ཕྱི་ལོ་ ༢༠༢༠ ཟླ་ ༨ ཚེས་ ༣ རེས་གཟའ་ཟླ་བ།

༄༅། །ཕ་ཡུལ་ཉག་རོང་ནས་ཡིན་པ་ཆབ་སྲིད་བཙོན་ཟུར་ཨ་མ་ཨ་བདེ་ལགས་ཕྱི་ལོ་ ༢༠༢༠ ཟླ་ ༨ ཚེས་ ༣ གྱི་ཞོགས་པ་ཆུ་ཚོད་ ༢།༥༠ ཐོག་བཞུགས་སྒར་རང་ཁྱིམ་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག 
དམ་པ་ཁོང་ནི་ཕྱི་ལོ་ ༡༩༣༢ ལོར་ཉག་རོང་རྫོང་དུ་ཕ་རྡོ་རྗེ་རབ་བརྟན་དང་། མ་བསོད་ནམས་སྒྲོལ་མ་གཉིས་སུ་འཁྲུངས། ཁྱིམ་མིང་ལ་རྟ་དཔོན་ཚང་ཟེར། ཁོང་ནས་རྒྱ་ནག་གཞུང་ལ་འགོག་རྒོལ་གྱི་ལས་འགུལ་ནང་ཞུགས་རྐྱེན་ཕྱི་ལོ་ ༡༩༥༨ ལོར་འཛིན་བཟུང་ཐོག་བཙོན་ཁང་འདྲ་མིན་དུ་ཁྱོན་མི་ལོ་ ༢༧ ཙམ་དཀའ་སྡུག་ཚད་མེད་མྱངས་སྟེ་ཕྱི་ལོ་ ༡༩༨༥ ལོར་གློད་བཀྲོལ་ཐོབ།
ཕྱི་ལོ་ ༡༩༨༧ ལོར་བཙན་བྱོལ་དུ་ཕེབས་འབྱོར་བྱུང་སྟེ་ཕྱི་ལོ་ ༡༩༨༩ ལོ་ནས་དབུས་སྣེ་ལེན་འབྲེལ་མཐུད་ཁང་དུ་ཕྱག་ལས་གནང་། ཁོང་གིས་རྒྱལ་སྤྱིའི་ཚོགས་སྡེ་ཁག་དང་གནད་ཡོད་མི་སྣ་སོགས་དང་ཐུག་འཕྲད་ཀྱིས་བོད་ནང་གི་དངོས་ཡོད་གནས་སྟངས་ངོ་སྤྲོད་གནང་སྟེ་བོད་དོན་དྲིལ་བསྒྲགས་ཤུགས་ཆེ་གནང་ཡོད། དེ་བཞིན་རང་ཉིད་ཀྱི་མི་ཚེའི་ལོ་རྒྱུས་  ༼ དྲན་འོས་པའི་ཨ་མ་ཨ་བདེའི་འབོད་སྒྲ། ༽  ཞེས་པའི་ཕྱག་དེབ་ཅིག་ཀྱང་འདོན་སྤེལ་གནང་ཡོད།  ཕྱི་ལོ་ ༢༠༡༩ ལོ་མཇུག་ནས་སྙུན་གཞི་བཞེས་པ་དང་དགུང་ནའི་བབ་ཀྱིས་དྲག་སྐྱེད་མ་བྱུང་བར་འདས་གྲོངས་སུ་གྱུར་འདུག །