ཕྱི་ལོ་ ༢༠༢༠ ཟླ་ ༨ ཚེས་ ༧ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༨ ཚེས་ ༦ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་བཅུ་དགུ་པ་དེ་སྤེལ་ཡོད།
དེ་ཡང་གསལ་བསྒྲགས་ཞུ་མཁན་འཕྲོད་བསྟེན་ལས་ཁུངས་ཀྱི་དྲུང་ལས་དབྱངས་འཚོ་ལགས་དང་ཕྱི་ལུགས་སྨན་པ་བསྟན་འཛིན་རྣམ་གྲོན་ལགས། བོད་ལུགས་སྨན་པ་ཚེ་རིང་མཚམས་གཅོད་ལགས་བཅས་ཡིན།
དང་པོ། འཕྲོད་བསྟེན་ལས་ཁུངས་ཀྱི་དྲུང་ལས་དབྱངས་འཚོ་ལགས་ནས་ད་ལྟའི་ཏོག་དབྱིབས་གཉན་རིམས་ཀྱི་དུས་སྐབས་སུ་འཕྲོད་བསྟེན་སློབ་གསོ་གོ་རྟོགས་ཚན་པའི་ངོས་ནས་སྔོན་འགོག་གི་ཐབས་ལམ་འདི་ནད་ཡམས་ཁྱབ་གདལ་བཀག་འགོག་གི་ལག་ཆ་ཡག་ཤོས་ཡིན་པ་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་གཙོས་དཔྱད་ཞིབ་པ་མང་པོ་ལམ་སྟོན་གནང་ཡོད་ན། མི་མང་ནས་མུ་མཐུད་སྔོན་འགོག་ཐོག་ཐུགས་སྣང་ཕྱག་བསྟར་ཡོང་བའི་འབོད་སྐུལ་ཞུས། འབྲེལ་ཡོད་ཚན་པའི་ངོས་ནས་ཀྱང་མུ་མཐུད་དཔར་རིས་དང་བརྙན་ཐུང་བརྒྱུད་མི་མང་ལ་གོ་རྟོགས་སྤེལ་བཞིན་ཡོད་ན་མང་ཚོགས་ནས་ཀྱང་ཧུར་བརྩོན་དང་སེམས་ཤུགས་མ་ཆག་པར་ཕྱི་ལ་འགྲོ་སྐབས་ཁ་རས་གྱོན་རྒྱུ་དང་། གཞན་དང་བར་ཐག་གཞག་རྒྱུ། ལག་པ་ཡང་སེ་བཀྲུ་རྒྱུ་ཁག་གི་ཐབས་ལམ་འདི་ཚོ་མུ་མཐུད་ནས་ཕྱག་བསྟར་གནང་དགོས་པ་གསུངས། གལ་ཏེ་སྔོན་འགོག་གི་ཐབས་ལམ་མ་བསྟེན་པ་དང་སྤྱི་ཚོགས་ནང་ནད་གཞི་ཕོག་པ་རྣམས་ལ་དབྱེ་འབྱེད་སོགས་ལྟ་ཚུལ་ངན་པ་རིགས་གནང་ཚེ་དེ་ནི་ཏོག་དབྱིབས་གཉན་རིམས་ཀྱི་སྔོན་འགོག་གི་ལས་གཞི་ལ་མཐུད་ཤོར་གཏོང་མཁན་རྒྱུ་རྐྱེན་གཙོ་བོ་ཆགས་ཀྱི་ཡོད་པ་འགྲེལ་བརྗོད་གནང་།
དུས་རྒྱུན་འཕྲོད་བསྟེན་སློབ་གསོ་ཚན་པའི་འོག་ནས་བདེ་ཐང་དང་ལྡན་པའི་འཚོ་བའི་ཀུན་སྤྱོད་དང་འབྲེལ་བའི་ཟས་བཅུད་ཡག་པོ་བསྟེན་ཚུལ་དང་། ལུས་སྦྱོང་གི་གོམས་གཤིས་བཟང་པོ་བསྐྲུན་ཆེད་ས་གནས་སྨན་ཁང་གི་སྨན་ཞབས་བརྒྱུད་བྱེད་སྒོ་མང་པོ་ཞིག་མི་མང་ཚང་འཇོམས་ཐོག་སྤེལ་དང་སྤེལ་བཞིན་ཡོད་པ་དང་། དེ་བཞིན་ཡོ་ག་དང་ zumba འཛིམ་གྲྭ་ཁག་མང་པོ་ཞིག་ས་གནས་ལ་གོ་སྒྲིག་ཞུས་པ་བཞིན་མི་མང་ནས་ཐུགས་སྣང་ཆེན་པོས་འཛུལ་ཞུགས་གནང་མཁན་མང་པོ་ཡོང་གི་འདུག རྒྱུན་གཏན་གྱི་བྱེད་སྒོའི་ནང་ལུས་སྦྱོང་བྱ་རྒྱུ་དང་རྩོལ་བཅག་བྱེད་རྒྱུ་དེ་ཚོ་ནང་ལ་བསྡད་ནས་ཀྱང་བྱེད་རྒྱུ་ཡོད་དུས་མུ་མཐུད་ནས་གནང་དགོས་ཀྱི་ཡོད། དེ་ཚོ་སོ་སོའི་སྤྱི་ཡོངས་ཀྱི་འཕྲོད་བསྟེན་གོང་འཕེལ་ལ་ཕན་ཐོགས་ཡོད་པས་མུ་མཐུད་གནང་གལ་ཆེ་བ་གསུངས།
