོད་ལ་རང་ཉིད་ངོས་ནས་བསྲུང་བ་བྱེད་པའི་ཐབས་ལམ་སྣ་ཚོགས་བསྟེན་པའི་ནང་སྤྱོད་ལམ་གྱི་སྒོ་ནས་མི་མང་འདུ་འཛོམས་དང་། མེ་དང་ཉི་མ། བསེར་བུའི་རླུང། ཉིན་མོའི་གཉིད་བཅས་སྤོང་དགོས་པ། དེ་བཞིན་གནས་ཁང་ཕྱག་བདར་བྱེད་ཅིང་སྤོས་དང་བསང་བདུག་བྱེད་པ། གནས་དབེན་པ་བསྟེན་པ། ལུང་པའི་མདའ་སྒོ་སྲུང་བ་དང་། གྲོང་འཁྱེར་འདྲེས་ཐག་བཅད་པ། ཁ་སྣ་མིག་བཅས་མཇུག་སྒོ་གསུམ་བགག་པ་བཅས་ཀྱི་ཐབས་ལམ་བསྟེན་དགོས། ཟས་ཀྱི་སྲུང་བར་ཁམས་དང་མི་འཕྲོད་པའི་ཟས་རིགས། ཁ་ཟས་མ་འཚོས་འཚིག་དང་རྗེན་པ། རྙིང་རུལ་སོང་བ། དཀར་དམར་མངར་སྐྱུར་དང་འཁྱག་ཆུ་སོགས་སྤོང་དགོས་ཅིང་། ལུས་ཀྱི་ནད་འགོག་མ་ལག་གི་ནུས་པ་གསོ་བའི་ཁ་ཟས་ཡང་ཞིང་འཇུ་སླ་བའི་བཅུད་ལྡན་གྱི་ཟས་རིགས་རྣམས་བསྟེན་དགོས། རྫས་དང་སྔགས་ཀྱི་སྲུང་བ་ནི་སྔགས་འབུམ་རྡོ་རྗེ་གོ་ཁྲབ་དང་། དྲག་པོ་གསུམ་སྒྲིལ། ལྷ་མོ་ལོ་གྱོན་མའི་གཟུངས་སྔགས། རྗེ་བཙུན་སྒྲོལ་མའི་གཟུངས་སྔགས་འདོན་རྒྱུ་དང་། མགུལ་ལ་གཉན་རིམས་སྲུང་འཁོར་དང་། ཡང་ནག་པོ་དགུ་སྦྱོར་རྣམས་འདོག་དགོས་པ། དེ་བཞིན་རིམས་འགོག་བདུད་རྩི་ཐིགས་པ་སྣ་སྒོར་བྱུག་དགོས་པ། དེ་ནས་ཁོང་སྨན་གྱིས་བསྲུང་བའི་ནང་རྒྱུན་དུ་སྔ་དྲོ་ལྟོ་སྟོང་མ་ཎི་རིལ་བུ་དང་བདུད་རྩི་ཆོས་སྨན་བསྟེན་པ་དང་། གཞན་དུ་འཕྲུལ་ཐང་དང་གཉན་ཐང་༡༥ སོགས་སྨན་ཐང་དང་། རིན་ཆེན་མང་སྦྱོར་སོགས་རིན་ཆེན་རིལ་བུའི་རིགས། དེ་བཞིན་ཁྱུང་ལྔ་སོགས་ཁོང་སྨན་རྣམས་ས་གནས་སུ་གསོ་བ་རིག་པའི་སྨན་པ་དང་ཡང་ན་སོ་སོའི་ངོ་ཤེས་སྨན་པ་རྣམས་ལས་ལམ་སྟོན་ཞུས་པའི་ཐོག་བསྟེན་རྒྱུ་གལ་ཆེ། མི་ཁག་ཅིག་ལ་འཕྲུལ་ཐང་མང་པོ་བསྟེན་པས་དེས་གྲང་བའི་ནད་གཞི་ལ་ཕོག་པའི་གནས་ཚུལ་བྱུང་ཡོད་ན་མི་སོ་སོའི་ཁམས་དང་རང་བཞིན། དེ་བཞིན་སོ་སོར་གཅོང་ནད་སོགས་ཡོད་ཚེ་སྨན་དང་ནད་ཀྱི་ཚ་གྲང་ངོ་བོ་མ་མཐུན་པར་ཟུར་ཕོག་ཡོང་སྲིད་པས་ངེས་པར་ཁོང་སྨན་མ་བསྟེན་གོང་སྨན་པར་ལམ་སྟོན་ཞུ་དགོས་གལ་ཆེ་ཡིན་པ་གསུངས།
