ཕྱི་ལོ་ ༢༠༢༠ ཟླ་ ༧ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༧ ཚེས་ ༦ ཉིན་སྤྱི་ནོར་ྋགོང་ས་ྋསྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་ལྔར་ཕེབས་པའི་སྐུའི་འཁྲུངས་སྐར་དུས་ཆེན་ཐོག་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ བློ་བཟང་བསྟན་འཛིན་མཆོག་གིས་གནང་བའི་གསུང་འཕྲིན།
འཕགས་མཆོག་སྤྱན་རས་གཟིགས་དབང་བསམ་བཞིན་སྡོམ་བརྩོན་གྱི་རྣམ་པར་རོལ་བ། རྒྱལ་བ་སྲས་བཅས་ཀྱི་གསང་གསུམ་གཅིག་ཏུ་འདུས་པའི་བདག་ཉིད། ལྷ་དང་མིའི་ཡོན་གནས་དམ་པར་གྱུར་པ། སྲིད་ཞིའི་མགོན་སྐྱབས་ཁྱབ་བདག་འཁོར་ལོའི་མགོན་པོ་བདག་ཅག་རྣམས་ལ་བཀའ་དྲིན་མཚུངས་ཟླ་བྲལ་བ་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོའི་ཞབས་པད་མི་འཇིགས་གདོང་ལྔས་བཏེགས་པའི་རྡོ་རྗེའི་ཁྲི་འཕང་མངོན་མཐོའི་དྲུང་དུ།
གུས་འདུད་ཚད་མེད་དང་བཅས་ཏེ། ད་རེས་༸གོང་ས་༸རྒྱལ་དབང་ཡིད་བཞིན་ནོར་བུ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་སྐུའི་འཁྲུངས་སྐར་གྱི་མཛད་སྒོ་གལ་ཆེན་འདི་ལ་མཉམ་ཞུགས་གནང་བའི་ཆོས་ལུགས་དང་། ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང་། དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་རྒྱས་ཀྱིས་གཙོས། ཆེད་འདུས་སྤུན་ཟླ་སེར་སྐྱ་ཕོ་མོ་ཡོངས་ལ་འཚམས་འདྲི་དང་། བཀྲ་ཤིས་བདེ་ལེགས་གྲངས་མེད་ཞུ།
༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ནི། ཇི་སྐད་དུ། མཁས་གྲུབ་ཐམས་ཅད་མཁྱེན་པས། སྙིགས་མ་བས་ཀྱང་ཆེར་སྙིགས་པའི། །འཇིགས་པ་མི་བཟད་འཇིག་རྟེན་འདིར། །རྒྱལ་དང་རྒྱལ་བའི་སྲས་པོ་གཞན། །མཐའ་དག་མཐོང་བའི་ལམ་ལས་འདས། །དེ་ཚེ་ཐུགས་རྗེ་ལྡན་པ་ཁྱོད། །སོ་གའི་ཉི་མའི་འགྲམ་པའི་ཆང་། །ཟག་ལྡན་གཉིས་འཐུང་པདྨོའི་མཚོས། །རིང་ནས་བོས་ལྟར་འཇིག་རྟེན་གཟིགས། །ཞེས་གསུངས་པ་ཇི་བཞིན་ཏུ། དེང་སྙིགས་མ་ལྔ་ཆེས་ཆེར་བདོ་བའི་དུས་ཀྱི་འགྲོ་བ་སྤྱི་དང་། ལྷག་པར་བདག་ཅག་མགོན་མེད་པ་རྣམས་ཀྱི་མགོན་དང་། སྐྱབས་མེད་པ་རྣམས་ཀྱི་སྐྱབས་དང་། གླིང་དང་། དཔུང་གཉེན་དམ་པར་ཐུགས་བརྩེ་བ་སྙིང་རྗེ་ཆེན་པོས་བསམ་བཞིན་ཏུ་བྱོན་ཏེ། འཚོ་ཞིང་གཞེས་པའི་གསང་གསུམ་གྱི་རྣམ་པར་ཐར་པ་ནི་སར་གནས་ཀྱི་སེམས་དཔའ་ཆེན་པོ་རྣམས་ཀྱི་མཁྱེན་པའི་ཡུལ་ལས་ཀྱང་འགོང་པར་གྱུར་ན། བདག་དང་བདག་འདས་ཆ་ཤས་ཙམ་ཡང་བརྗོད་པར་ག་ལ་ནུས་ཏེ། ཇི་སྐད་དུ། རྗེ་དགེ་འདུན་གྲུབ་པས། ཐུབ་པའི་ཡོན་ཏན་མཁའ་ལྟར་མཐའ་ཡས་པ། །མ་ལུས་བརྗོད་པར་ནུས་པ་སུ་ལ་མཆིས། །ཞེས་གསུངས་པ་ལྟར་ལགས་ཤིང་། མགོན་པོ་མཆོག་གིས་ད་བར་གཞི་རྒྱ་ཆེ་ཞིང་། ཕུགས་རྒྱང་རིང་པོའི་དགོངས་བཞེས་བླ་མེད་དང་། འཇིག་རྟེན་ཡོངས་ལ་ཕན་པ་དང་ཞི་བདེ་བསྐྲུན་འདོད་ཀྱི་ཐུགས་བརྩེས་ཀུན་ནས་བསླངས་ཏེ། འཛམ་གླིང་ཁྱོན་ཡོངས་ལ་ཞི་བདེ་སྐྲུན་ཐབས་ལམ་སྟོན་དང་འབད་བརྩོན་ཤུགས་ཆེ་བསྐྱངས་པས། འཛམ་གླིང་ཆེ་རྒུས་གཙུག་རྒྱན་དུ་བཀུར་དང་བཀུར་བཞིན་པ་འདི་ལ་ཡི་རང་ཚད་མེད་དང་བཅས། སྐུ་ཚེ་བསྐལ་བརྒྱར་བརྟན་ཅིང་རླབས་ཆེན་ཐུགས་བཞེད་ལྷུན་གྱིས ་འགྲུབ་པའི་བཀྲ་ཤིས་བདེ་ལེགས་ཀྱི་རྟེན་འབྲེལ་གྲངས་མེད་ཞུ་བ་དང་འབྲེལ།
ལྷག་པར་ད་ལམ་སྐུའི་འཁྲུངས་སྐར་བསྲུང་བརྩིའི་མཛད་སྒོ་གལ་ཆེན་འདིའི་སྐབས། རང་ཅག་ཚང་མས་ཁ་ཞེ་གཉིས་མེད་ཀྱིས་སེམས་ལ་བཅང་དགོས་པ་ནི། ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུན་དུ་རང་ཅག་ལ་ལེགས་ཉེས་བླང་དོར་བཀའ་སློབ་ལམ་སྟོན་གནང་ཚད་ཀུན་ལེགས་པར་ཡིད་ལ་དྲན་པའི་སྒོ་ནས་ལག་ལེན་དུ་འགེལ་ཐབས་ཆེད་མཐའ་གཅིག་ཏུ་འབད་བརྩོན་ངེས་པར་ཞུ་དགོས་པ་དེ་རེད།
མཐའ་བསྡོམས་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་བདག་སོགས་བསྟན་འགྲོའི་དཔལ་མགོན་དུ་སྐུ་ཚེ་བསྐལ་བརྒྱར་བརྟན་ཞིང་། རླབས་ཆེན་མཛད་འཕྲིན་ཕྱོགས་མཐར་རྒྱས་པའི་གསོལ་འདེབས་དང་སྨོན་ཚིག་ཤུགས་དྲག་བཅས། ཀུན་ལ་བཀྲ་ཤིས་བདེ་ལེགས་གྲངས་མེད་ཞུ།།
