ཕྱི་ལོ་ ༢༠༢༠ ཟླ་ ༨ ཚེས་ ༢༡ རེས་གཟའ་པ་སངས།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། འབྲུག་ཁུལ་གནས་སྡོད་བོད་རིགས་མང་ཚོགས་ནས་ཞལ་འདེབས་བསྡུ་རུབ་དང་འབྲུག་སྡོད་བོད་མིའི་ལྟ་རྟོག་འགན་ཁུར་དང་ས་གནས་གཞིས་སྒར་འཐུས་མི་བཅས་ནས་རྒྱལ་པོའི་གཟིམ་དཔོན་ཡིག་ཚང་དུ་ངོ་བཅར་གྱིས་ཏོག་དབྱིབས་གཉན་རིམས་སྔོན་འགོག་ལས་དོན་ལ་རྒྱབ་སྐྱོར་མཚོན་ཆེད་ཞལ་འདེབས་དངུལ་ཀྲམ་ ༦༦༤,༢༥༨ ཕུལ་ཐུབ་པ་བྱུང་ཡོད།
བོད་མིའི་སྒྲིག་འཛུགས་ནང་སྲིད་ལས་ཁུངས་དང་། འཕྲོད་བསྟེན་ལས་ཁུངས་བཅས་ནས་ཏོག་དབྱིབས་གཉན་རིམས་སྔོན་འགོག་གི་ལམ་སྟོན་བཀའ་ཡིག་ཇི་ཕེབས་ཁག་གཞིས་སྒར་སོ་སོའི་འཐུས་མི་བརྒྱུད་གསལ་བསྒྲགས་ཞུ་དང་ཞུས་མུས་ཡིན། ཇཱ་གྷང་འུ་སྨན་རྩིས་ཁང་བརྒྱུད་འབྲུག་ཁུལ་གནས་སྡོད་བོད་རིགས་ཆེད་རིན་ཆེན་རིལ་སྲུང་ ༢,༥༠༠ གནང་སོན་བྱུང་བ་ནས་ ༢,༡༠༠ མང་ཚོགས་ལ་རིན་མེད་ཐོག་བགོས་འགྲེམས་ཞུས་ཡོད། གཞན་ཡང་བགྲེས་སོང་རང་ལོ་ ༦༥ ཡན་སོན་པ་མི་གྲངས་ ༡༧༡ དང་འགོག་དབྱེ་ཟུར་བཀག་ནང་ཡོད་མི་གྲངས་ ༢༠ བཅས་ལ་ལུས་སེམས་གསོ་བྱེད་ཀྱི་གསོལ་སྨན་ཕུལ་ཐུབ་པ་བྱུང་ཡོད།
དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཏོག་དབྱིབས་ནད་ཡམས་རྐྱེན་པས་ཁ་ཐོར་མི་མང་ཁྲོད་ནས་ལས་ཀ་མེད་པ་དང་ཁང་གླ་དཀའ་ངལ་ཡོད་རིགས་ལ་ད་རེས་ཐེངས་གཅིག་རིང་ངལ་སེལ་གུན་སྐྱོབས་གནང་རྒྱུ་ལས་གཞིའི་ཁོངས་ཁྱབ་ཁོངས་ཁྱིམ་ཚང་གྲངས་ ༢༡ ལ་ས་གནས་ནས་རྒྱབ་གཉེར་ཞུས་དོན་བཞིན་རོགས་དངུལ་ ༥,༠༠༠ རེར་བསྡོམས་སྒོར་ ༡༠༥,༠༠༠ གནང་སོན་བཞིན་མཐུན་རྐྱེན་ཐོབ་མི་རྣམས་ལ་ཁུངས་འགྲེམས་ཞུས་ཡོད། དེ་བཞིན་ནང་སྲིད་དང་ཤེས་རིག་ཁོངས་ཡོད་པའི་ཉམ་ཐག་རྒས་འཁོགས་དང་སློབ་ཕྲུག་རྣམས་ལ་འཚོ་སྣོན་དུས་ཐོག་ཕུལ་ཐུབ་པར་ཕན་ཐོགས་ཆེན་པོ་བྱུང་ཡོད།
འབྲུག་ཁུལ་གནས་སྡོད་དཀའ་ངལ་ཅན་གྱི་མི་གྲངས་གཉིས་ལ་སྒོར་ ༢༥༠༠ འབབ་ཀྱི་སྐམ་ཟས་མཐུན་འགྱུར་ཞུས་ཡོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བྱིན་རླབས་དང་། གནས་ཡུལ་རྒྱལ་ཁབ་ཀྱི་ལམ་སྟོན། དེ་བཞིན་དབུས་བོད་མིའི་སྒྲིག་འཛུགས་ཀྱི་བཀོད་ཁྱབ་མཐུན་འགྱུར། མང་ཚོགས་ནས་སྔོན་འགོག་ལམ་སྟོན་ལག་བསྟར་ཚུལ་བཞིན་གནང་བ་བཅས་ལ་བརྟེན་ནས་ད་བར་འབྲུག་ཁུལ་བོད་མིའི་གཞིས་སྒར་ཁག་ནང་ཏོག་དབྱིབས་གཉན་རིམས་ ༡༩ འགོས་པའི་བོད་རིགས་གཅིག་ཀྱང་མེད་པ་བཅས། །