དེ་ནས་ཕྱི་ལུགས་ཀྱི་སྨན་པ་བསྟན་འཛིན་རྣམ་གྲོན་ལགས་ནས་ལམ་སྟོན་གནང་གསལ། ནད་ཡམས་ཁྱབ་གདལ་བཀག་འགོག་ཆེད་ཁ་རས་གྱོན་ཡས་སོགས་སྒྲིག་འཛུགས་དང་གཞུང་ནས་ལམ་སྟོན་གནང་བཞིན་ཡོད་ཀྱང་དེ་ལག་བསྟར་གནང་མཁན་དེ་མི་མང་ཆགས་ཀྱི་ཡོད་རེད། དེ་ཡིན་དུས་ལམ་སྟོན་རྣམས་ངེས་པར་ལག་བསྟར་གནང་དགོས་པའི་རེ་སྐུལ་ཞུས་པ་དང་། དོན་ཚན་གཉིས་པ་ནི་དེང་སང་གཞོན་སྐྱེས་མང་པོས་ན་ཚ་དེ་མི་གཞོན་པར་ན་ཡི་མེད་པ་དང་ན་ནའང་དྲག་སྐྱེད་འགྲོ་ངེས་ཡིན་པའི་བསམ་ཚུལ་ཡོད་འདུག་ཀྱང་འཛམ་གླིང་འཕྲོད་བསྟེན་ལྷན་ཚོགས་ནས་ནད་གཞི་འདི་གཞོན་སྐྱེས་མང་པོར་ཕོག་གི་ཡོད་པ་དང་། ཁག་ཅིག་ལ་ཛ་དྲག་ཆགས་ནས་ཚེ་སྲོག་ཕྱིན་པ་ཡང་ཡོད། དེ་ཡིན་དུས་སྣང་ཆུང་རྣམ་གཡེང་དུ་མ་ཤོར་བར་གཟབ་གཟབ་དང་འགན་འཁུར་གནང་དགོས་ཤིན་ཏུ་གལ་ཆེ། ཉེ་བའི་ཆར་རྒྱ་གར་ཧི་མཱ་ཅལ་མངའ་སྡེའི་གྲོང་གསེབ་ཤིག་ནང་མི་གཅིག་ལ་ནད་གཞི་ཕོག་པ་དེས་མི་གཞན་༣༤ ལ་ནད་བགོས་ཁྱབ་བྱུང་བ་དེ་འདྲ་བྱུང་ཡོད་དུས་ང་ཚོས་རང་ཉིད་གཅིག་པུ་མིན་པ་གཞན་རྒས་འཁོགས་དང་བྱིས་པ་བཅས་ཉེན་ཚབས་ཆེ་བ་ཚང་མར་དགོངས་བཞེས་ཀྱིས་འགན་འཁུར་གནང་དགོས་པ་གསུངས། མཐའ་དོན་ད་ཆ་ནད་ཡམས་འདིའི་རྐྱེན་གྱིས་མི་མང་པོའི་རྣམ་རྒྱུན་གྱི་བྱེད་སྒོ་དང་། དེ་བཞིན་ཚོང་སྒོ་རྒྱབ་པ་དང་། འཚོ་བའི་རྟེན་ལས་ཀ་ཤོར་བ་སོགས་བྱུང་ཡོད་ཅིང་ལྷག་པར་ཉིན་རེ་ནས་ནད་པའི་གྲངས་འཕར་འགྲོ་བའི་གནས་སྟངས་འདིར་མིའི་སེམས་ནང་དངང་སྐྲག་དང་སེམས་འཁྲལ་བསྣོན་འཕར་ཞིག་ཡོང་གི་ཡོད་པ་དང་། ཡང་སློབ་ཕྲུག་སོགས་གཞོན་སྐྱེས་མང་པོར་ནང་དུ་འཛུལ་ནས་ཉོབ་སྣང་དང་ཁོང་ཁྲོ་བྱུང་བཞིིན་ཡོད་པས་ད་ལྟའི་ནད་ཡམས་ཁྱབ་གདལ་གྱི་ཛ་དྲག་དུས་ཚོད་འདིར་ང་ཚོའི་ངོས་ནས་བསམ་བློ་རྒྱ་ཆེ་ས་དང་གནས་སྟངས་བཟང་ཕྱོགས་ལ་བསྒྱུར་བ་འགྲོ་རྒྱུའི་བསམ་བློ་གཏོང་དགོས་ཤིན་ཏུ་གལ་ཆེ། ཡང་དེང་སང་གསར་འགྱུར་དང་སྐད་འཕྲིན་དྲ་བ་སོགས་མང་པོར་གནས་ཚུལ་འདྲ་མིན་སྤེལ་བཞིན་འདུག་པས་ཚང་མ་གསན་གཟིགས་གནང་ན་དངངས་སྐྲག་སྐྱེ་རྒྱུ་ཡིན་པས་ཁུངས་ལྡན་གྱི་གནས་ཚུལ་གསན་གཟིགས་གནང་གལ་ཆེ། ཡང་སྔོན་འགོག་ཚུལ་དུ་ཟས་བཅུད་ལྡན་དང་། གཉིད་དུས་ཐོག སྔ་དགོང་དབུགས་སྦྱོང་དང་ལུས་སྦྱོང་རྩེད་རྒྱུ། སེམས་ལྷོད་ལྷོད་གནང་རྒྱུ་ཤིན་ཏུ་གལ་ཆེ་བས་མང་ཚོགས་ནས་དེ་ལྟར་གནང་སྐྱོང་ཡོང་བའི་རེ་སྐུལ་ཞུས་པ་དང་སྦྲགས་ལས་དོན་ཚོགས་ཆུང་གི་གསལ་བསྒྲགས་ཐེངས་༢༡ དེ་མཇུག་སྒྲིལ་གནང་ཡོད།།