ད་ལྟའི་ཏོག་དབྱིབས་གཉན་རིམས་ཀྱི་དུས་སྐབས་འདི་ལ་འཕྲོད་བསྟེན་སློབ་གསོ་ཚན་པ་ནས་གོ་རྟོགས་ལས་རིམ་ཁག་མང་པོ་ཞིག་དྲ་རྒྱ་དང་བརྙན་ཐུང་བརྒྱུད་ནས་སྤེལ་བཞིན་ཡོད། ཉེ་ཆར་ང་ཚོས་འཛམ་གླིང་ནུས་གསོའི་དུས་ཚིགས་དང་འབྲེལ་བའི་བརྗོད་གཞིའི་ཐོག་བརྙན་ཐུང་གི་འགྲན་བསྡུར་འོག་ནས་སྲུང་བརྩི་ཞུས་ཐུབ་པ་བྱུང་ཡོད། འཕྲོད་བསྟེན་ལས་ཁུངས་ངོས་ནས་མང་ཚོགས་ལ་གོ་རྟོགས་ཁྱབ་ཆེ་སྤེལ་ཆེད་འཕྲོད་བསྟེན་གྱི་ངོ་དེབ་དང་། YouTube, Instagram དེ་ཚོའི་བརྒྱུད་ལམ་འོག་ནས་བརྙན་ཐུང་། སློབ་གསོ་གོ་རྟོགས། ལྟད་མོའི་བརྒྱུད་ལམ་ནས་གོ་རྟོགས་སྤེལ་བཞིན་ཡོད། མང་ཚོགས་ནས་ཀྱང་གཞུང་འབྲེལ་དྲ་རྒྱ་ www.tibetanhealth.org དང་སྤྱི་ཚོགས་དྲ་ལམ་གྱི་ཁ་བྱང་ Health CTA འདི་ཚོར་གཟིགས་ཀློག་གནང་དགོས་པའི་རེ་སྐུལ་ཞུས།
གཉིས་པ། ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ནས་བཙན་བྱོལ་བོད་མིའི་སྤྱི་ཚོགས་ཁྲོད་གནས་སྟངས་ཇི་ཆགས་ཐད་འགྲེལ་བརྗོད་གནང་དོན། འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༩ བྱུང་ཡོད་པ་དང་། དེ་ཡང་ལ་དྭགས་ཁུལ་ནས་མི་ ༤ ༼བུད་མེད་རང་ལོ་༢༦།༢༧།༢༨ སྐྱེས་པ་གཅིག་བཅས།༽ བྱུང་འདུག ཁོང་ཚོ་བཞི་ཀའི་རྒྱབ་ལྗོངས་ཡར་མར་འགྲུལ་བཞུད་བྱས་པ་ལས་འགོས་པ་རེད་འདུག་ལ་བཞི་ཀར་དམིགས་བསལ་ནད་རྟགས་གང་ཡང་མེད་ལ་ད་ཆ་ཟུར་བཀག་ཏུ་གནས་བཞིན་པ་རེད་འདུག་ཅིང་ཁོང་ཚོ་དང་ཐད་ཀར་འབྲེལ་བ་བྱུང་བ་རྣམས་དོགས་གཞི་ཅན་ཆགས་ཡོད་དུས་འབྲེལ་ཡོད་རྣམས་ཀྱང་ཁང་ཁྱིམ་ཟུར་བཀག་ཏུ་གནས་བཞིན་ཡོད་པའི་གནས་ཚུལ་བརྒྱུད་ལོན་བྱུང་།
དེ་ནས་ལྡི་ལི་ཁུལ་ནས་མི་གྲངས་ ༢ བྱུང་། ༼བུད་མེད་རང་ལོ་༢༨།༢༩༽ ཁོང་གཉིས་ལས་གཅིག་ལ་ཚ་བ་འཕར་བ་དང་གློ་རྒྱག་པའི་ནད་རྟགས་མངོན་པ་བྱུང་འདུག་ཅིང་ད་ཆ་ཟུར་བཀག་ཐོག་གནས་བཞུགས་ཡིན་འདུག དེ་ནས་མོན་གྷོ་འདོད་རྒུ་གླིང་ཁུལ་ནས་མི་གྲངས་ ༣ བྱུང་འདུག ༼སྐྱེས་པ་རང་ལོ་ ༣༠ བུད་མེད་རང་ལོ་ ༡༩།༢༠༽ དམིགས་བསལ་ནད་རྟགས་གང་ཡང་མི་འདུག་ལ་ད་ཆ་ཀོ་ཝིཌ་གཅེས་སྐྱོང་ཁང་ནང་གསོ་བཅོས་བྱེད་བཞིན་པའི་གནས་སྟངས་ཞུ།
