༄༅། །ཕྱི་ལོ་ ༢༠༢༠ ཟླ་ ༧ ཚེས་ ༢༠ ཉིན་ཨི་ཊ་ལིའི་གྲོས་ཚོགས་འཐུས་མི་སྐུ་ཞབས་མེ་ཊེའོ་ Matteo Lungi Bianchi མཆོག་གིས། ཨི་ཊ་ལིའི་གྲོས་ཚོགས་སུ་ཨི་ཊ་ལིའི་གཞུང་གིས་རྒྱ་ནག་ཐོག་འཛིན་བཞིན་པའི་སྲིད་བྱུས་དང་འབྲེལ་བའི་གནད་དོན་སྐོར་འདྲི་རྩད་གནང་ཡོད་པ་དང་། སྐབས་དེར་སྐུ་ཞབས་མེ་ཊེའོ་མཆོག་གིས། ཨི་ཊ་ལིའི་གཞུང་གིས་རྒྱ་ནག་གི་གནད་དོན་ཐོག་ཅི་ཡང་མི་བརྗོད་པར་འཇམ་ཐིང་ངེ་བཞུགས་དགོས་པ་གལ་ཆེན་པོ་ཆགས་ཡོད་དམ། ཞེས་བཀའ་འདྲི་གནང་ཡོད།
དེ་ཡང་ཨི་ཊ་ལིའི་གྲོས་ཚོགས་འཐུས་མི་སྐུ་ཞབས་མེ་ཊེའོ་མཆོག་གིས། རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་སྲུང་སྐྱོབ་བཅའ་ཁྲིམས་ཞེས་པ་ཞིག་གཏན་འབེབས་བྱས་ཡོད་པ་དང་། ཨི་ཊ་ལི་གཞུང་གིས་གནད་དོན་དེའི་ཐད་ལངས་ཕྱོགས་ཅི་ཡིན་ཁ་གསལ་བཟོ་དགོས་པ་དང་། ཨི་ཊ་ལིའི་ཚོང་རོགས་རྒྱ་ནག་གིས་གཞི་རྩའི་འགྲོ་བ་མིའི་ཐོབ་དང་མང་གཙོའི་རིན་ཐང་རྩིས་མེད་རྡོག་རོལ་གཏོང་བཞིན་ཡོད་པས། ང་ཚོས་བཟོད་བསྲན་གནང་ཐབས་མེད། རྒྱ་ནག་གིས་ཐེ་ཝན་ལ་བཙན་འཛུལ་གྱིས་མཐའ་སྐོར་བྱེད་བཞིན་ཡོད་པ་མ་ཟད། བོད་དང་། ཧོང་ཀོང་སོགས་ལ་དྲག་གནོན་བྱས་དང་བྱེད་བཞིན་ཡོད།
རྒྱ་ནག་གི་དྲག་གནོན་འོག་སྡུག་གྱོང་མྱོང་མཁན་རྗེས་མ་དེ་སུ་ཡིན་དགོས་རེད་དམ། རྒྱ་ནག་གཞུང་གིས་གོམས་སྲོལ་རྙིང་པ་བསྒྱུར་བཅོས་ཞེས་པའི་ལས་འགུལ་འོག་བོད་ཀྱི་རི་སྒང་དུ་མ་ཎི་རྡོ་བརྐོས་དང་དར་ལྕོག་སོགས་གཙང་བཟོ་བྱེད་དགོས་པའི་བཙན་བཀའ་བཏང་ཡོད། ང་ཚོས་ད་དུང་ཡུན་རིང་བསྒུག་དགོས་རེད་དམ། སྟོབས་ལྡན་རྒྱལ་ཁབ་བདུན་གྱི་ཚོགས་མི་ཨ་ཊ་ལི་ལྟ་བུར་མཚོན་ན་རྒྱ་ནག་གི་དྲག་གནོན་ལ་ཁ་ནས་ངོ་རྒོལ་ཡོད་ཅེས་བཤད་པ་ཙམ་མ་ཡིན་པར། དོན་དངོས་དང་མཐུན་པའི་ལངས་ཕྱོགས་ཅི་ཡིན་འཕྲལ་དུ་གསལ་པོ་བཟོ་དགོས། ཞེས་དང་།
གཞན་ཡང་སྐུ་ཞབས་མེ་ཊེའོ་མཆོག་གིས། རྒྱ་ནག་གི་རྒྱ་སྐྱེད་རིང་ལུགས་ཀྱི་སྲིད་བྱུས་ལ་བརྟེན་ནས་འཛམ་གླིང་ཡོངས་ལ་ཉེན་ཁ་འབྱུང་བཞིན་ཡོད་སྟབས། འཕྲལ་དུ་ཉེན་ཁ་དེ་བཀག་འགོག་མ་བྱས་ཚེ་མ་འོངས་པར་འཛམ་གླིང་ཡོངས་ལ་ཆག་སྒོ་ཆེན་པོ་འབྱུང་སྲིད་པའི་ཉེན་བརྡའི་ཚུལ་དུ་གསུངས།།
