ཕྱི་ལོ་ ༢༠༢༠ ཟླ་ ༨ ཚེས་ ༧ རེས་གཟའ་པ་སངས།
༄༅། །ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་གི་འབྲེལ་ལམ་ཐོག་དམིགས་བསལ་ལས་དོན་ཚོགས་ཆུང་གིས་ཕྱི་ལོ་ ༢༠༢༠ ཟླ་ ༨ ཚེས་ ༦ ཉིན་གྱི་ཕྱི་དྲོར་ཁེ་ན་ཌའི་ཨོན་ཊེ་རིའོ་ Ontario མངའ་སྡེ་ནང་གི་ཕྱི་དྲོ་ཆུ་ཚོད་ ༣ ནས་ ༧ བར་རྒྱ་ནག་ཐོག་ཉན་ཞིབ་ཚོགས་འདུའི་སྟེང་གསུང་བཤད་གནང་མཁན་གྱི་ཐོག་མ་རུ་གཞུང་འབྲེལ་ཐོག་མགྲོན་འབོད་ཞུས་པ་ལྟར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དང་ལེན་གྱིས་མཉམ་ཞུགས་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་དང་ལྷན་ཁེ་ན་ཌའི་རྒྱ་ནག་གཞུང་ཚབ་ཟུར་པ་ཌེ་ཝི་ཌི་མུལ་རོ་ནེ་ David Mulroney མཆོག་དང་། ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་གི་འབྲེལ་ལམ་ཐོག་དམིགས་བསལ་ལས་དོན་ཚོགས་ཆུང་གི་ཚོགས་གཙོ་གུ་ཡངས་ཆབ་སྲིད་ཚོགས་པའི་གྲོས་ཚོགས་འཐུས་མི་རེ་གྷན་ Geoff Regan མཆོག རྙིང་ཞེན་ཆབ་སྲིད་ཚོགས་པའི་གྲོས་ཚོགས་འཐུས་མི་ཌན་ཨ་ལི་བྷ་སི་ Dan Albas མཆོག གྲོས་ཚོགས་འཐུས་མི་སི་ཊེ་ཧྥན་ Stéphane Bergeron མཆོག གྲོས་ཚོགས་འཐུས་མི་བྷི་ལོག་ Bloc Québécois མཆོག ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་གི་འབྲེལ་ལམ་ཐོག་དམིགས་བསལ་ལས་དོན་ཚོགས་ཆུང་གི་ཚོགས་གཙོ་གཞོན་པ་དང་མང་གཙོ་ཆབ་སྲིད་ཚོགས་པ་གསར་པའི་གྲོས་ཚོགས་འཐུས་མི་ཧར་རི་སི་ Jack Harris མཆོག དེ་བཞིན་ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་གི་འབྲེལ་ལམ་ཐོག་དམིགས་བསལ་ལས་དོན་ཚོགས་ཆུང་གི་ཚོགས་མི་རྣམ་པ་བཅས་མཉམ་ཞུགས་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་གསུང་དོན། རྒྱ་ནག་དམར་ཤོག་ཚོགས་པས་ནུབ་ཕྱོགས་པའི་གུ་ཡངས་དང་། མང་གཙོ། འགྲོ་བ་མིའི་ཐོབ་ཐང་སོགས་ཀྱི་རིན་ཐང་ལ་སྣང་ཆུང་བྱེད་བཞིན་ཡོད་པར་བརྟེན། ང་ཚོས་རྒྱ་ནག་བསྒྱུར་བཅོས་བྱེད་མ་ཐུབ་ན། རྒྱ་ནག་གིས་ང་ཚོ་བསྒྱུར་བཅོས་བྱེད་སྲིད། འཛམ་གླིང་ནང་རྒྱ་ནག་ནི་མཉམ་འབྲེལ་རྒྱལ་ཚོགས་ལ་རོགས་དངུལ་ཞལ་འདེབས་འབུལ་མཁན་ཨང་གཉིས་པ་དེ་ཆགས་ཡོད་པ་མ་ཟད། རྒྱ་ནག་གིས་མཉམ་འབྲེལ་རྒྱལ་ཚོགས་ལ་གནད་ཡོད་མི་སྣ་བསྐོ་གཞག་གིས་མཉམ་འབྲེལ་རྒྱལ་ཚོགས་ཀྱི་སྒྲིག་འཛུགས་ཀྱི་སྒྲོམ་གཞི་ཡང་བསྒྱུར་བཅོས་དང་འགྲོ་བ་མིའི་ཐོབ་ཐང་གི་གོ་དོན་ལའང་འགྲེལ་བརྗོད་གསར་པ་ཞིག་བརྒྱག་རྒྱུའི་འབད་བརྩོན་བྱེད་བཞིན་ཡོད། ཅེས་དང་། ཁེ་ན་ཌས་བོད་ནས་བློ་སྐྱེད་ཅི་ཞིག་ལེན་ཐུབ་བམ།
