སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་མཐུན་ཚོགས་ལ་གསུང་འཕྲིན་སྩལ་བ།

གསར་ལས་ཁང་གི་གསར་འགོད་པས།

༢༠༢༠-༠༧-༢༢

ཕྱི་ལོ་ ༢༠༢༠ ཟླ་ ༧ ཚེས་ ༢༢ རེས་གཟའ་ལྷག་པ།

༄༅། །ཡུ་རོབ་མཉམ་འབྲེལ་ཁྱབ་ཁོངས་རྒྱལ་ཁབ་ཁག་གི་ནང་ཏོག་དབྱིབས་གཉན་རིམས་ཀྱི་དཀའ་ངལ་སེལ་སླད་ཡུ་རོབ་མཉམ་འབྲེལ་གྱི་རྒྱལ་ཁབ་ཉེར་བདུན་གྱི་དབུ་ཁྲིད་རྣམས་ལྷན་འཛོམས་ཀྱིས་ཏོག་དབྱིབས་གཉན་རིམས་ལ་གདོང་ལེན་བྱེད་ཐབས་སྐོར་བཀའ་སྡུར་ལྷུག་པོ་གནང་སྟེ། ངལ་སེལ་རོགས་དངུལ་ཡོ་སྒོར་ཐེར་འབུམ་ ༧༥༠ ཐམ་པ་གཏང་རྒྱུར་གྲོས་མཐུན་བྱུང་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་སྩལ་དོན། བར་ལམ་ནད་ཡམས་ཀྱི་རྐྱེན་པས་རྒྱལ་ཁབ་གང་སར་དཀའ་ངལ་ཆེན་པོ་འཕྲད་པར་བརྟེན། ཡུ་རོབ་མཉམ་འབྲེལ་གྱི་ཁྱབ་ཁོངས་རྒྱལ་ཁབ་ཁག་གི་ནང་དཀའ་ངལ་སེལ་བའི་ཆེད་དུ་ཉིན་ཤས་རིང་ཡུ་རོབ་མཉམ་འབྲེལ་གྱི་རྒྱལ་ཁབ་ཉེར་བདུན་གྱི་དབུ་ཁྲིད་རྣམས་ལྷན་འཛོམས་ཀྱིས་གདོང་ལེན་བྱེད་ཐབས་བཀའ་སྡུར་ལྷུག་པོར་གནང་འབྲས་སུ། རྒྱལ་ཁབ་སྤྱི་ཡོངས་ཀྱི་བདེ་དོན་ལ་དགོངས་བཞེས་གྲོས་མཐུན་གང་ལེགས་བྱུང་བར་ངོས་རང་དགའ་ཚོར་ཆེན་པོ་བྱུང་།

གོང་གསལ་ཐག་གཅོད་དེས་ཡུ་རོབ་མཉམ་འབྲེལ་གྱི་རྒྱལ་ཁབ་རྣམས་ནས་དངོས་ཡོད་གནས་ཚུལ་དང་ཕུགས་རྒྱང་རིང་པོར་བསམས་ནས་སྤྱི་པའི་བདེ་དོན་ལ་དགོངས་པ་བཞེས་རྒྱུ་གལ་ཆེན་པོ་ཡིན་པ་བསྟན་པ་ཡིན། ངོས་ཀྱིས་རྒྱུན་དུ་རྗོད་མུས་ལྟར། ཡུ་རོབ་མཉམ་འབྲེལ་གྱིས་སྤྱི་པའི་བདེ་དོན་སྒྲུབ་པའི་རྣམ་པ་གསལ་པོར་བསྟན་པ་ནི་གཟི་བརྗིད་དང་ཡི་རང་བྱེད་འོས་པ་ཞིག་ཡིན།

དེ་ལྟ་བུའི་གལ་ཆེའི་གནད་དོན་ཐོག་གྲུབ་འབྲས་གང་ལེགས་བྱུང་བ་ལྟར། མ་འོངས་པར་ཡང་ཁོར་ཡུག་གི་དཀའ་ངལ་སོགས་ཚབས་ཆེའི་དཀའ་ངལ་ཁག་ལའང་གདོང་ལེན་བྱེད་ཚེ་གྲུབ་འབྲས་དེ་ལྟ་བུ་ཐོན་པའི་རེ་བ་དང་། སྙིང་སྟོབས་ལྡན་པའི་ཡུ་རོབ་མཉམ་འབྲེལ་གྱི་སྒྲིག་འཛུགས་དེ་རྒྱལ་ཁབ་གཞན་གྱི་མིག་དཔེ་ལྟ་ས་ཞིག་ཏུ་འགྱུར་བའི་ཡིད་ཆེས་ཡོད། ཏཱ་ལའི་བླ་མས། ཕྱི་ལོ་ ༢༠༢༠ ཟླ་ ༧ ཚེས་ ༢༢ ལ།།

གསར་གནས།