ཕྱི་ལོ་ ༢༠༢༠ ཟླ་ ༨ ཚེས་ ༢༡ རེས་གཟའ་པ་སངས།
༄༅། །བོད་དོན་ལས་འགུལ་བ་ངག་དབང་ཚེ་འཕེལ་ལགས་ཀྱིས་ཕ་རན་སིའི་རྒྱལ་ས་པེ་རི་སི་ནས་རྐང་འཁོར་བཞོན་ཏེ་བོད་དོན་ལས་འགུལ་སྤེལ་ནས་ཕྱི་ལོ་ ༢༠༢༠ ཟླ་ ༨ ཚེས་ ༡༩ ཉིན་སུད་སིའི་གྲོང་ཁྱེར་ཇེ་ནེ་ཝ་ནང་བདེ་ལེགས་ངང་འབྱོར་ཡོད་པ་དང་། སྐབས་དེར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་ལས་བྱེད་བསོད་ནམས་མཐར་ཕྱིན་ལགས། དེ་བཞིན་གྲོང་ཁྱེར་ཇེ་ནེ་ཝའི་ནང་རྟེན་གཞི་བྱས་པའི་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ཚོགས་གཞོན། ས་གནས་བོད་མི་སོགས་ནས་གདུང་སེམས་མཉམ་སྐྱེ་དང་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
སྐབས་དེར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས། བོད་མི་གཞོན་སྐྱེས་ངག་དབང་ཚེ་འཕེལ་ལགས་ཀྱིས་འགན་ཁུར་ནས་བོད་དོན་སླད་ལས་འགུལ་བརྩམས་པ་ནི་དངོས་གནས་དྲང་གནས་སེམས་ཤུགས་སྐྱེ་དགོས་པ་ཞིག་རེད། ཅེས་དང་། གཞན་ཡང་ང་ཚོ་ཚང་མར་བོད་དོན་འཐབ་རྩོད་བྱེད་རྒྱུའི་འགན་འཁྲི་གཅིག་མཚུངས་སུ་ཡོད། ང་ཚོས་མཉམ་རུབ་ཐོག་འཛམ་གླིང་མི་མང་ལ་བོད་ནང་འགྲོ་བ་མིའི་ཐོབ་ཐང་སྡུག་ནས་སྡུག་ཏུ་འགྲོ་བཞིན་པའི་སྐོར་གང་ཐུབ་གོ་རྟོགས་སྤེལ་དགོས་ཞེས་སོགས་གསུངས།
སུད་སིའི་སྐུ་ཚབ་དོན་གཅོད་ཁང་གི་མཐུན་འགྱུར་འོག་ངག་དབང་ཚེ་འཕེལ་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་ Michelle Bachelet མཆོག་གི་མཚན་ཐོག་ཏུ་ཞུ་ཡིག་ཅིག་ཕུལ་ཏེ་རྒྱ་ནག་གཞུང་གིས་བོད་དང་ཡུ་གུར་བཅས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དང་། བོད་མཐོ་སྒང་གི་ཁོར་ཡུག་གཏོར་བཤིག་གཏོང་བཞིན་པ་སོགས་མཚམས་འཇོག་དགོས་པའི་དགོས་འདུན་དོན་ཚན་བརྒྱད་བཏོན་གནང་ཡོད།
དེ་ཡང་དོན་ཚན་བརྒྱད་ནི། དང་པོ། རྒྱལ་ཚོགས་ཀྱི་ངོས་ནས་རྒྱ་ནག་གཞུང་ལ་བོད་དང་། ཤར་ཏུར་ཀི་སི་ཐན། ཧོང་ཀོང་བཅས་ཀྱི་གཞི་རྩའི་འགྲོ་བ་མིའི་ཐོབ་ཐང་བརྩི་སྲུང་ཞུ་དགོས་པའི་སྐུལ་མ་གཏོང་དགོས་པ་དང་། གཉིས་པ། ཀུན་གཟིགས་པཎ་ཆེན་རིན་པོ་ཆེ་མཆོག་གིས་གཙོས་བོད་དང་། ཤར་ཏུར་ཀི་སི་ཐན། ཧོང་ཀོང་བཅས་ཀྱི་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས་པ། གསུམ་པ། རྒྱ་ནག་གཞུང་གིས་ཞིབ་འཇུག་གང་ཡང་མེད་པར་བོད་ནང་གཏེར་ཁ་གང་བྱུང་སྔོག་འདོན་བྱེད་བཞིན་པ་མཚམས་འཇོག་དགོས་པ། བཞི་པ། རྒྱ་ནག་གཞུང་གིས་དྲིལ་བསྒྲགས་སྤེལ་བཞིན་པའི་ཁ་གཏད་དུ། རྒྱལ་སྤྱིའི་གསར་འགོད་པ་བོད་དང་། ཤར་ཏུར་ཀི་སི་ཐན། ཧོང་ཀོང་བཅས་ཀྱི་ནང་ཡོང་འཇུག་དགོས་པ། ལྔ་པ། བོད་རྒྱ་གྲོས་མོལ་སླར་གསོ་ཡོང་སླད་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་གྲོས་མོལ་གནང་དགོས་པ། དྲུག་པ། རྒྱ་ནག་གཞུང་གིས་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་སྔོན་འགོག་ཇི་བཞིན་བྱེད་ཀྱི་མེད་པར་བརྟེན། དེའི་འགན་འཁྲི་རྒྱ་ནག་གཞུང་ལ་བྱེད་འཇུག་དགོས་པ་མ་ཟད། རྒྱ་ནག་རྒྱལ་ཡོངས་སུ་སེམས་ཅན་གསོན་པོའི་ཤ་ཁྲོམ་ཁག་སྒོ་བརྒྱག་འཇུག་དགོས་པ་དང་། དེ་བཞིན་སེམས་ཅན་ལ་ཡ་ང་སྙིང་རྗེ་མེད་པར་གདུག་རྩུབ་གཏོང་བཞིན་པ་མཚམས་འཇོག་དགོས་པ། བདུན་པ། བོད་དང་ཡུ་གུར་མི་རིགས་རྣམས་སོ་སོའི་ཕ་ཡུལ་དུ་གནས་སྐོར་དང་ནང་མི་སྤུན་མཆེད་སོགས་ལ་ཐུག་འཕྲད་དུ་ཡོང་འཇུག་དགོས་པ། བརྒྱད་པ། རྒྱ་ནག་གཞུང་གིས་འཕགས་བོད་ས་མཚམས་སུ་བཙན་འཛུལ་བྱེད་བཞིན་པ་དང་། ཁྲིམས་འགལ་གྱིས་ལྷོ་རྒྱ་ནག་རྒྱ་མཚོའི་བདག་དབང་རྩོད་བཞིན་པ་མཐའ་གཅིག་ཏུ་ངོ་རྒོལ་བྱེད་དགོས་པ་བཅས་ཡིན།།