ཕྱི་ལོ་ ༡༩༥༠ ནང་རྒྱ་ནག་གིས་དབང་སྒྱུར་ལ་བརྟེན་ནས་བོད་དུ་གནས་ཚུལ་ཐབས་སྡུག་བྱུང་བ་བཞིན་ད་ཆ་རྒྱ་ནག་གཞུང་གི་ཤུགས་རྐྱེན་ཁེ་ན་ཌའི་ཆབ་སྲིད་པ་དང་། ཚོང་པ། གསར་འགྱུར་བརྒྱུད་ལམ། ཤེས་ཡོན་པའི་སྡེ་སོགས་ལ་སླེབ་བཞིན་ཡོད། ཁེ་ན་ཌའི་གཞུང་གིས་རྒྱ་ནག་གི་ཧཱ་ཝེ་འཕྲུལ་ཆས་བཟོ་སྐྲུན་ཁང་གི་དཔལ་འབྱོར་འགན་འཛིན་མིན་ཝན་ཀྲིག་འཛིན་བཟུང་བཀག་ཉར་བྱས་སྟབས། རྒྱ་ནག་གཞུང་གིས་ཁེ་ན་ཌའི་གཞུང་འབྲེལ་མི་སྣ་མ་ཡི་ཀེལ་Michael Kovrig ལགས་དང་ཚོང་པ་མ་ཡི་ཀེལ་སི་པ་ཝོར་ Michael Spavor ལགས་རྣམ་གཉིས་འཛིན་བཟུང་བཀག་ཉར་བྱས་ཡོད།
ངས་མ་ཡི་ཀེལ་ལགས་དང་མ་ཡི་ཀེལ་སི་པ་ཝོར་ལགས་ཀྱི་ནང་མི་རྣམས་ལ་གདུང་སེམས་མཉམ་སྐྱེ་ཞུ་བ་དང་སྦྲགས། རྒྱ་ནག་གཞུང་གིས་རེ་འདོད་ཞུས་པ་ལྟར་ཁེ་ན་ཌའི་གཞུང་གིས་མ་ཡི་ཀེལ་ལགས་དང་མ་ཡི་ཀེལ་སི་པ་ཝོར་ལགས་རྣམ་གཉིས་བརྗེ་ལེན་གྱི་ཚུལ་དུ་མིན་ཝན་ཀྲིག་གློད་བཀྲོལ་མ་བཏང་བ་དེ་འགྲིག་ཡོད་པ་དང་། གལ་ཏེ་ཁེ་ན་ཌའི་གཞུང་གིས་རྒྱ་ནག་གི་རེ་འདོད་ལྟར་བསྒྲུབ་པ་ཡིན་ན། མ་འོངས་པར་རྒྱ་ནག་གཞུང་གིས་ཁེ་ན་ཌའི་མི་སེར་མང་པོ་འཛིན་བཟུང་བྱ་ངེས་རེད། ཉེ་ཆར་རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་བཅའ་ཁྲིམས་ཞེས་པ་ཞིག་གཏན་འབེབས་བྱས་ཡོད་པ་དང་། རྒྱ་ནག་གཞུང་གིས་དེ་ལྟ་བུའི་བཅའ་ཁྲིམས་ཤིག་སྔར་བོད་ནང་དུའང་གཏན་འབེབས་བྱས་ཏེ་བོད་མིའི་སྨྲ་བརྗོད་རང་དབང་ཐོག་དྲག་གནོན་བྱས་ཡོད།
ང་ཚོའི་ངོས་ནས་འཛམ་གླིང་གི་རྒྱལ་ཁབ་ཁག་དང་འགོ་ཁྲིད་རྣམས་ལ་བོད་ནང་བྱུང་བའི་དོན་རྐྱེན་ཁག་ལ་སྣང་ཆུང་མ་བྱེད་རོགས། ཞེས་ཞུ་རྒྱུ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་ཞི་བའི་གྲོས་མོལ་གནང་དགོས་པ་དང་། དེ་ནི་རྒྱ་ནག་གཞུང་དང་བོད་མི་རྣམས་ལ་གཉིས་སྨན་གྱི་ཁེ་ཕན་ཡོད། ཁེ་ན་ཌ་མཐུན་ཕྱོགས་རྒྱལ་ཁབ་ཚོ་དང་ལྷན་མཉམ་འབྲེལ་ཐོག་རྒྱ་ནག་གཞུང་ལ་བོད་དང་། ཡུ་གུར། ཐེ་ཝན། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་གནོན་ཤུགས་སྤྲོད་རོགས་ཞེས་འབོད་སྐུལ་ཞུ་རྒྱུ་ཡིན་དང་། ཁེ་ན་ཌའི་གྲོས་ཚོགས་འོག་མའི་ཁེ་ན་ཌ་དང་རྒྱ་ནག་གི་འབྲེལ་ལམ་ཐོག་དམིགས་བསལ་ལས་དོན་ཚོགས་ཆུང་གིས་བོད་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་རོགས། ཞེས་གསུངས།།