ད་བར་ཁྱོན་རྒྱ་གར་དང་བལ་ཡུལ་ནང་བོད་མི་གྲངས་ ༧༩ ལ་ནད་གཞི་ཕོག་པ་ར་ཕྲོད་བྱུང་ཞིང་མི་གྲངས་ ༢ ཚེ་འདས་སོང་ཡོད་པ་དང་། མི་གྲངས་ ༦༥ དྲག་སྐྱེད་བྱུང་ཡོད་པ་དང་། ད་ཆ་མི་གྲངས་ ༡༢ ནད་མནར་བཞིན་པའི་གནས་སྟངས་ཞུ།
ནད་གཞི་ཕོག་པའི་མི་རྣམས་ལ་ས་གནས་འཕྲོད་བསྟེན་ཚོགས་ཆུང་ནས་གསོ་རིག་གསོ་བཅོས་སྨན་ཕུལ་ཡས་དང་དེ་བཞིན་འདི་ག་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཆེད་ལས་པའི་ངོས་ནས་གནས་སྟངས་བརྒྱུད་ལོན་དང་སློབ་གསོ་ལམ་སྟོན་རིགས་གནང་ཐུབ་པ་བྱུང་།འདས་པའི་བདུན་ཕྲག་ཅིག་གི་ནང་དབུས་དང་ས་གནས་ཀྱི་ལས་དོན་ཚོགས་ཆུང་གི་གྲུབ་ཐོན་ཞུ་རྒྱུར།
དང་པོ་འགོག་དབྱེ་ཟུར་འཇོག་དང་འབྲེལ་འཕྲོད་བསྟེན་ལས་ཁུངས་ཀྱི་གྲངས་ཐོ་ཚན་པའི་སྡེ་ཚན་ནས་གནས་ཚུལ་བསྡུས་ལེན་བྱུང་བ་གཞིར་བཟུང་བདུན་ཕྲག་འདིའི་ནང་རྒྱ་གར་ནང་ས་གནས་གྲངས་ ༣༠ དང་བལ་ཡུལ་ནང་ས་གནས་གྲངས་ ༣ བཅས་ནང་ཁྱོན་བོད་མི་གྲངས་ ༥༠༢ ཏེ་མི་གྲངས་ ༢༩༩ རང་ཁྱིམ་དུ་ཟུར་བཀག་ངང་གནས་བཞིན་ཡོད་པ་དང་མི་གྲངས་ ༢༠༣ བོད་མིའི་སྒྲིག་འཛུགས་ནས་མཐུན་རྐྱེན་སྦྱར་བའི་ཟུར་བཀག་ཁང་པའི་ནང་གནས་བཞིན་ཡོད་པའི་གནས་ཚུལ་ཞུས། དེའི་ནང་ནས་རྡ་ས་ཁུལ་དུ་མི་གྲངས་ ༥༨ འགོག་དབྱེ་ཟུར་བཀག་ཏུ་བཞུགས་བཞིན་པའི་གནས་སྟངས་ཞུ།
གཉིས་པ་དབུས་དང་ས་གནས་སུ་ནད་རྟགས་ཡོད་མེད་བརྟག་ཞིབ་གནང་ཐད་རྡ་ས་ཁུལ་དུ་ས་གནས་འགོ་འཛིན་དང་། དེ་བཞིན་བོད་མིའི་སྒྲིག་འཛུགས་གཙོས་ཚོགས་སྡེ་སོ་སོས་འགན་འཁུར་བའི་ཐོག་བདུན་ཕྲག་འདིའི་ནང་མི་གྲངས་ ༡༦༦༨ ༼སྒྲིག་འཛུགས་ལས་བྱེད་གྲངས་ ༥༢༤ རྡ་ས་ས་གནས་འགོ་འཛིན་ནས་མི་གྲངས་ ༣༩༥ གནས་ཆུང་གྲ་ཚང་། ༨༠ དགའ་གདོང་གྲ་ཚང་། ༡༣ བོད་ཀྱི་དཔེ་མཛོད་ཁང་། ༥༡ བོད་ཀྱི་སྨན་རྩིས་ཁང་། ༥༣༢ གངས་སྐྱིད་ཁུང་ལོ་ན་བགྲེས་པ་སོགས་ཉེན་ཚབས་ཆེ་བའི་མི་གྲངས་ ༧༣༽ ལ་ནད་རྟགས་ཡོད་མེད་ཚོགས་སྡེ་སོ་སོས་འགན་འཁུར་གནང་བའི་ཐོག་བརྟག་ཞིབ་གནང་ཡོད་ལ་དེའི་ནང་དམིགས་བསལ་ནད་རྟགས་ཐོན་པ་སུའང་བྱུང་མེད།
