ཕྱི་ལོ་ ༢༠༢༠ ཟླ་ ༧ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་ལྔར་ཕེབས་པའི་སྐུའི་འཁྲུངས་སྐར་དུས་ཆེན་ཐོག་དཔལ་ས་སྐྱ་༸གོང་མ་ཁྲི་འཛིན་རིན་པོ་ཆེ་མཆོག་གིས་གསུང་འཕྲིན་གནང་དོན།
ལྷར་བཅས་སྲིད་ཞིའི་གཙུག་རྒྱན། ༧གོང་ས་ལྷ་མིའི་རྣམ་འདྲེན། ༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞབས་ཀྱི་པད་མོར་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས། ད་རེས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་ངོ་མཚར་མཚན་དཔེའི་གཟུགས་སྐུ་གསར་དུ་བཞད་ནས་དགུང་གྲངས་༨༥ ཧྲིལ་པོར་འཁོར་བའི་དུས་བཟང་ཁྱད་པར་ཅན་གྱི་དགའ་སྟོན་འདིའི་ཐོག་ངས་དཔལ་ལྡན་ས་སྐྱ་པའི་ཆོས་བརྒྱུད་ཡོངས་ཀྱི་སྐུ་ཚབ་ཞུས་ནས་དད་གུས་ཆེན་པོའི་མཚོ་ལས་སྐྱེས་པའི་བཀྲ་ཤིས་སྨོན་ཚིག་གི་མེ་ཏོག་མངོན་པར་འཐོར་བ་དང་ལྷན་ཅིག་མགོན་པོ་མཆོག་བསྟན་འགྲོའི་དོན་དུ་སྐུ་ཚེ་ཞབས་པད་བསྐལ་བརྒྱར་བརྟན་པའི་གསོལ་འདེབས་ཞུ་བ་དང་། ཆབས་ཅིག་མཛད་སྒོའི་ཐོག་དངོས་སུ་ཕེབས་པའི་དཔལ་ལྡན་སྲིད་སྐྱོང་གིས་དབུས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། དྲྭ་ལམ་བརྒྱུད་གསན་གཟིགས་གནང་མཁན་ཡོངས་ལ་མཛའ་བརྩེའི་མཚམས་འདྲི་དང་འབྲེལ་བའི་ཐོག་ནས་བཀྲ་ཤིས་བདེ་ལེགས་ཞུ་གྱི་ཡོད།
དབུས་བོད་མིའི་སྒྲིགས་འཛུགས་ནས་ད་ལམ་༧རྒྱལ་བའི་བཀའ་དྲིན་རྗེས་དྲན་གྱི་ལོ་སྲུང་རྩི་ཞུ་བའི་སྐབས་ཀྱི་འཁྲུངས་སྐར་དུས་ཆེན་ཉིན་ཞུ་ཡ་ལ། བདག་ཅག་གི་སྟོན་པ་བཅོམ་ལྡན་འདས་ཀྱིས་སྔོན་སློབ་པ་ལམ་གྱི་གནས་སྐབས་སུ་མ་འོངས་པ་ན་སེམས་ཅན་ཚེ་ཐུང་བ་དང་ཉོན་མོོངས་པ་མང་བ་དང་ནད་མུག་འཁྲུག་རྩོད་མང་པོ་ཡོད་པའི་སྐབས་ཀྱི་མི་ཡུལ་གྱི་སེམས་ཅན་འདུལ་དཀའ་བ་རྣམས་འདུལ་བའི་ཐུགས་སྨོན་མཛད་པ་ལ་བརྟེན་ནས་རྩོད་ལྡན་ཚེ་ལོ་བརྒྱ་པའི་དུས་སུ་ཆེད་དུ་དགོངས་ནས་བྱོན་པ་ནང་བཞིན། ༧རྒྱལ་མཆོག་སྐུ་འཕྲེང་བཅུ་བཞི་པ་ཆེན་པོ་མཆོག་ཀྱང་དུས་ཚོད་གཉན་འཕྲང་ཅན་འདི་ལྟ་བུའི་སྐབས་སུ་བསྟན་འགྲོའི་མགོན་སྐྱབས་མཚུངས་ཟླ་མ་འཆིས་པའི་ངོ་བོར་ཆེད་དུ་དགོངས་ནས་བྱོན་པ་ཞིག་རེད། ༧རྒྱལ་བ་རིན་པོ་ཆེ་ང་རང་ཚོ་སློབ་མ་རྣམས་དང་སངས་རྒྱས་པ་ཡོངས་ཀྱི་༧སྤྱི་ནོར་ཙམ་མ་ཡིན་པ། འཛམ་གླིང་སྐྱེ་འགྲོ་ཡོངས་ཀྱི་སྤྱི་ནོར་རེད།
༧རྒྱལ་བ་རིན་པོ་ཆེའི་མཛད་པ་རྣམ་ཐར་བསམ་གྱིས་མི་ཁྱབ་པ་ཡོད་པའི་ནང་ནས་ཆ་ཤས་ཙམ་ཞུས་ན། དགུང་གྲངས་བཅུ་དྲུག་ཐོག་གངས་ལྗོངས་༧ལྷ་མིའི་རྣམ་འདྲེན་དམ་པར་མངའ་གསོལ་ནས་ཆོས་སྲིད་གཉིས་ཀྱི་དབུ་ཁྲིད་ཐུགས་འགན་གཙང་མ་བཞེས་པ་ནང་བཞིན། གངས་ཅན་བསྟན་འགྲོ་ཡོངས་ཀྱི་འཕྲལ་དང་ཕུགས་ཀྱི་དོན་དུ་རླབས་ཆེན་གྱི་མཛད་འཕྲིན་མཐའ་ཡས་པ་བསྐྱངས་ཡོད་པ་དང། བོད་ཀྱི་ཆོས་བརྒྱུད་རིས་སུ་མ་ཆད་པའི་བླ་ཆེན་རྣམ་པའི་སྐུ་མདུན་ནས་གཞུང་ཆེན་དང་གསང་སྔགས་གསར་རྙིང་གི་དབང་ལུང་ཟབ་ཁྲིད་སྙན་བརྒྱུད་མན་ངག་གསན་ནས་ཐུབ་བསྟན་ཡོངས་རྫོགས་ཀྱི་བདག་པོ་ཡིན་པ་དང། འཛམ་གླིང་ཤར་ནུབ་ཀྱི་ཡུལ་གྲུ་གང་སར་སྐུ་ངལ་འཛེམས་མེད་ཀྱི་ཐོག་ཆིབས་བསྒྱུར་བསྐྱངས་ནས་གདུལ་བྱ་གྲངས་ཚད་མེད་པ་ལ་སེམས་ཁམས་དང་འཚམ་པའི་བཀའ་ཆོས་བཀའ་དབང་དང་བཀའ་སློབ་ལམ་སྟོན་ཟབ་པ་དང་རྒྱ་ཆེ་བ་རྒྱུན་མི་ཆད་པ་བསྐྱངས་གནང་མཛད་པ་ཡིན་དུས། ༧རྒྱལ་མཆོག་སྐུ་འཕྲེང་རིམ་བྱོན་གྱི་མཛད་པ་ཐམས་ཅད་ཕྱོགས་གཅིག་ཏུ་བསྡུས་པ་ལས་ཀྱང་རྒྱ་ཆེ་བའི་མཛད་འཕྲིན་བསྐྱངས་ཡོད་རེད།
༡༩༥༡ ལོར་ལྷ་སར་ས་སྐྱ་༸གོང་མ་ཁྲི་ཆེན་རིན་པོ་ཆེ་དགུང་ལོ་ ༦ ཡིན་པའི་སྐབས་༸རྒྱལ་བ་རིན་པོ་ཆེའི་མཇལ་ཕྱག་ཞུས་གནང་བ་དང་འབྲེལ་སྤྱན་རས་གཟིགས་ཀྱི་བཀའ་དབང་གསན་གནང་བ་རེད། ༡༩༥༥ ལོར་སླར་ཡང་ལྷ་སར་རྒྱལ་བའི་གཟིམ་ཆུང་དུ་བྱང་ཆུབ་ལམ་རིམ་གསུང་ཆོས་དང་འཇིགས་བྱེད་དབང་ཆེན་དང་སྤྱན་རས་གཟིགས་དབང་ཆེན་དམག་ཟོར་རྒྱལ་མོའི་རྗེས་གནང་གསན་ནས་མཐའ་རྟེན་དུ་བརྟན་བཞུགས་བསྟར་འབུལ་ཞུས་གནང་སྐབས་མཎྜལ་ལྗགས་བཤད་མཛད་པ་ནས་བཟུང་ད་བར་བཀའ་ཆོས་བཀའ་དབང་དུ་མ་གསན་ནས་ཕན་ཚུན་ཐུགས་སྣང་ནོར་བུའི་འོོད་ཀྱི་ཁྱབ་པའི་བླ་སློབ་ཀྱི་འབྲེལ་བ་དམ་ཟབ་ཡོད་པ་དང་བཀའ་སྲུང་ཅི་འགྲུབ་ཞུས་གནང་བ་དང་མང་ཚོགས་ལ་ཡང་༸རྒྱལ་བ་རིན་པོ་ཆེའི་བཀའ་སྒྲུབ་དགོས་པ་གལ་ཆེན་པོ་ཡིན་པ་ཡང་ཡང་བཀའ་སློབ་སྩལ་དང་སྩོལ་གནང་བཞིན་པ་ཚང་མས་མཁྱེན་གསལ་ལྟར་རེད། ང་ཚོ་ཡང་ས་སྐྱ་༸གོང་མ་ཁྲི་ཆེན་རིན་པོ་ཆེའི་མཛད་པའི་རྗེས་སུ་འབྲངས་ནས་༸རྒྱལ་བ་རིན་པོ་ཆེའི་དབུ་ཁྲིད་འོག་ཤར་སྐྱོད་དང་འབྲེལ་བཀའ་དགོངས་ཚུལ་བཞིན་དུ་སྒྲུབ་རྒྱུ་ཡིན།
སྤྱིར་༸རྒྱལ་དབང་ཡིད་བཞིན་ནོར་བུས་སེམས་ཅན་ཐམས་ཅད་ལ་ཉེ་རིང་མེད་པ་ཐམས་ཅད་ཀྱི་ཆེད་དུ་བྱམས་པ་དང་སྙིང་རྗེ་ཚད་མེད་དང་བྱང་ཆུབ་སེམས་ཀྱི་ཉམས་བཞེས་དུས་རྟག་ཏུ་མཛད་པ་ཡིན་དུས་འགྲོ་བ་ཐམས་ཅད་མི་ཡིན་པ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་ཀྱི་ཐུགས་བསྐྱེད་ལ་བརྟེན་ནས་འཛམ་གླིང་ཁྱོན་ཡོངས་ལ་ཡ་རབས་བཟང་སྤྱོད་ཁྱབ་སྤེལ་མཛད་པའི་ཆེད་དུ་སྤྱི་ཚོགས་དང་། སེམས་ཚོར། བཟང་སྤྱོད་གསུམ་གྱི་ཤེས་ཡོན་སློབ་གསོའི་བསླབ་གཞི་རྩ་འཛིན་གཏན་འབེབས་མཛད་པ་དང་། རྩ་འཛིན་འདིའི་ཐོག་ལ་སོ་སོའི་ཆོས་ལུགས་དང་ཆོས་ལུགས་ལ་མ་བརྟེན་པའི་ལྟ་གྲུབ་སྦྱར་བའི་སློབ་ཚན་གྱི་ཐོག་ནས་ཆོས་ལུགས་དང་མི་རིགས་ཀྱི་དབྱེ་འབྱེད་མེད་པ་བཟང་སྤྱོད་ཡར་རྒྱས་སུ་བཏང་དང་གཏོང་གནང་བཞིན་པ་དེ་འཇིག་རྟེན་ཞི་བདེའི་བསྟི་གནས་སུ་བསྐྲུན་གནང་བའི་རླབས་ཆེན་གྱི་མཛད་པ་ཞིག་ཆགས་ཡོད་རེད། དེ་འདྲ་ཡིན་དུས་སྐྱེ་འགྲོ་ཀུན་ལ་མི་རིགས་དང་ལུང་ཚན་གྱི་དབྱེ་འབྱེད་མེད་པར་སྤྱིར་མི་ཞིག་ཡིན་པ་ཙམ་གྱི་ཆ་ནས་མིའི་བདེ་སྐྱིད་དགོས་པ་དང་། འཛམ་བུ་གླིང་ནང་གི་མི་ཐམས་ཅད་མི་ཞིག་ཡིན་པ་གཅིག་འགྱུར་གྱི་འདུ་ཤེས་བཞག་ནས་ཀུན་ལ་ཕན་བདེ་ཡོང་ཐབས་དང་། དེ་ཡང་གཙོ་བོ་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་དགོས་པ། དེ་ཡང་འཚེ་བ་མེད་པ་བྱམས་བརྩེ་ལ་བརྟེན་ནས་བསྒྲུབ་དགོས་པ་དང་དེ་དང་མཉམ་དུ་སྲོག་ཆགས་ཆེ་ཆུང་ཡོངས་ཀྱི་འཚོ་བ་དང་འབྲེལ་བའི་རང་བྱུང་ཁམས་ཀྱི་ཁོར་ཡུག་སྲུང་སྐྱོབ་དགོས་པ་དང་། འཇིག་རྟེན་སྤྱི་ཡོངས་ལ་འཁྲི་བའི་ལས་འགན་དགོས་པ་དང་ལྷག་པར་དུ་ང་ཚོ་སློབ་མ་རྣམས་ལ་གོང་དུ་ཞུས་པ་རྣམས་ཀྱིི་ཐོག་ལ་བྱང་ཆུབ་ཀྱི་སེམས་བསྒོམ་དགོས་པ་དང་། དེ་དང་དེའི་མཚོན་དད་ལྡན་གདུལ་བྱ་རྣམས་ལ་གསུངས་པའི་རྒྱལ་བའི་བཀའ་དེ་དག་ང་ཚོས་འགྲུབ་དགོས་རེད། བཀའ་སློབ་གནང་བ་བཞིན་དུ་ང་ཚོའི་ངོས་ནས་བསམ་པ་ངན་པ་ཉེ་རིང་ཆགས་སྡང་གི་རྣམ་རྟོག་སྤང་ནས་ཆོལ་ཁ་དང་ཆོས་ལུགས་ཀྱི་དབྱེ་འབྱེད་མེད་པ་བསམ་པ་བཟང་པོ་བྱམས་པ་དང་སྙིང་རྗེ་ཚད་མེད་དང་། བྱང་ཆུབ་ཀྱི་སེམས་ཉམས་སུ་བླང་པའི་སྒོ་ནས་འགྲུབ་དགོས་པ་དེ་ང་དང་ང་འདྲ་བའི་ཆོས་གྲོགས་རྣམས་ལ་དྲན་བསྐུལ་གྱི་ཚུལ་དུ་ཞུ་འདོད་བྱུང་།
དེ་ག་ནང་བཞིན་ཆོས་ལུགས་ཕན་ཚུན་མཐུན་སྒྲིལ་ཡོང་བའི་ཐུགས་བསྐྱེད་ལ་བརྟེན་ནས་འཛམ་གླིང་ཆོས་ལུགས་འདྲ་མིན་ཕན་ཚུན་མཐུན་སྒྲིལ་གོང་སྤེལ་མཛད་པའི་ཆེད་དུ་སྐུ་ངལ་འཛེམས་མེད་ཀྱི་ཐོག་ནས་ནང་པའི་དགོན་སྡེ་ཁག་ཙམ་དུ་མ་ཟད། ཆོས་ལུགས་གཞན་གྱི་བསྟི་གནས་ཁག་ལ་ཆིབས་བསྒྱུར་བསྐྱངས་པ་དང་བཀའ་སློབ་ལམ་སྟོན་མཛད་ནས་ནང་པ་མ་ཡིན་པ་རྣམས་ཀྱིས་ཀྱང་བཀའ་གསུང་ཅི་སྒྲུབ་ཞུས་པའི་སྐབས་འདིར་ང་ཚོ་སློབ་མའི་ངོས་ནས་ཆོས་ལུགས་མཐུན་སྒྲིལ་གྱི་བཀའ་དགོངས་ངེས་པར་དུ་འགྲུབ་དགོས་ཀྱི་ཡོད་རེད།
དེ་ག་ནང་བཞིན་མི་ལོ་ཆིག་སྟོང་ལྷག་གི་ལོ་རྒྱུས་རྩ་ཆེའི་རང་བཞིན་ལྡན་པའི་བོད་ཀྱི་ཆོས་དང་རིག་གཞུང་འཛིན་སྐྱོང་སྤེལ་གསུམ་མཛད་རྒྱུ་དེ་ཐུགས་བསྐྱེད་གཙོ་བོ་ཞིག་ཡིན་པ་ལ་བརྟེན་ནས་ཐུགས་བརྩེ་བ་ཆེན་པོས་དུས་རྟག་ཏུ་ཕན་བདེའི་འབྱུང་གནས་ཡིན་པའི་རྒྱུ་མཚན་གྱིས་བོད་ཀྱི་ཆོས་དང་རིག་གཞུང་གལ་ཆེན་པོ་ཡིན་པ་དང་། དེ་དག་གི་བླ་སྲོག་བོད་ཀྱི་སྐད་ཡིག་དེ་ལེགས་སྦྱར་གྱི་སྐད་ཡིག་དང་ཐག་ཉེ་ཤོས་ཡིན་པ་ལ་སོགས་ཀྱི་ལམ་སྟོན་མཛད་པ་ལྟར་དུ་ང་ཚོ་སློབ་མའི་ངོས་ནས་རང་རིགས་ནང་ཕན་ཚུན་བོད་སྐད་གཙང་མ་རྒྱབ་དགོས་པ་དེའི་མཚོན་པའི་རིག་གཞུང་སྲུང་སྐྱོབ་གང་ཐུབ་ཞུ་རྒྱུ་ཞེ་དྲག་གི་གལ་ཆེན་པོ་རེད།
རྒྱ་གར་འཕགས་པའི་ཡུལ་དུ་སེམས་ཁམས་དང་འབྲེལ་བའི་གནའ་རབས་ཀྱི་ལྟ་གྲུབ་མི་ཉམས་རྒྱུན་འཛིན་གནང་རྒྱུའི་ཐུགས་བསྐྱེད་ལ་བརྟེན་ནས་རྒྱ་གར་འཕགས་པའི་ཡུལ་གཙོ་བོར་གྱུར་པའི་ཡུལ་གྲུ་ཁག་ཏུ་དར་སྤེལ་མཛད་པ་དང་། འཛམ་བུ་གླིང་གི་མཁས་པ་འབུམ་རམས་པ་མང་པོ་ཞིག་ལ་བློ་གྲོས་ཀྱི་མིག་གསར་དུ་འབྱེད་པར་མཛད་པ་དང་། འཛམ་གླིང་སྤྱི་ཡོངས་ལ་ལེགས་སྐྱེས་གནང་བ་འདིས་ཕན་རླབས་རྒྱ་ཆེན་བྱུང་བའི་སྐབས་འདིར་ང་ཚོ་སློབ་མའི་ངོས་ནས་གནའ་རབས་ཀྱི་ལྟ་གྲུབ་ཐོག་ལ་བློ་ནུས་དང་བསྟུན་ནས་ཐོས་བསམ་བསྒོམ་སྒྲུབ་གང་ཐུབ་ཞུ་རྒྱུ་གལ་ཆེན་པོ་ཆགས་ཡོད་རེད། མཐའ་དོན་རྒྱལ་བའི་བཀའ་བཞིན་སྒྲུབ་པའི་རྣམ་དཀར་གྱི་དགེ་བ་གང་ཡོད་པ་ཐམས་ཅད་ཀྱི་མཐུ་ལ་བརྟེན་ནས་༸རྒྱལ་དབང་ཡིད་བཞིན་ནོར་བུ་བསྟན་དང་འགྲོ་བའི་དོན་དུ་སྐུ་ཚེ་ཞབས་པད་བསྐལ་བ་རྒྱ་མཚོར་བརྟན་ཅིང་། ཐུགས་བཞེད་མཐའ་དག་ལྷུན་གྱིས་འགྲུབ་པ་དང་དེ་བཞིན་དུ་འཇིག་རྟེན་ཁྱོན་ཡོངས་ལ་ཞི་བདེའི་འོད་སྣང་གིས་ཁྱབ་པ་དང་། བོད་གཞིས་བྱེས་མཉམ་འཛོམས་ཀྱི་སྐལ་བཟང་དགའ་སྟོན་ལ་ལོངས་སུ་སྤྱོད་ཐུབ་པའི་སྨོན་འདུན་རྩེ་གཅིག་ཏུ་ཞུ་གི་ཡོད།
