ཕྱི་ལོ་ ༢༠༢༠ ཟླ་ ༧ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་ལྔར་ཕེབས་པའི་སྐུའི་འཁྲུངས་སྐར་དུས་ཆེན་ཐོག་སྔ་འགྱུར་རྙིང་མའི་སྨོན་ལམ་ཚོགས་པའི་ཚོགས་གཙོ་༸སྐྱབས་རྗེ་རི་མགོ་སྤྲུལ་སྐུ་མཆོག་གིས་གནང་བའི་གསུང་འཕྲིན།
འཇིག་རྟེན་ཞི་བདེའི་དེད་དཔོན། ཁམས་གསུམ་ཆོས་ཀྱི་རྒྱལ་པོ། བོད་མིའི་ཡོངས་ཀྱི་མགོན་སྐྱབས་དང་བླ་ན་མེད་པའི་དབུ་འཁྲིད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་ནས། དེ་རིང་འཁྲུངས་སྐར་སྲུང་བརྩིའི་མཛད་སྒོའི་སྐབས་སུ་བཅར་བའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། གཞན་ཡང་སྐུ་མགྲོན་རྣམས་དང་། གཞིས་བྱེས་བོད་མི་ཡོངས་ལ་སྔ་འགྱུར་རྙིང་མའི་ཆོས་བརྒྱུད་ཀྱི་ཚབ་ཞུས་ཏེ་བཀྲ་ཤིས་བདེ་ལེགས་ཞུ་རྒྱུ་ཡིན།
བོད་མིའི་སྒྲིག་འཛུགས་ནས་ལོ་འདི་༸གོང་ས་མཆོག་གི་བཀའ་དྲིན་རྗེས་དྲན་ཞུ་རྒྱུའི་ལོ་སྲུང་བརྩི་གནང་བར་བསྔགས་བརྗོད་དང་། དེ་རིང་༸སྐུའི་འཁྲུངས་སྐར་སྲུང་བརྩི་སྐབས་སུ་ཆོས་བརྒྱུད་སོ་སོའི་ཕྱོགས་ནས་འཚམས་ཞུའི་གསུང་འཕྲིན་གནང་དགོས་པ་བསྐུལ་མ་བྱུང་བ་བཞིན། དང་བ་ཆེན་པོས་ཞུ་རྒྱུར། རང་ཅག་སྔ་འགྱུར་རྙིང་མའི་ཕྱོགས་ནས་སྔ་ལོར་གནས་མཆོག་རྡོ་རྗེ་གདན་དུ་སྔ་འགྱུར་སྨོན་ལམ་ཆེན་མོའི་སྐབས་སུ་ཐག་གཅོད་བྱུང་བ་བཞིན་གུས་ནས་རྙིང་མའི་སྨོན་ལམ་གྱི་ཚོགས་གཙོའི་འགན་ཁུར་ཞུ་བཞིན་ཡོད་པ་དང་། དེ་རིང་འདིར་༸སྐུའི་འཁྲུངས་སྐར་དང་འབྲེལ་ནས་༸གོང་ས་མཆོག་ལ་འཚམས་ཞུ་དང་༸གོང་ས་མཆོག་གི་བཀའ་དྲིན་རྗེས་སུ་དྲན་དགོས་པར་ཚིག་འགའ་ཤས་ཞུ་རྒྱུའི་གོ་སྐབས་བྱུང་བ་ནི་སྐལ་བ་བཟང་པོ་ཡིན་བསམ་བཞིན་ཡོད།
ད་ལོ་༸གོང་ས་མཆོག་གི་དགུང་གྲངས་བོད་ལུགས་ལྟར་རྩིས་པ་ཡིན་ན་དགུང་ལོ་ ༨༦ ལ་ཕེབས་ཀྱི་ཡོད། ཁོང་ཉིད་མདོ་སྨད་སྟག་འཚེར་སྐུ་འཁྲུངས་པ་དང་། དེ་ནས་༸རྒྱལ་བའི་ཡང་སྲིད་དུ་ངོས་འཛིན་གནང་། བོད་ཀྱི་རྒྱལ་སར་ལྷ་གདན་དུ་གདན་དྲངས་ཤིང་། སྐུ་ན་ཕྲ་བའི་སྐབས་སུ་ནང་དོན་རིག་པ་སོགས་ལ་གསན་སྦྱོང་གནང་ཞིང་། རིམ་པས་བོད་ཀྱི་ལོ་རྒྱུས་ནང་ཆེས་གཉན་འཕྲང་ཆེ་བའི་དུས་སྐབས་ཁེལ་ཞིང་། རྒྱ་ནག་དམར་པོའི་ཕྱོགས་ནས་བོད་ཤར་ཕྱོགས་ནས་འགོ་འཛུགས་ཀྱིས་བོད་སར་བཙན་འཛུལ་བྱེད་བཞིན་པ་དང་། དུས་དེར་༸གོང་ས་མཆོག་གིས་བོད་དང་རྒྱ་ཕྱོགས་གཉིས་ནས་བསམ་ཚུལ་གོ་བསྡུར་གྱིས་བསྟན་སྲིད་ཀྱི་མཛད་འགན་རྣམས་བདག་གིར་བཞེས་ཏེ། བོད་མི་རྣམས་བདེ་སྐྱིད་ཀྱི་ལམ་དུ་འཁྲིད་ཐབས་མཛད་ཡོད་ཀྱང་། མཐར་རྒྱ་མིའི་དམག་དཔུང་གིས་བོད་མི་རྣམས་ལ་འཇིགས་བསྐུལ་སྣ་ཚོགས་བྱས་ཏེ་བོད་ས་ཁྱོན་ཡོངས་ལ་དབང་བསྒྱུར་གྱིས་བཙན་བཟུང་བྱ་རྒྱུའི་གྲབ་གཤམ་བྱེད་བཞིན་ཁར། ཐ་མ་གདམ་ཁ་ལྟ་བུ་ནི་༸གོང་ས་མཆོག་བཙན་བྱོལ་དུ་ཕེབས་ཐུབ་དགོས་པ་གལ་ཆེན་པོ་ཆགས་ཡོད། དུས་དེར་ལྷ་མིའི་དགོངས་བཞེད་བཞིན་༸གོང་ས་མཆོག་རྒྱ་གར་འཕགས་པའི་ཡུལ་དུ་བཙན་བྱོལ་ལ་བདེ་བླག་ངང་ཕེབས་ཐུབ་པ་བྱུང་བ་ནི། ང་ཚོ་བོད་མི་རྣམས་ཀྱི་བསོད་ནམས་དང་སྐལ་བཟང་གི་གོ་སྐབས་ཆེན་པོ་ཞིག་ཆགས་ཡོད། དེ་བཞིན་༸གོང་ས་མཆོག་གི་ཐུགས་རྗེ་དང་། རྒྱ་གར་གཞུང་དང་མི་མང་རྣམས་ཀྱིས་དུས་དེར་བོད་མི་སྐྱབས་བཅོལ་དུ་འབྱོར་བ་རྣམས་ལ་སྣེ་ལེན་མཐུན་འགྱུར་གང་འོས་གནང་ཡོད། དེ་རིང་གོ་སྐབས་འདི་ཟིན་ཏེ་༸གོང་ས་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན།
ད་ལྟ་ང་ཚོ་བཙན་བྱོལ་དུ་འབྱོར་ནས་མི་ལོ་ ༦༡ འགྲོ་བཞིན་ཡོད། དུས་སྐབས་དེའི་རིང་༸གོང་ས་མཆོག་གི་རླབས་ཆེ་བའི་མཛད་པ་དང་། བཀའ་དྲིན་ནི་གཞལ་ཐབས་མེད་པར་གྱུར་ཡོད། དཔེར་ན་རྒྱ་གར་དུ་བོད་མིའི་གཞིས་ཆགས་ཁག་དང་། སློབ་གྲྭ་ཁག དགོན་སྡེ་ཁག་གསར་འཛུགས་ཐུབ་པ་བྱུང་ཡོད། ད་ལྟ་བོད་མི་རྣམས་ཀྱི་གནང་སྟངས་གང་ལེགས་དང་། དགོན་སྡེ་གྲྭ་ཚང་ཁག་སོགས་གྲ་རྒྱས་ཕུན་སུམ་ཚོགས་པ་ཡོང་བཞིན་པ་ནི། དུས་དེར་མི་རབས་རྒན་པ་རྣམས་ཀྱིས་འབད་བརྩོན་བྱས་ཡོད་ཀྱང་། གཙོ་བོར་༸གོང་ས་མཆོག་གིས་ཐུགས་བསྐྱེད་དང་། དགོངས་གཞི་གཞིར་བཟུང་ལམ་སྟོན་དང་། ཐུགས་རྗེས་སྐྱོང་བ་བཅས་ལ་བརྟེན་ནས་ང་ཚོར་གོ་སྐབས་ཐོབ་ཀྱི་ཡོད། དེ་བཞིན་བོད་ཀྱི་ཆོས་དང་། རིག་གཞུང་། སྐད་ཡིག