ཕྱི་ལོ་ ༢༠༢༠ ཟླ་ ༧ ཚེས་ ༩ རེས་གཟའ་ཕུར་བུ།
༄༅། །ཨ་རིའི་ཕྱི་སྲིད་དྲུང་ཆེ་སྐུ་ཞབས་མ་ཡི་ཀི་པོམ་པེའོ་ Michael R. Pompeo མཆོག་གིས་ཕྱི་ལོ་ ༢༠༢༠ ཟླ་ ༧ ཚེས་ ༧ ཉིན་རྒྱ་ནག་གཞུང་གི་དཔོན་རིགས་དང་རྒྱ་ནག་དམར་ཤོག་ཚོགས་པའི་ལས་བྱེད་ཁག་གཅིག་གིས་ཨ་རི་གཞུང་གི་གཞུང་ཚབ་མི་སྣ་དང་། ལས་བྱེད། གསར་འགོད་པ། ཡུལ་སྐོར་སྤྲོ་འཆམ་པ་སོགས་བོད་རང་སྐྱོང་ལྗོངས་ཀྱིས་གཙོས་བོད་ཀྱི་ས་ཁུལ་གཞན་ཁག་གི་ནང་བསྐྱོད་པར་བཀག་འགོག་བྱེད་བཞིན་ཡོད་པར་བརྟེན། ཨ་རིའི་གཞུང་གིས་རྒྱ་ནག་གཞུང་གི་དཔོན་རིགས་དང་རྒྱ་ནག་དམར་ཤོག་ཚོགས་པའི་ལས་བྱེད་ཁག་གཅིག་ལ་མཐོང་མཆན་གནང་ཕྱོགས་ཐད་དམ་བསྒྲགས་གནང་རྒྱུ་ཡིན་པའི་གསར་འགོད་གསལ་བསྒྲགས་གནང་ཡོད་པ་དང་།
ཕྱི་ལོ་ ༢༠༢༠ ཟླ་ ༧ ཚེས་ ༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་རྒྱ་གར་གྱི་རི་པ་བྷི་ལིག་ Republic TV ཞེས་པའི་གྲགས་ཅན་གྱི་བརྙན་འཕྲིན་ཁང་གི་གསར་འགྱུར་རྩོམ་སྒྲིག་པ་སྐུ་ཞབས་ནི་རན་ཇན་ Niranjan ལགས་ཀྱིས་ཨ་རིའི་ཕྱི་སྲིད་དྲུང་ཆེ་མཆོག་གི་གསར་འགོད་གསལ་བསྒྲགས་དང་འཕགས་བོད་ས་མཚམས་སོགས་ཀྱི་སྐོར་བཅར་འདྲི་ཞུས་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན། རྒྱ་ནག་གཞུང་གིས་བོད་དང་། ཤར་ཏུར་ཀི་སི་ཐན། ཧོང་ཀོང་། ལྷོ་སོག་བཅས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་སྟབས། དེའི་ཐད་རྒྱལ་སྤྱིའི་ཚོགས་སྡེ་ཁག་ནས་ཁ་གཅིག་གྲག་ཐོག་རྒྱ་ནག་གཞུང་ལ་འགན་ཁུར་བྱེད་འཇུག་དགོས་པའི་བསམ་ཚུལ་ཤུགས་ཆེ་རུ་སླེབ་བཞིན་ཡོད།
ཉེ་ཆར་ཡུ་རོབ་སྤྱི་མཐུན་ཚོགས་པ་དང་རྒྱ་ནག་གི་མཐོ་རིམ་མི་སྣ་ཆེ་ཁག་གི་དབར་གྲོས་མོལ་ཚོགས་འདུ་འཚོགས་སྐབས། ཡུ་རོབ་སྤྱི་མཐུན་ཚོགས་པས་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐོར་གླེང་སློང་གནང་ཡོད་པ་མ་ཟད། མཉམ་འབྲེལ་རྒྱལ་ཚོགས་ཀྱི་དམིགས་བསལ་ལས་དོན་ཚོགས་ཆུང་ Special Procedure Mandate Holders གི་འགྲོ་བ་མིའི་ཐོབ་ཐང་ཐོག་རང་དབང་གི་ཆེད་མཁས་པ་གྲངས་ ༥༠ ཙམ་ནས་རྒྱ་ནག་གཞུང་ལ་ཁོང་ཚོ་བོད་ཀྱི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་རྟོག་ཞིབ་སླད་བོད་ནང་བསྐྱོད་འདོད་ཡོད་པའི་སྐོར་གསུངས་ཡོད། ཅེས་དང་།
