ཕྱི་ལོ་ ༢༠༢༠ ཟླ་ ༧ ཚེས་ ༨ རེས་གཟའ་ལྷག་པ། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༤ ཉིན་བོད་མི་མིག་དམར་ལགས་ཀྱིས་སྣེ་འཁྲིད་པའི་སྤེན་པ་ཚེ་རིང་ལགས་དང་། བློ་བཟང་ལགས། བློ་བཟང་ནོར་བུ་ལགས། བསོད་ནམས་ལགས་བཅས་བོད་མི་ལྔས་དྭང་བླངས་ཐོག་སུད་སིའི་གྲོང་རྡལ་ཛུག་ ZUG ནས་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དབུ་འཛུགས་ཀྱིས་སུད་སིའི་དབུས་ཀྱི་གྲོང་རྡལ་ལུ་ཛི་རན། Luzern དང་། ཨ་རའོ།  Arau  ཕ་རའི་བུག Fribourg ལུ་སེན། Lausanne ཇི་ནི་ཝ་བཅས་སུད་སིའི་གྲོང་ཁྱེར་ཆེ་ཁག་དྲུག་ནང་ཁྱོན་བསྡོམས་སྤྱི་ལེ་ ༢༩༠ ཙམ་བོད་དོན་རྐང་འཁོར་སྐོར་སྐྱོད་གནང་སྟེ་ཕྱི་ཟླ་ ༧ ཚེས་ ༧ ཉིན་རྐང་འཁོར་སྐོར་སྐྱོད་ཀྱི་ལས་འགུལ་བ་རྣམས་སུད་སིའི་གྲོང་ཁྱེར་ཇི་ནི་ཝར་ཕེབས་འབྱོར་སྐབས་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་། བསོད་ནམས་མཐར་ཕྱིན་ལགས། ཇི་ནི་ཝ་བོད་རིགས་སྤྱི་མཐུན་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། 

སྐབས་དེར་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ལས་འགུལ་བ་རྣམས་ཀྱིས་བོད་དོན་སླད་འགན་ཁུར་དང་འབད་བརྩོན་ལ་བསྔགས་བརྗོད་དང་འབྲེལ་བཙན་བྱོལ་བོད་མི་རྣམས་ནི་བོད་ནང་ཡོད་པའི་བོད་རིགས་སྤུན་ཟླ་རྣམས་ཀྱི་མགྲིན་ཚབ་པ་ཡིན་སྐོར་སོགས་ཀྱི་གསུང་བཤད་གནང་། 

དེ་ཡང་ཉིན་གྲངས་བཞིའི་རིང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེ་བཞིན་རྒྱལ་ཚོགས་ཀྱི་མདུན་དུ་རྔམ་སྟོན་ཁྲོམ་སྐོར་དང་། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་ Michelle Bachelet མཆོག་གི་མཚན་ཐོག་ཞུ་ཡིག་ཕུལ་ཏེ་མཇུག་སྒྲིལ་ཡོད། 

དེ་སྔ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༤༤ དབུ་འཛུགས་དང་བསྟུན། སུད་སིའི་ནང་གནས་སྡོད་བོད་མི་ལྔས་སུད་སི་རྒྱལ་ས་བྷན་ Bern ནས་འགོ་བཙུགས་ཀྱིས་ཇི་ནི་ཝ་བར་ཞི་བའི་གོམ་བགྲོད་གནང་སྟེ་ཕྱི་ཚེས་ ༣༠ ཉིན་ལེགས་པར་མཇུག་སྒྲིལ་ཡོད། ཕྱོགས་མཚུངས་སུད་སི་གནས་སྡོད་བོད་མི་ཚེ་རིང་དབང་འདུས་ལགས་ཀྱིས་ཝིན་ཊར་ཐུར་ནས་ཇི་ནི་ཝ་བར་བོད་དོན་ལས་འགུལ་སྤེལ་ཡོད་པ་བཅས། །