ཕྱི་ལོ་ ༢༠༢༠ ཟླ་ ༧ ཚེས་ ༢༧ རེས་གཟའ་ཟླ་བ།
༄༅། །བོད་རྒྱལ་ལོ་ ༢༡༤༧ ཟླ་ ༦ ཚེས་ ༤ དང་ཕྱི་ལོ་ ༢༠༢༠ ཟླ་ ༧ ཚེས་ ༢༤ རེས་གཟའ་པ་སངས་ཉིན་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོས་བདེན་བཞི་ཆོས་ཀྱི་འཁོར་ལོ་བསྐོར་བའི་ཁྱད་པར་ཅན་གྱི་དུས་ཚིགས་དང་། དེ་ཉིན་སྒྲུབ་བརྒྱུད་བསྟན་པའི་མངའ་བདག་གདན་རབས་ ༣༧ པ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༧༥ ལ་ཕེབས་པའི་སྐུའི་འཁྲུངས་སྐར་ཉིན་འཁེལ་ཡོད་སྟབས། སྐྱབས་རྗེ་མགར་ཆེན་རིན་པོ་ཆེ་མཆོག་གི་དབུ་ཁྲིད་འོག་བྱང་ཨ་རིར་ཡོད་པའི་བཀའ་བརྒྱུད་ཆོས་ཚོགས་ ༣༠ ལྷག་གི་གོ་སྒྲིག་འོག་དྲ་ལམ་བརྒྱུད་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག
སྐབས་དེར་བྱང་ཨ་རིར་ཡོད་པའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་སྐུ་ཚབ་དང་། དེ་བཞིན་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་ལྷན་བཞུགས་གནང་ཡོད།
དེ་ཡང་བྱང་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས། སྒྲུབ་བརྒྱུད་བསྟན་པའི་མངའ་བདག་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གིས་རྒྱ་ནག་གི་དྲག་གནོན་ཅན་གྱི་སྲིད་བྱུས་འོག་མྱངས་པའི་སྐུ་ཚེའི་ལོ་རྒྱུས་དང་། རིན་པོ་ཆེ་མཆོག་བོད་ནས་སྐུ་ངལ་འཛེམས་མེད་ཀྱིས་རྒྱ་གར་ལ་བཙན་བྱོལ་དུ་ཕེབས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པ་དང་། དེ་ནས་ཨ་རིར་ཕེབས་རྗེས་བསྟན་དང་འགྲོ་བའི་སླད་དུ་སླར་ཡང་རྒྱ་གར་ལ་ཕེབས་ཏེ་འབྲི་གུང་བཀའ་བརྒྱུད་འཛིན་སྐྱོང་སྤེལ་གསུམ་གྱི་ཐུགས་འགན་མཛད་དང་མཛད་བཞིན་པའི་སྐུ་ཚེའི་ལོ་རྒྱུས་དང་རླབས་ཆེན་གྱི་མཛད་འཕྲིན་སོགས་ཀྱི་སྐོར་གསུང་བཤད་གནང་།
སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་སྐུ་ཚེ་བསྐལ་བརྒྱའི་བར་དུ་བརྟན་སླད་མགར་ཆེན་རིན་པོ་ཆེ་མཆོག་གིས་མཎྜལ་འདེགས་འབུལ་ཞུས་པ་དང་། ཨ་རིའི་རྒྱལ་ས་ཁུལ་གྱི་ས་གནས་བོད་པའི་སློབ་ཕྲུག་རྣམས་ནས་འཁྲུངས་སྐར་གྱི་སྟོད་གཞས་ཕུལ་ཡོད་པ་བཅས། །