སྐུ་ཞབས་ནི་རན་ཇན་ Niranjan ལགས་ཀྱིས། འདས་པའི་ཉིན་ཤས་རིང་རི་པ་བྷི་ལིག་བརྙན་འཕྲིན་ཁང་གིས་འཕགས་བོད་ས་མཚམས་སུ་རྒྱ་དཀར་ནག་དབར་རྩོད་རྙོག་དང་འབྲེལ་བའི་བོད་པ་ཚོས་རྒྱ་གར་གྱི་ཕྱོགས་སུ་ལངས་ནས་ཕྱི་རྒྱལ་ཁག་ཏུ་ཡོད་པའི་རྒྱ་ནག་གི་གཞུང་ཚབ་ཁང་གི་མདུན་དུ་ངོ་རྒོལ་གནང་བཞིན་པའི་བརྙན་ཐུང་ཕྱོགས་བསྡུས་བྱས་པ་ཡིན། དེ་བཞིན་དེ་རིང་སྔ་དྲོ་རང་ང་ཚོས་ཨ་རི་གཞུང་གིས་རྒྱ་ནག་གཞུང་གི་དཔོན་རིགས་དང་རྒྱ་ནག་དམར་ཤོག་ཚོགས་པའི་ལས་བྱེད་ཁག་གཅིག་ལ་མཐོང་མཆན་གནང་ཕྱོགས་ཐད་དམ་བསྒྲགས་གནང་རྒྱུ་ཡིན་པའི་གསར་འགོད་གསལ་བསྒྲགས་གནང་བ་མཐོང་སོང་། རྒྱ་གར་གཅིག་པུ་མ་ཡིན་པ་ཨ་རིས་གཙོས་འཛམ་གླིང་གི་རྒྱལ་ཁབ་མང་པོས་བོད་མིའི་འཐབ་རྩོད་སྐོར་དོ་སྣང་དང་རྒྱབ་སྐྱོར་ཆེན་པོ་གནང་བཞིན་འདུག་ཅེས་གསུངས་པར།
དཔལ་ལྡན་སྲིད་སྐྱོང་མཆོག་གིས། འཕགས་བོད་ས་མཚམས་སུ་རྒྱ་དཀར་ནག་དབར་རྩོད་རྙོག་བྱུང་བ་དང་འབྲེལ་ཨ་རིའི་ནེའུ་ཡོག་དང་ཁེ་ན་ཌའི་ཊོ་རོན་ཊོ་གྲོང་ཁྱེར་སོགས་ཀྱི་ནང་བོད་མི་ཚོས་རྒྱ་གར་ལ་གདུང་སེམས་མཉམ་སྐྱེ་གནང་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མགོན་པོ་གང་ཉིད་མཆོག་རྒྱ་གར་གྱི་བུ་ཞིག་ཡིན། ཞེས་སྤོབས་པ་མཐོ་པོའི་སྒོ་ནས་གསུང་གི་ཡོད། དེ་བཞིན་བཙན་བྱོལ་བོད་མི་ཚོས་ཀྱང་གཏོང་ཕོད་ཅན་གྱི་རྒྱ་གར་གཞུང་མང་གཉིས་ལ་གདུང་སེམས་མཉམ་སྐྱེ་ཞུ་བཞིན་ཡོད། ཨ་རི་གཞུང་མང་གཉིས་ནས་དུས་རྟག་ཏུ་བོད་དོན་དང་བོད་མིའི་ཆེད་དུ་རྒྱབ་སྐྱོར་ཤུགས་ཆེ་གནང་དང་གནང་བཞིན་ཡོད་པའི་སྐོར་གསུང་།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་ཀྱི་གནད་དོན་གལ་ཆེན་དུ་རྩི་བཞིན་ཡོད་པ་ལྟར། རྒྱ་གར་གཞུང་གིས་ཀྱང་བོད་ཀྱི་གནད་དོན་དེ་གལ་ཆེན་དུ་བརྩི་རོགས། འཕགས་བོད་དབར་བླ་སློབ་དང་རིག་གཞུང་སོགས་ཀྱི་འབྲེལ་བ་ཡོད། རྒྱ་གར་གྱི་གསར་འགྱུར་བརྒྱུད་ལམ་ཁག་གིས་རྒྱ་དཀར་ནག་གི་ས་མཚམས་ཞེས་པའི་ཚབ་ཏུ་འཕགས་བོད་ས་མཚམས་ཞེས་བརྗོད་དགོས་པའི་གནད་དོན་སོགས་ཀྱི་སྐོར་གསུངས།།