མདོར་ན་ཆོས་སྲིད་གཉིས་ཐད་ནས་བོད་མིའི་ངོ་བོར་གནས་ཐུབ་པ་དང་། འཛམ་གླིང་ནང་མི་རིགས་གཞན་གྱིས་ཀྱང་དོ་སྣང་དང་རྒྱབ་སྐྱོར་ཆེན་པོ་ཐོབ་བཞིན་པ་ནི་༸གོང་ས་མཆོག་གི་བཀའ་དྲིན་དང་། ཁོང་གི་མཛད་པ་འཕྲིན་ལས་ལ་བརྟེན་ནས་བྱུང་བ་ཆགས་ཡོད།
དེ་བཞིན་རྒྱལ་སྤྱིའི་ནང་བོད་ཀྱི་ནང་ཆོས་ངོ་སྤྲོད་དང་། ཆོས་ལུགས་ཁས་ལེན་མིན་ལ་ལྟོས་མེད་བྱམས་བརྩེའི་སྤྱི་ཚོགས་ཤིག་ལ་བསྒྱུར་དགོས་པ་དང་། དེ་ཡང་ཕོ་མོའི་དབྱེ་བ་མེད་པ་དང་། མི་རིགས་དབྱེ་བ་མེད་པ། རིགས་ལ་མཐོ་དམན། དབང་ཆ་ཡོད་མེད་རྒྱུ་མཚན་མིན་པར་འགྲོ་བ་མི་ཡིན་པ་གཅིག་གྱུར་གྱིས་འདུ་ཤེས་འཁྱེར་ནས་བྱམས་བརྩེའི་ཉམས་ལེན་དགོས་པའི་ལམ་སྟོན་དང་ཐུགས་ཁུར་གནང་བ་བཅས་ནི་ཧ་ཅང་རིན་ཐང་བྲལ་བའི་དགོངས་བཞེད་གཅིག་ཆགས་ཡོད། རྒྱལ་སྤྱིའི་ནང་དུའང་དེ་ལྟར་ངོས་འཛིན་གྱིས་ནོ་སྦེལ་ཞི་བདེའི་གཟེངས་རྟགས་སོགས་ཆེས་སྙན་གྲགས་ཅན་གྱི་གཟེངས་རྟགས་མང་པོ་འབུལ་བཞེས་གནང་བ་བཅས་ནི་ལོ་རྒྱུས་ཀྱི་བྱུང་རབས་འདིའི་ནང་ཁོང་ནི་འཛམ་གླིང་ཐོག་བྱམས་བརྩེ་སྤེལ་མཁན་སྲིད་ན་འགྲན་ཟླ་བྲལ་བ་ཞིག་ཆགས་ཡོད།
དེ་བཞིན་འཛམ་གླིང་འདིའི་ནང་ཆོས་ལུགས་ལྟ་གྲུབ་འདྲ་མིན་གྱིས་མིའི་སྤྱི་ཚོགས་ལ་ཕན་ཐོགས་ཡོད་པས་གནས་ཐུབ་པ་དང་། ཆོས་ལུགས་ནང་ཕན་ཚུན་གུས་ཞབས་ཞུ་རྒྱུ་དང་། མཐུན་ལམ་དགོས་པ་གལ་ཆེ་བ། ཆོས་ལུགས་རྒྱུ་མཚན་དུ་བྱས་ནས་སྤྱི་ཚོགས་ནང་རྙོག་གྲ་བཟོ་བ་བཅས་ནི་ཆེས་ཐ་ཤལ་དང་བློ་ཕམ་དགོས་པ་ཡང་ཡང་གསུངས་ཀྱི་ཡོད། བོད་ཀྱི་ཆོས་བརྒྱུད་ནང་ཁུལ་ལ་མཚོན་ན་ཡང་༸གོང་ས་མཆོག་གི་ཐུགས་བསྐྱེད་དང་བཀའ་དྲིན་ལ་བརྟེན་ནས་ཧ་ལམ་ལོ་རྒྱུས་ནང་བྱུང་མྱོང་མེད་པ་ལྟ་བུའི་ཆོས་ལུགས་ནང་ཁུལ་དམ་ཚིག་འོ་ཆུ་གཅིག་འདྲེས་སུ་གྱུར་ཡོད། རླབས་ཆེན་གྱི་མཛད་པ་དེ་དག་ལ་ང་ཚོས་བཀའ་དྲིན་རྗེས་དྲན་དང་འབྱུང་འགྱུར་ཡང་༸གོང་ས་མཆོག་གི་ལམ་སྟོན་མཛད་པ་བཞིན་ཤར་བསྐྱོད་ཞུ་ཐུབ་དགོས་པ་ང་ཚོའི་ལས་འགན་གལ་ཆེན་པོ་ཞིག་ཏུ་གྱུར་ཡོད།
