ཕྱི་ལོ་ ༢༠༢༠ ཟླ་ ༧ ཚེས་ ༢༨ རེས་གཟའ་མིག་དམར།
༄༅། །ནེའུ་ཡོག་དང་ནེའུ་འཇར་སི་བོད་རིགས་སྤྱི་མཐུན་ཚོགས་པས་མགྲོན་འབོད་ལྟར། ཕྱི་ལོ་ ༢༠༢༠ ཟླ་ ༧ ཚེས་ ༢༥ རེས་གཟའ་སྤེན་པའི་ཉིན་བྱང་ཨ་རིའི་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་དོན་གཅོད་དངོས་གྲུབ་ཚེ་རིང་ལགས་ཀྱི་ཚབ་ཞུས་ཏེ་ས་གནས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་གསར་རྙིང་དབར་རྩིས་སྤྲོད་རྩིས་ལེན་གྱི་དམ་འབུལ་མཛད་སྒོར་མཉམ་ཞུགས་ཀྱིས་སྤྲོད་དཔང་གནང་ཡོད།
དེ་ཡང་ནེའུ་ཡོག་དང་ནེའུ་འཇར་སི་བོད་རིགས་སྤྱི་མཐུན་ཚོགས་པ་སྐབས་ ༡༧ པའི་འདེམས་ཐོན་ཚོགས་མི་ ༡༣ ནས་ཚོགས་མི་ ༥ བུད་མེད་ཡིན་པ་དང་། དེ་དག་གི་ཁོངས་ནས་ལྷ་དབང་དངོས་གྲུབ་ལགས་ཚོགས་གཙོ་དང་ཡེ་ཤེས་འཇིགས་མེད་ལགས་ཚོགས་གཞོན་དུ་བདམས་ཐོན་བྱུང་འདུག
ཕྱི་ཚེས་ ༢༧ ཉིན་ལས་འཁུར་དམ་འབུལ་གྱི་མཛད་སྒོའི་སྐུ་མགྲོན་གཙོ་བོ་བྱང་ཨ་རིའི་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་ཀྱིས་ཚོགས་མི་གསར་རྙིང་རྣམས་ལ་འཚམས་འདྲི་ཞུས་པ་དང་འབྲེལ་སྐབས་ ༡༦ པའི་ཚོགས་མི་རྣམས་ནས་ཚོགས་པའི་ངོ་བོ་དང་དམིགས་ཡུལ་གཞིར་བཟུང་གཟེངས་སུ་ཐོན་པའི་ཕྱག་ལས་སྣ་མང་སྤེལ་བར་བསྔགས་བརྗོད་དང་། ཚོགས་གཙོ་ཟུར་པ་བསོད་ནམས་ལགས་ཀྱི་སྣེ་ཁྲིད་འོག་བོད་རིགས་སྤྱི་མཐུན་ཚོགས་པས་དོན་ཁང་དང་ལྷན་དུ་འབྲེལ་བ་དམ་ཟབ་བཞག་པར་བྱང་ཨ་རིའི་སྐུ་ཚབ་དོན་ཁང་གི་ཚབ་ཞུས་ཏེ་ཐུགས་རྗེ་ཆེ་ཞུས།
གཞན་ཡང་བཀྲ་ཤིས་དོན་གྲུབ་ལགས་ཀྱིས་ས་གནས་བོད་རིགས་སྤྱི་མཐུན་ཚོགས་པའི་དགོས་དམིགས་གཞིར་བཞག་ཐོག་ཚོགས་མི་ནང་ཁུལ་འབྲེལ་ལམ་དམ་ཟབ་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་དང་། ཨ་རིའི་དོན་གཅོད་ཁང་ལྷན་དུ་མུ་མཐུད་འབྲེལ་བ་གནང་རོགས་ཞེས་འབོད་སྐུལ་ཞུས་ཡོད་པ་མ་ཟད། ནེའུ་ཡོག་དང་ནེའུ་འཇར་སིའི་ས་གནས་མི་མང་དང་ཚོགས་པ་སྐྱིད་སྡུག་བཅས་ནས་སྐབས་ ༡༧ པའི་ནེའུ་ཡོག་དང་ནེའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་མིར་རྒྱབ་སྐྱོར་གནང་དགོས་པ་དང་། བསླེབ་ལ་ཉེ་བའི་བོད་མིའི་སྒྲིག་འཛུགས་ཀྱི་འོས་བསྡུ་ཆེན་མོ་དང་། དྭང་བླངས་དཔྱ་དངུལ་དུས་ཐོག་འབུལ་དགོས་པའི་གལ་གནད་སོགས་ཀྱི་སྐོར་གསུངས། །
