ཕྱི་ལོ་ ༢༠༢༠ ཟླ་ ༧ ཚེས་ ༡༦ རེས་གཟའ་པ་སངས། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༡༦ རེས་གཟའ་ཕུར་བུའི་ཉིན་ཨིན་ཡུལ་དུ་རྟེན་གཞི་བྱས་པའི་ཧེན་རི་ཇེག་སོན་ཚོགས་པ་ Henry Jackson Society དང་ Christian Solidarity Worldwide ཞེས་པའི་ཚོགས་པ་གཉིས་ཟུང་སྦྲེལ་ཐོག་རྒྱ་ནག་ནང་ཆོས་དད་རང་དབང་ལ་དམ་བསྒྲགས་བྱེད་བཞིན་པའི་གནས་སྟངས། Religious Freedom in China: A Spotlight on Repression ཞེས་པའི་བརྗོད་གཞིའི་ཐོག་དྲྭ་རྒྱའི་ལམ་ནས་བགྲོ་གླེང་ཞིག་གོ་སྒྲིག་གནང་ཡོད།

སྐབས་དེར་ཨིན་ཡུལ་སྐུ་ཚབ་དོན་གཅོད་བསོད་ནམས་ཚེ་རིང་ཕར་སི་ལགས་མཉམ་ཞུགས་ཀྱིས་རྒྱ་ནག་དམར་པོའི་གཞུང་གིས་ཆོས་དད་རང་དབང་ལ་བརྩི་མེད་རྡོག་རོལ་དང་དྲག་གནོན་ཇེ་ཆེར་གཏོང་བཞིན་ཡོད་སྐོར་དང་། རྒྱ་ནག་གཞུང་གིས་ཁྲིམས་དང་མི་མཐུན་པའི་ཐོག་ནས་བོད་ས་བཙན་བཟུང་བྱས་པ་ཙམ་མ་ཟད། བོད་མིའི་རིག་གཞུང་རྩ་མེད་བཟོས་པ། ཆོས་དད་རང་དབང་མེད་པ། དགོན་སྡེ་ཁག་གཏོར་བཤིག བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ལམ་ལུགས་ལ་ཐེ་བྱུས། རྒྱལ་ཞེན་གྱི་ཐོག་ནས་སློབ་གསོ་ངན་པ་བརྒྱབ་པ་སོགས་ཀྱི་བྱ་སྤྱོད་ངན་པ་སྤེལ་བཞིན་ཡོད་པ་དང་། ཕྱོགས་མཚུངས་རྒྱ་ནག་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༦ ལ་སོན་སྐབས་བཙན་བཟུང་བྱས་ཏེ་ད་བར་གར་སོང་ཆ་མེད་དུ་གྱུར་ཡོད་སྐོར་སོགས་གསུངས།

བགྲོ་གླེང་ཐོག་ཤིན་ཅང་གི་སྐུ་ཚབ་ Dolkun Isa ལགས་དང་། Hong Kong watch ཞེས་པའི་ཚོགས་པའི་ཚོགས་གཙོ་དང་ Christian Solidarity Worldwide ཞེས་པའི་ཚོགས་པའི་འགྲོ་བ་མིའི་ཐོབ་ཐང་ཚན་པའི་སྐུ་ཚབ་ Mr Benedict Rogers ལགས་བཅས་མཉམ་ཞུགས་གནང་ཡོད།

སྤྱིར་ཧེན་རི་ཇེག་སོན་ཚོགས་པ་དེ་ནི་ཨིན་ཡུལ་དུ་ཡོད་པའི་བསམ་མཛོད་བསྟི་གནས་ཁང་ཞིག་ཡིན་པ་དང་། ཚོགས་པ་དེས་འཛམ་གླིང་ཡོངས་ལ་གུ་ཡངས་ལྡན་པའི་མང་གཙོ་གོང་འཕེལ་གཏོང་ཐབས་གནང་བཞིན་ཡོད། ད་ཆ་དམིགས་ཡུལ་གཙོ་བོ་ནི་མང་གཙོའི་ལམ་ལུགས་ལ་རྒྱབ་སྐྱོར་ཡོད་པའི་ཐོག་ནས་རྒྱ་ནག་དང་ཨུ་རུ་སུའི་དྲག་གནོན་ལས་ཇི་ལྟར་གདོང་ལེན་བྱེད་དགོས་ཕྱོགས་སྐོར་ལ་ཡིན་འདུག་པ་བཅས། །