དེ་བཞིན་ཆོལ་གསུམ་བོད་རིགས་ཡོངས་ལ་༸གོང་ས་མཆོག་གིས་ཐུགས་བྱམས་བརྩེའི་གཟིགས་པ་གཅིག་མཚུངས་ཀྱིས་སྐྱིད་ན་མཉམ་སྐྱིད་དང་། སྡུག་ན་མཉམ་སྡུག་གི་འགན་ཁུར་བཞེས་དགོས་པ་ཁོང་གི་དགོངས་པའི་མཐིལ་དུ་བཟུང་ནས་བཀའ་སློབ་ཡང་ཡང་ཕེབས་བཞིན་ཡོད། ང་ཚོ་བོད་རིགས་ནང་ཁུལ་ལ་མཐུན་ལམ་རྡོག་རྩ་ཆིག་སྒྲིལ་གྱིས་ཁོང་གི་བཀའ་སློབ་གསུངས་པ་རྣམས་ལག་ལེན་བསྟར་ཐུབ་དགོས་པ་དང་། མཚམས་རེར་བསམ་ཚུལ་མཐུན་མིན་ལྟ་བུ་བྱུང་ན་ཡང་གཞི་རྩའི་༸གོང་ས་མཆོག་གི་ལམ་སྟོན་མཛད་པའི་རྒྱ་ལས་མ་བརྒལ་བར་བོད་མི་རྒན་གཞོན་ཚང་མས་ཉམས་ལེན་དང་འགན་ཁུར་བྱེད་ཐུབ་དགོས། དེ་ལྟར་བྱུང་བ་ཡིན་ན་ཁོང་གི་བཀའ་དྲིན་རྗེས་དྲན་ངོ་མ་དེ་ཆགས་ཀྱི་ཡོད།
ཁོང་དགུང་ལོ་ ༨༦ ལ་ཕེབས་ཡོད་ཀྱང་སྐུའི་འཕྲོད་བཞེས་དང་། ཆོས་ཀྱི་ཉམས་ལེན་སོགས་ལ་བརྟེན་ནས་ཞལ་རས་གཞོན་ཤ་ཆགས་པ་ཞིག་མཇལ་གྱི་འདུག དེ་ནི་འཇིག་རྟེན་གྱི་སྐྱེ་འགྲོ་སྤྱི་དང་རང་ཅག་བོད་མི་རྣམས་ཀྱི་བསོད་ནམས་ཆེན་པོ་ཞིག་རེད། འབྱུང་འགྱུར་ཡང་རང་རེ་བོད་འབངས་རྣམས་ཐུགས་བརྩེ་བས་རྗེས་སུ་བཟུང་སྟེ་དགུང་ལོ་བསྐལ་བརྒྱར་བཞུགས་པའི་གསོལ་འདེབས་ཞུ་རྒྱུ་ཡིན། བོད་མི་རྣམས་ཀྱིས་ཀྱང་ཁོང་གི་དགོངས་བཞེད་བཞིན་བོད་སྤྱི་པའི་རྩ་དོན་དང་འབྲེལ་བའི་ལས་དོན་རྣམས་དང་། སྒེར་སོ་སོའི་ལས་དོན་རྣམས་ཡ་རབས་བཟང་སྤྱོད་དང་ལྡན་པ་ཞིག་ཡོང་ཐབས་ལ་ཚང་མས་འབད་བརྩོན་སྔར་ལྷག་གིས་ཉིན་རེའི་འཚོ་བའི་ནང་ལག་བསྟར་ཞུ་ཐུབ་དགོས།
ཐ་མར་སླར་ཡང་གསོལ་བ་འདེབས་པའི་སྙིང་པོ་ནི། རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་དང་། བསྟན་པ་དེ་འཛིན་ཡོངས་ཀྱི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པ་མཆོག་སྐུ་ཚེ་བསྐལ་བརྒྱར་བརྟན་ཞིང་། ཐུགས་ཀྱི་དགོངས་བཞེད་མཐའ་དག་ལྷུན་གྱིས་འགྲུབ་པ་དང་། བོད་དོན་བདེན་མཐའ་གསལ་ཏེ་གཞིས་བྱེས་མཉམ་འཛོམས་ཡོང་བའི་སྨོན་འདུན་ཞུ་རྒྱུ་ཡིན། ཐུགས་རྗེ་ཆེ།།