གཞན་ཡས་རྒྱ་གར་ནང་གི་བོད་མིའི་གཞིས་ཆགས་ས་གནས་གྲངས་ ༣༤ བལ་ཡུལ་ནང་ས་གནས་ ༢ བཅས་ཁྱོན་མི་གྲངས་ ༧༥༢༥ ལ་ (ལོ་ན་ ༦༠ ཡན་མི་གྲངས་ – ༥༧༥༩ ཉེན་ཚབས་ཆེ་བ་མི་གྲངས་ – ༡༧༦༦) ཞལ་པར་བརྒྱུད་ནད་རྟགས་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
གསོ་རིག་ལུས་སེམས་ནུས་གསོའི་སྨན་དང་འབྲེལ་རྒྱ་གར་ནང་གི་ས་གནས་ཁག་ ༢༢ ནང་གི་འགོག་དབྱེ་ཟུར་འཇོག་ཁང་དུ་གནས་བཞུགས་བོད་མི་གྲངས་ ༡༣༨༦ དང་རྒྱ་གར་ནང་ས་གནས་ཁག་ ༣༩ དང་བལ་ཡུལ་ནང་བཅས་ནང་ལོ་ན་ ༦༥ ཡན་བོད་མི་གྲངས་ ༩༤༧༦ ཕྱི་རྒྱལ་དུ་བཏང་ཟིན་པ་བསྡོམས་ ༡༦༣༥ གཞན་ཡང་འཕྲོད་ལས་པ་དང་དངས་ཞབས་གྲངས་ ༧༧༦ བླ་གཉན་ནད་གཞི་ཡོད་པ་མི་གྲངས་ ༡༡༠༠ བཅས་ཁྱོན་ད་བར་མི་གྲངས་ ༡༤༣༧༣ ལ་གསོ་རིག་ལུས་སེམས་ནུས་གསོའི་སྨན་རིན་མེད་ཐོག་ཕུལ་ཟིན།
གཞན་ཡང་ས་གནས་ཁག་ལ་ནད་ཡམས་ཁྱབ་གདལ་སྔོན་འགོག་ཆེད་ལས་དོན་སྤེལ་བའི་ཁོངས་སུ། ས་གནས་ཕལ་མོ་ཆེར་བདུན་ཕྲག་རེའི་ནང་གཞིས་ཆགས་ཕྱི་ནང་དང་མི་མང་འདུ་འཛོམས་ཆེ་སར་དུག་སེལ་མུ་མཐུད་གནང་བཞིན་ཡོད་པ་དང་།
ཡང་བདུན་ཕྲག་འདིའི་ནང་རྡ་ས་ཁུལ་དུ་ཕྱི་མི་འབྱོར་བ་འགོག་དབྱེ་ཟུར་འཇོག་ཁང་དུ་བཞུགས་མཁན་༢༣ ལ་ནད་འབུ་ཡོད་མེད་བརྟག་དཔྱད་བྱས་འདུག་ཅིང་མི་༢༣ སུ་ལའང་ནད་འབུ་མེད་པའི་གྲུབ་འབྲས་ཐོན་ཡོད། ད་བར་ཁྱོན་རྡ་ས་ཁུལ་དུ་མི་གྲངས་༤༡༦ ལ་ནད་འབུ་ཡོད་མེད་དམ་ནད་གཞི་ཕོག་ཡོད་མེད་བརྟག་དཔྱད་བྱས་ཐུབ་པ་བྱུང་ཡོད། དེ་བཞིན་བལ་ཡུལ་ཁུལ་དུ་བོད་མི་གྲངས་༦༠ ལ་ནད་འབུ་ཡོད་མེད་བརྟག་དཔྱད་ཐུབ་པ་བྱུང་འདུག
ཁ་ཉིན་ཕྱི་ཚེས་༥ རེས་གཟའ་ལྷག་པའི་ཉིན་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ཀྱི་ས་གནས་ཛ་དྲག་འཕྲོད་བསྟེན་ཚོགས་ཆུང་དང་ས་གནས་འཚོ་བྱེད་སྨན་ཁང་མཉམ་འབྲེལ་གྱི་འགན་འཁུར་འོག་ས་གནས་སུ་བོད་མི་གྲངས་༢༡ ལ་Antigent Test བརྟག་དཔྱད་ཐུབ་པ་བྱུང་འདུག མི་༢༡ སུ་ལའང་ནད་གཞི་ཕོག་མེད་པ་ར་འཕྲོད་བྱུང་འདུག
དེ་བཞིན་སེམས་ཁམས་འཕྲོད་བསྟེན་དང་འབྲེལ་བོད་མིའི་གཞིས་ཆགས་གྲངས་༢༦ ནང་འགོག་དབྱེ་ཟུར་འཇོག་ཏུ་བཞུགས་མཁན་མི་གྲངས་༣༥༠ ལ་ཞལ་པར་ཐོག་འབྲེལ་བ་གནང་ནས་གནས་སྟངས་རྒྱུད་ལོན་དང་སློབ་གསོ་ལམ་སྟོན་གནང་ཡོད་པ་དང་དེ་བཞིན་ནད་གཞི་ཕོག་པའི་མི་གྲངས་དགུ་བྱུང་འདུག་པ་རྣམས་ལ་ཁ་པར་བརྒྱུད་འབྲེལ་བ་གནང་བཞིན་པ་རེད་འདུག
