ཕྱི་ལོ་ ༢༠༢༠ ཟླ་ ༧ ཚེས་ ༩ རེས་གཟའ་ཕུར་བུ།
༄༅། །འདི་གར་སྤུ་རུ་ཝ་ལ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༧ ཚེས་ ༦ ཉིན་སྤུ་རུ་ཝ་ལ་ས་སྐྱ་བོད་མིའི་གཞིས་ཆགས་སུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦ ཐོག་འདི་གའི་སྤྱི་ཞབས་དོ་དམ་པ་དང་ཞབས་རིམ་དབུ་མཛད་གཅིག་ལྕོག་ཨ་བུར་ལགས་ཀྱིས་སྣེ་འཁྲིེད་འོག་གཞིས་མི་སྡེ་ཚན་དྲུག་ཡོད་པ་ནས་འཐུས་མི་གཉིས་རེ་དང་དེ་མིན་རོགས་པ་གཉིས་བཅས་ཁྱོན་མི་གྲངས་ ༡༥ ནས་རང་ལུགས་ཟབ་གོན་དང་མཉམ་ལྷ་གསོལ་རི་རྩེར་སྐུ་རླུང་དར་འཛུགས་དང་འབྲེལ་ལྷ་གསོལ་ཞུས་ཡོད།
དེ་རྗེས་འཁྲུངས་སྐར་གྱི་མཛད་རིམ་ལྟར་མཛད་སྒོ་དངོས་གཞི་དེ་བཞིན་སྔ་དྲོ་ཆུ་ཚོད་ ༩།༣༠ ཐོག་འདི་གའི་གཞིས་ཀེམ་ནང་མི་མང་ཞལ་འདོན་ཚོགས་ཁང་གཞན་ཕན་འཕྲིན་ལས་གླིང་ནང་དུ་ཚོགས་ཡོད། ཐོག་མའི་འཆར་གཞི་ལྟར་ན། དེ་ཉིན་སྐུ་མགྲོན་གཙོ་བོ་འདི་ཕྱོགས་༸དཔལ་ས་སྐྱའི་མ་དགོན་བཤད་གྲྭའི་མཁན་པོ་སྐུ་མགྲོན་དུ་མགྲོན་འབོད་ཞུས་ཀྱང་སྐབས་མཚམས་སུ་དེ་ལྟར་ཕེབས་ཐབས་མ་བྱུང་།
མཛད་སྒོའི་ཐོག་མར་མེ་ཞལ་ཕྱེ་དང་༸སྐུའི་འཁྲུངས་སྐར་གྱི་མངར་ཟས་ Cake གཅོད་བྲེག་གིས་ཕུད་འབུལ་ཞུ་རྒྱུ་བཅས་ས་འཐུས་ཚོགས་གཙོ་དང་།ས་གནས་འགོ་འཛིན།ཚོགས་པའི་འགན་འཛིན་དྲུང་ཆེ་བཅས་ཞུས་ཡོད།དེ་རྗེས་རང་ལུགས་རྟེན་འབྲེལ་མཚོན་བྱེད་གསོལ་ཇ་འབྲས་བསིལ་འདེགས་འབུལ་ཞུས།གསོལ་ཇ་འབྲས་བསིལ་གྲུབ་མཚམས་ཞལ་འདོན་དབུ་འཛུགས་གནང་།ཞལ་འདོན་དུ་གནས་བརྟན་ཕྱག་མཆོད་དང་།དེ་རྗེས་དཔལ་ལྡན་དགའ་ལྡན་ཕོ་བྲང་ཡིག་ཚང་ནས་བཀའ་ཕེབས་ལྟར་མཛད་སྒོའི་ཐོག་མཉམ་ཞུགས་ཡོད་པ་རྣམས་ནས་མ་ཎི་ཡིག་དྲུག་སྟོང་ཚར་གསོག་འདོན་ཞུས། ཞལ་འདོན་མཐར་༧རྒྱལ་བའི་ཞབས་བརྟན་གསོལ་འདེབས་འདོན་བཞིན་དུ་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ།
དེ་རྗེས་ས་གནས་འཐུས་ཚོགས་དང་ས་གནས་འགོ་འཛིན་གཉིས་ནས་དཔལ་ལྡན་བོད་མི་མང་སྤྱི་འཐུས་དང་དཔལ་ལྡན་བཀའ་ཤག་གཉིས་ཀྱི་གསུང་འཕྲིན་རིམ་བཞིན་སྒྲོག་སྦྱང་ཞུས་ཡོད་པ་དང་། མཇུག་ཏུ་ཚོགས་པའི་འགན་འཛིནདྲུང་ཆེ་ནས་ཐུགས་རྗེ་ཆེ་ཞུའི་གསུང་བཤད་གནང་།
དེ་ཉིན་མཛད་སྒོའི་ཐོག་མཉམ་ཞུགས་མ་ཐུབ་པའི་གཞིས་མི་བྱིངས་རྣམས་ནས་སོ་སོའི་ཁྱིམ་ཚང་དུ་མཆོད་པ་ཟབ་བཤོམས་དང་འབྲེལ་༸གོང་ས་མཆོག་གི་སྐུ་པར་ལ་མཇལ་དར་དང་།ནང་མི་རྒན་བྱིས་བར་གསུམ་ནས་མ་ཎི་ཡིག་དྲུག་སྟོང་ཚར་རེ་ཚང་མས་གསོག་འདོན་ཞུས་ཡོད། དེ་ནས་ཐེ་ཝན་དོན་གཅོད་ནས་གནང་བའི་ཁ་རས་རྣམས་འཁྲུངས་སྐར་ཉིན་མོར་གཞིས་མི་སེར་སྐྱ་ཡོངས་ལ་བགོ་བགྲེམས་ཞུས་ཡོད།
དེ་ཉིན་ཆུ་ཚོད་ ༡ ཐོག་ས་གནས་འགོ་འཛིན་དང་བཟོ་ཚོགས་ལས་ཁང་གི་སྐུ་ཚབ། གཞུང་དང་གཞུང་འབྲེལ་མིན་པའི་ཚོགས་པ་བཞིའི་ཚོགས་གཙོ་བཅས་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཆེད་ཕེབས་ཀྱིས་ཕྱེད་ཡོལ་ཆུ་ཚོད་ ༤ ཐོག་ཧི་མཱ་ཅལ་སི་མུར་རྫོང་ཁོངས་ཧིན་བོད་མཛའ་ཚོགས་ཀྱི་ཚོགས་གཙོ་སྐུ་ཞབས་ Dr. M.L.་Khurana དང་། དྲུང་ཆེ་སྐུ་ཞབས་ G. R. Thakur རྣམ་གཉིས་སྐུ་མགྲོན་གཙོ་བོར་མགྲོན་འབོད་ཀྱིས་སི་མུར་རྫོང་ཁོངས་བོད་མིའི་གཞིས་ཆགས་བཞིའི་གནད་ཡོད་མི་སྣ་རྣམས་མཉམ་འཛོམས་ཐོག་ཧིན་བོད་མཛའ་ཚོགས་ཀྱི་དཔལ་འབྱོར་འདུ་འགོད་ཀྱི་རྒྱན་ཤོག་དེ་ཉིན་གསལ་བསྒྲགས་ཞུས་ཡོད་པ། །
