ཕྱི་ལོ་ ༢༠༢༠ ཟླ་ ༧ ཚེས་ ༩ རེས་གཟའ་ཕུར་བུ།

༄༅། །འདི་གར་ཧོན་རབ་རྒྱས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། བོད་རྒྱལ་ལོ་ ༢༡༤༧ རབ་གནས་ལྕགས་བྱི་ལོའི་བོད་ཟླ་ ༥ ཚེས་ ༡༦ དང་ཕྱི་ལོ་ ༢༠༢༠ ཟླ་ ༧ ཚེས་ ༦ རེས་གཟའ་ཟླ་བའི་ཉིན་ཧོན་སུར་རབ་རྒྱས་གླིང་བོད་མིའི་གཞིས་སྒར་དུ་ལྷར་བཅས་སྲིད་ཞིའི་གཙུག་རྒྱན་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཐམས་ཅན་མཁྱེན་ཅིང་གཟིགས་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་ལྔར་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུར། ད་ལྟའི་ནད་ཡམས་ཁྱབ་བརྡལ་གྱི་རྐྱེན་པས་མི་མང་ཚང་འཛོམས་ཀྱི་མཛད་སྒོ་རྒྱས་པ་འཚོགས་རྒྱུའི་གནས་སྟངས་མེད་ནའང༌། ས་གནས་ཀྱི་མཛད་གཙོ་རྣམ་པ་ཚང་འཛོམས་ཐོག་སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་གདན་ཞུས་ཀྱིས་དཔལ་ལྡན་སྨད་རྒྱུད་གྲྭ་ཚང་གི་བསྟན་སྲུང་ཆེན་མོའི་རྟེན་མཁར་མདུན་ཐང་དུ་བསང་གསོལ་དང་ལྷ་རྒྱལ་གཟབ་རྒྱུས་ཞུས།

མཛད་སྒོ་དངོས་གཞིའི་སྐབས་དཔལ་ལྡན་བཀའ་ཤག་དང་དཔལ་ལྡན་བོད་མི་མང་སྤྱི་འཐུས་ལྷན་ཚོགས་གཉིས་ཀྱི་གསུང་འཕྲིན་དེ་བཞིན་ས་གནས་འགོ་འཛིན་དང་ཕྱོགས་ཞུགས་སྤྱི་འཐུས་བཅས་ནས་སྒྲོག་སྦྱང་ཞུས་པ་དང་། སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་ནས་དུས་ཆེན་དང་འབྲེལ་བའི་གསུང་བཤད་གནང་བ་སོགས་གཞུང་འབྲེལ་མཛད་སྒོ་ཚགས་ཚུད་ཞུས་ཐུབ་པ་བྱུང་ཡོད།

མཛད་སྒོ་གྲོལ་རྗེས་སྐུ་མགྲོན་གཙོ་བོ་གཙོས་ཕྱོགས་ཞུགས་སྤྱ་འཐུས་གཉིས་དང་དགོན་སྡེ་ཁག་གི་མཁན་པོ་བཅས་ནས་རྟེན་འབྲེལ་མཚོན་སླད་འབྲས་ཡོད་ཤིང་སྡོང་འདེབས་འཛུགས་ཞུས་ཡོད།

གཞན་ཡང་དབུས་བོད་མིའི་སྒྲིག་འཛུགས་ནས་བཀོད་མངགས་ཕེབས་པ་ལྟར། ས་གནས་འགོ་འཛིན་ལས་ཁུངས་ནས་འབྲས་ཡོད་ཤིང་སྡོང་གྲངས་ ༡༡༣ གྲོང་སྡེ་སོ་སོར་བགོ་འགྲེམས་ཀྱིས་༸རྒྱལ་བའི་འཁྲུངས་སྐར་ཉིན་འདེབས་འཛུགས་བྱས་ཡོད་པ་མ་ཟད་མི་སྒེར་སོ་སོ་ནས་ཁྱོན་ཤིང་སྡོང་གྲངས་ ༡༡༩ ལྷག་འདེབས་འཛུགས་བྱས་ཡོད་པ་བཅས། །