གསུམ་པ། མི་མང་ལ་ཐུགས་སྣང་ལམ་སྟོན་ཚུལ་དུ་ཞུ་རྒྱུར།
བོད་ཀྱི་གསོ་བ་རིག་པའི་གཞུང་ནང་གཉན་རིམས་སྤྱིའི་རྒྱུ་རྐྱེན་དང་བརྟག་ཐབས་སྨན་བཅོས་སོགས་ཞིབ་རྒྱས་བསྟན་ཡོད་ལ་ལྷག་པར་གཉན་གྱི་ལེའུ་ ༡༨ གསལ་སྟོན་གནང་ཡོད། ད་ལན་ཀོ་ཝིཌ་ ༡༩ འདིའང་གཉན་རིམས་ཅིག་ལ་ངོས་འཛིན་བྱེད་བཞིན་ཡོད། གཉན་རིམས་ཞེས་པའི་གཉན་དེ་ལྷ་དང་ཀླུ་གཉན་དང་བཙན་ཞེས་གཉན་གྱི་རིགས་ཅིག་ལ་འཇུག་པ་དང་ཡང་རི་དྭགས་ཅིག་གི་མིང་ལ་གཉན་ལ་གོ་བ་དང་། སྐབས་སུ་བབ་པ་གཉན་རིམས་ཀྱི་ནད་ཀྱི་གོ་དོན་ནི་སྙིགས་མ་ལྔ་བདོའི་དུས་སུ་མི་རྣམས་འདོད་པ་ལོག་པར་སྤྱོད་ཅིང་རྒྱུ་འབྱུང་བཞི་འཁྲུགས་པ་དང་མ་མོ་འཁའ་འགྲོ་ལ་སོགས་པ་འཁྲུགས་པའི་ཁ་རླངས་སམ་དུག་རྐྱེན་སྲིན་བུ་མཁའ་ལ་རྒྱུ་བ་ལ་སོགས་པའི་ནད་ཕོག་པའི་མི་གཅིག་གིས་ནད་མེད་བརྒྱ་སྟོང་ལ་འགོ་བར་བྱེད་ཅིང་ཡམས་ཐབས་སུ་མཆེད་ནས་རིམ་པས་འགོ་བས་ན་རིམས་ནད་ཅེས་དང་། དེ་ནི་སྲོག་ལ་ཤིན་ཏུ་གཟན་པས་གཉན་ཞེས་གྲགས། གཉན་དང་རིམས་ཅེས་པ་དེ་གཉིས་ནི་ཕ་གཅིག་གི་བུ་སྤུན་འདྲ་བས་གཅིག་གྲོགས་ཅིག་གིས་བྱེད་ཅིང་གྲོས་ཁ་མཐུན། འགྲོ་སྲོག་མྱུར་བར་ལེན་ལ་མཐུ་དཔུང་ཆེ། ཞེས་སྔོན་བྱོན་གསོ་རིག་མཁས་དབང་རྣམས་ཀྱིས་གཉན་རིམས་དེ་ག་ཚད་བཀའ་གཉན་པོ་སྲོག་ལ་ཉེན་ཁ་ཡོད་པ་གསལ་སྟོན་གནང་ཡོད།
དེ་འདྲ་བའི་གཉན་རིམས་ལ་གསོ་བ་རིག་པའི་གཞུང་ལས་གཉན་རིམས་བབས་སའི་དབང་གིས་གཉན་ལེའུ་༡༨ དངོས་སུ་བསྟན་ཡོད་པ་དང་ད་དུང་དུས་ངན་སྙིགས་མའི་སྐབས་ནད་མིང་འདོགས་པར་དཀའ་བའི་གཉན་རིམས་མཐའ་ཡས་པ་འབྱུང་བ་གསུངས་ཡོད།
ད་ལན་ཀོ་ཝིཌ་༡༩ ནད་གཞི་འདིའི་ནད་རྟགས་ནི་སྤྱིར་ཆམས་པའི་ནད་གཞི་དང་འདྲ་བར་མིད་པའམ་གྲེ་བ་ཚ་བ། སྐད་འཛེར་བ། སྣ་འགག་པ། གྲང་ཤུམ་རྒྱག་པ། ཚིགས་གཞི་ན་བ། སྒྱིད་པ་སྐྱུར་བ་སྟེ་ལུས་ཉོབ་ཅིང་ཅིའང་བྱེད་འདོད་ཀྱི་སྤྲོ་བ་མེད་པ། ཁ་ཟས་ལའང་དྭངས་ག་མེད་པ་དེ་འདྲ་ཡོང་གི་ཡོད། དམིགས་བསལ་གྱིས་གཉན་རིམས་ཀོ་ཝིཌ་༡༩ འདི་ལ་ཚ་བ་རྒྱས་པ། གློ་ལུ་བ་དང་། ཁ་ཟས་ལ་བྲོ་བ་མེད་པ། ཁ་སྐམ་པ། ལུས་ཀྱི་ཤ་སྒྲིམ་ཚང་མ་ན་བ། གཉན་སྲིན་དེ་དོན་སྣོད་ལ་བབ་ཅིང་ལྷག་པར་གློ་བར་བབ་པ་ན་གློ་བའི་རྩ་བུབ་རྣམས་འགག་ནས་དབུགས་འབྱིན་རྔུབ་མ་ཐུབ་པར་དབུགས་ཧལ་བ། ལྷག་པར་ནད་ཡམས་ཡིན་པས་སེམས་ནང་དམིགས་བསལ་དངངས་ཚབ་དང་གཉིད་མ་ཁུག་པ་དེ་འདྲ་ཡོང་གི་ཡོད། ཁག་ཅིག་ལ་ལྟོ་བ་བཤལ་བ་དང་། སྐྱུགས་པའང་ཡོང་གི་ཡོད་པས་མི་ཚང་མར་མངོན་ཚུལ་དང་ནད་རྟགས་ཅིག་པ་གཅིག་ཀྱང་ཡོང་གི་མེད། མི་སོ་སོ་རླུང་མཁྲིས་བད་ཀན་གྱི་རང་བཞིན་གང་ཡིན་དང་། དེ་བཞིན་གང་ཟག་སོ་སོར་དེ་སྔ་བླ་གཉན་གྱི་ནད་གཞི་ཡོད་པ་དང། གཞན་ཡང་གཟུགས་པའི་ཁམས་སམ་ཟུངས་སྟོབས་ཆེ་ཆུང་ལའང་རག་ལུས་ཡོད།
གཉན་རིམས་དེ་ཚོ་ལ་ཡིན་ན་གསོ་བ་རིག་པའི་གཞུང་ལས་དང་པོ་མ་སྨིན་རིམས་ཀྱི་མངོན་ཚུལ་ནི། ཕྲུམ་སེར་ཡུན་རིང་མགོ་རྐང་ཚིགས་གཞི་ན། ལུས་ལྕི་སྒྱིད་སྐྱུར་རྨི་ལམ་ཟ་ཟི་མང་། ཞེས་དང་།
བར་དུ་རིམས་རྒྱས་ལུས་ལྕི་རྔུལ་དྲི་མནམ། མིག་མདངས་དམར་སེར་ལྕེ་མཆུ་སོ་དྲེག་ཆགས། མགོ་ན་སྐོམ་དད་ཆེ་ལ་ཤེེས་པ་གཡུང་། ཞེས་དང་།
ཐ་མར་ཞུ་འཁྱགས་མཚམས་སླེབ་སྟོངས་པའི་རྟགས། དཔྱི་དང་རྐེད་པ་རུས་རྐང་ཁྱད་པར་ན། ལུས་རྔུལ་གཉིད་ཆུང་མགོ་འཐོམ་རྣ་བ་འུར། ཞེས་སོགས་གཉན་རིམས་དེ་བབ་ས་དང་གནས་ཡུལ་མི་འདྲ་བའི་དབང་གིས་ནད་རྟགས་མི་འདྲ་བ་དུ་མ་འབྱུང་ཚུལ་གསུངས་པས་གོང་དུ་ནད་རྟགས་དེ་འདྲ་སུ་ལའང་འབྱུང་ཚེ་མངོན་ཚུལ་ལ་གཞིགས་པའི་བཅོས་ཐབས་རྣམས་བྱེད་དགོས་དུས་ས་གནས་གང་དུ་བཞུགས་ཀྱི་ཡོད་ནའང་ས་གནས་དེའི་ཛ་དྲག་ཚོགས་ཆུང་ནང་གསོ་བ་རིག་པའི་སྨན་པ་ཡོད་པ་རེད། གཞན་ཡང་ས་གནས་ཁ་ཐོར་ཡིན་ཚེ་ཐག་ཉེའི་བོད་ཀྱི་སྨན་རྩིས་ཁང་གི་ཡན་ལག་སྨན་ཁང་། དེ་བཞིན་གསོ་རིག་སློབ་གཉེར་ཁང་དང་སྒེར་གཉེར་གསོ་རིག་སྒོ་བསྟེན་སྨན་ཁང་ཡོད་ན་དེར་འབྲེལ་བ་གནང་ནས་སྨན་བཅོས་རྣམས་རིམ་པ་བྱེད་ཐུབ་ན་ཕན་བསྐྱེད་ཆེན་པོ་ཡོད་པ་ཡིན། ཡང་ཛ་དྲག་གིས་དབུགས་གཏོང་ལེན་དཀའ་བའི་གནས་སྟངས་འབྱུང་ཚེ་ཉེ་འཁོར་ཕྱི་ལུགས་སྨན་ཁང་རྣམས་བསྟེན་གཏུགས་གནང་དགོས་པ་ཤིན་ཏུ་གལ་ཆེ།
འདི་དང་སྦྲགས་ད་ལན་སླར་ཡང་ཞུ་རྒྱུར། གཉན་རིམས་འདིའི་གཉན་སྲིན་གསར་པ་ཞིག་(SARS CoV-2)ལ་ངོས་འཛིན་བྱེད་བཞིན་ཡོད་པས་གཉན་སྲིན་དེས་གཟུགས་པོའི་ནང་གནོད་སྐྱོན་གང་དང་གང་འདྲ་བྱེད་ཀྱི་ཡོད་ཚུལ་ཉམས་ཞིབ་དང་དེར་དམིགས་ནས་ནད་འགོག་སྨན་ཁབ་རྣམས་བཟོ་ཐབས་བྱེད་པའི་དུས་ཚོད་འདིར་སོ་སོའི་ངོས་ནས་ཁ་རས་གྱོན་ཡས། མི་ནས་མིར་འགོས་བཞིན་ཡོད་པའི་འགོས་ནད་ཡིན་པས་མི་དང་མིའི་དབར་རྒྱང་ཐག་འཇོག་ཡས། དེ་བཞིིན་མི་མང་འདུ་འཛོམས་ཆེ་སར་འགྲུལ་བསྐྱོད་འཛེམས་ཡས། དེ་བཞིན་ཁ་མིག་ལག་པ་གཙང་མ་འཇོག་ཡས་གལ་ཆེ། དེ་དོན་གསོ་བ་རིག་པའི་གཞུང་ལས་དེ་དུས་བདག་གཞན་སྲུང་བ་ཤིན་ཏུ་གཅེས། ཅེས་གསུངས་པ་ལྟར་འདི་ལྟའི་ནད་ཡམས་ཁྱབ་གདལ་གྱི་དུས་སུ་སྨན་པ་རང་ཉིད་ངོས་ནས་ནད་འགོག་སྲུང་སྐྱོབ་བྱེད་ཡས་དང། གཞན་ནད་པ་ཡིན་ཡང་ནད་འགོག་སྲུང་སྐྱོབ་ཀྱི་ཐབས་ལམ་རྣམས་བསྟེན་དགོས་ཀྱི་ཡོད་པ་གསོ་བ་རིག་པའི་གཞུང་ལས་གདམས་པ་དེ་ལྟར་གནང་ཡོད་ན་མི་མང་ངོས་ནས་དེ་ལྟར་གནང་དགོས་པའི་འབོད་སྐུལ་ཞུས་གནང་ཡོད།
དེ་རྗེས་སྨན་པ་བསྟན་འཛིན་རྣམ་གྲོན་ལགས་ནས་ཕྱི་ལུགས་སྨན་གྱི་ཐོག་ནས་ནད་གཞི་འདིར་བརྟག་དཔྱད་ཐབས་ལམ་གསུམ་ཡོད་པའི་ནང་ནས་ RT-PCR དེ་ཚད་ལྡན་ཞིག་ཡིན་པ་དང་བརྟག་དཔྱད་འདི་བརྒྱུད་ནས་ནད་འབུ་འགོས་ཡོད་མེད་ཤེས་རྟོགས་ཐུབ་ལ་འདིའི་འགོར་ཡུན་དེ་ཆུ་ཚོད་༤་་༥ བར་ཡིན། འདི་ནི་མིའི་སྣ་ཁུང་དང་མིད་པ་ནས་མཆིལ་མའི་རྡུལ་ཕྲན་ལེན་ནས་བརྟག་དཔྱད་བྱེད་བཞིན་ཡོད། བརྟག་དཔྱད་འདི་བརྒྱུད་གཉན་སྲིན་ནད་འབུ་ཁོ་རང་གི་ནང་ལོག་ན་རིགས་རྫས་ Gene དེ་འདུག་མིན་འདུག་བརྟག་དཔྱད་བྱེད་བཞིན་ཡོད། དེ་ཡིན་དུས་བརྟག་དཔྱད་ཁང་མང་པོ་གཅིག་ལ་ཆ་རྐྱེན་ཚང་གི་མེད་པས་རྒྱལ་ཁབ་ནང་དེ་ལྟའི་བརྟག་དཔྱད་ཁང་མང་པོ་མེད་པའི་དཀའ་ངལ་ཡིན་པ་འགྲེལ་བརྗོད་གནང་། བརྟག་དཔྱད་གཉིས་པ་དེ་ Rapid Antigen Test ཞེས་ནད་འབུ་དེའི་ཏོག་ལ་ Protein ཞིག་ཡོད་པ་དེ་འདུག་མི་འདུག་བརྟག་དཔྱད་བྱེད་པ་ལས་ཤེས་ཐུབ། དེའང་སྣ་དང་མིད་པ་ནས་མཆིལ་མའི་རྡུལ་ཕྲན་ལེན་ནས་བརྟག་དཔྱད་བྱེད་བཞིན་ཡོད་པས་འདིའི་དུས་ཡུན་ཆུ་ཚོད་གཅིག་ནང་གྲུབ་འབྲས་ཐོན་གྱི་ཡོད། འོན་ཀྱང་འཚམས་རེ་མི་གང་ཞིག་ལ་བརྟག་དཔྱད་འདི་བྱེད་ནས་ནད་འབུ་མེད་པ་ཐོན་པ་ཡིན་ཡང་མི་དེ་ལ་ཚ་བ་འཕར་བ་སོགས་ནད་རྟགས་ཡོད་ན་བརྟག་དཔྱད་དང་པོ་ RT-PCR དེ་བྱེད་དགོས་ལམ་སྟོན་བྱེད་ཀྱི་ཡོད། འདི་ནི་རིན་གོང་ཆ་ནས་ཆུང་བ་ཡོད་པ་དང་བརྟག་དཔྱད་ཁང་མང་པོའི་ནང་ཆ་རྐྱེན་ཚང་གི་ཡོད་པས་རྒྱ་གར་དབུས་གཞུང་ནས་བརྟག་དཔྱད་ཁང་ཚད་ལྡན་ཁ་ཤས་ལ་ངོས་འཛིིན་གནང་ཡོད། དེ་ཡིན་དུས་མི་མང་ངོས་ནས་བརྟག་དཔྱད་ཁང་གང་བྱུང་ལ་བརྟག་དཔྱད་མ་བྱེད་པར་རྒྱ་གར་དབུས་གཞུང་ནས་ཚད་འཛིན་ཆོག་མཆན་སྤྲད་པ་རྣམས་ལས་བརྟག་དཔྱད་བྱ་གལ་ཆེ་བ་འགྲེལ་བརྗོད་གནང་། གསུམ་པ་དེ་ Rapid Antibody Test ཞེས་དེ་ནི་གཙོ་བོ་མིའི་ལུས་པོའི་ནང་གཉན་སྲིན་ནད་འབུ་གང་ཞིག་འཛུལ་ཡང་དེའི་འཐབ་རྩོད་བྱ་ཆེད་རྫས་ཞིག་ཏེ་ Antibody གློད་ཀྱི་ཡོད་པ་དེ་གཟུགས་པོའི་ནང་ག་ཚད་ཡོད་མེད་བརྟག་དཔྱད་བྱེད་ཀྱི་ཡོད། འདི་ནི་ཁྲག་བརྒྱུད་བརྟག་དཔྱད་བྱེད་བཞིན་ཡོད། Antibody བཟོ་ཡས་ལ་བདུན་ཕྲག་༡་་༣ བར་འགོར་གྱི་ཡོད། དེ་ཡིན་དུས་བརྟག་དཔྱད་འདིའི་གྲུབ་འབྲས་ཐོན་སྐབས་དུས་ཡུན་བདུན་ཕྲག་༣ ཙམ་ཕྱིན་ཟིན་པས་མི་དེར་ད་ལྟ་ནད་འབུ་འདུག་ཅེས་ངོས་འཛིན་བྱེད་དཀའ། དེ་ལ་ Past infection ཞེས་བདུན་ཕྲག་ཁ་ཤས་སྔོན་ནས་ནད་འབུ་དེ་ཡོད་པ་ར་འཕྲོད་བྱུང་གི་ཡོད། འདི་རིན་གོང་ཡང་ཧིན་སྒོར་༥༠༠་་་༦༠༠ བར་ཡིན་པ་རེད། བརྟག་དཔྱད་འདི་ནི་གཙོ་བོ་སྤྱི་ཚོགས་ཤིག་ནང་གཉན་སྲིན་འགོས་ཁྱབ་ག་ཚོད་ཙམ་བྱུང་ཡོད་མིན་བརྟག་དཔྱད་བྱེད་ཀྱི་ཡོད། དེ་ལ་ལྟོས་ནས་ས་ཁུལ་དེར་འགྲོ་འོང་བཀག་སྡོམ་སོགས་དམ་ལྷོད་གནང་རྒྱུར་ཕན་ཐོགས་ཡོད་པ་འགྲེལ་བརྗོད་གནང་། མཐའ་དོན་བོད་མིའི་སྒྲིག་འཛུགས་ནས་ཕྱི་མི་ཕེབས་མཁན་རྣམས་ཟུར་འཇོག་ཁང་དུ་བཞག་ནས་ཉིན་གྲངས་ལྔའི་རྗེས་བརྟག་དཔྱད་བྱ་དགོས་པའི་རྒྱུ་མཚན་གཙོ་བོ་ནི་རྒྱ་གར་གཞུང་གི་ལམ་སྟོན་ལྟར་ཕྱི་མི་ཕེབས་མཁན་རྣམས་ཡིན་ནས་གཉན་སྲིན་དེ་ཡོད་ན་ཉིན་གྲངས་༥་་༡༠ བར་སྣ་དང་མིད་པའི་ནང་མང་བ་གནས་ཀྱི་ཡོད་པའི་རྒྱུ་མཚན་གྱིས་དེ་ལྟར་གནང་གི་ཡོད་པ་གསལ་བཤད་གནང་། ཆབས་ཅིག་ས་གནས་སུ་ཕྱི་མི་ཕེབས་མཁན་ཡིན་ཡང་ས་གནས་འགོ་འཛིན་ལ་སྔོན་ཚུད་ནས་འབྲེལ་བ་གནང་བའི་ཐོག་ཕེབས་ན་ཚོགས་ཆུང་ནས་བརྟག་དཔྱད་བྱ་རྒྱུའི་ལས་རིམ་དང་གྲ་སྒྲིག་གནང་རྒྱུ་སོགས་ལ་ཕན་ཐོགས་འདུག་པས་དེ་དོན་མི་མང་ནས་དགོངས་བཞེས་གནང་བ་ཞུས་པ་དང་སྦྲགས་ད་ལྟའི་དུས་ཚོད་འདི་ལ་སྔོན་འགོག་གི་ཐབས་ལམ་རྣམས་མུ་མཐུད་ནས་བསྟེན་དགོས་གལ་ཆེ་ཡིན་པ་སླར་འབོད་སྐུལ་ཞུས་གནང་རྗེས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༡༩ པ་དེ་མཇུག་སྒྲིལ་གནང་ཡོད། །
