ཕྱི་ལོ་ ༢༠༢༠ ཟླ་ ༧ ཚེས་ ༧ རེས་གཟའ་མིག་དམར།

༄༅། །འདི་གར་སིམ་ལ་སྤྱི་ཁྱབ་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༧ ཚེས་ ༦ སྟེ་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ ལ་ཕེབས་པའི་གཞུང་འབྲེལ་མཛད་རིམ་སྲུང་བརྩི་སྐབས།

མངའ་གཞུང་གི་ལམ་སྟོན་ལྟར་མཛད་སྒོའི་སྐུ་མགྲོན་དུ་སིམ་ལ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སློབ་དཔོན་ཝི་ཨེས་ནེ་གི་ Professor V.S. Negi མཆོག་གིས་གཙོས། ས་གནས་འཐུས་ཚོགས་དང་། དགོན་སྡེ་གཉིས་ཀྱི་སྐུ་ཚབ། དེ་བཞིན་མི་མང་རང་འཐུས་དང་གཞུང་འབྲེལ་ལས་བྱེད་བཅས་ས་གནས་གནད་ཡོད་མི་སྣ་ཁག་ལྷན་འཛོམས་ཀྱིས་སྔ་དྲོ་ཆུ་ཚོད་ ༨ ཐོག་བོད་ལྗོངས་ལྷ་སྲུང་འཕྲིན་བསྐུལ་དང་། བསང་གསོལ་གཟབ་རྒྱས་ཞུས་རྗེས་བཟོ་གྲྭའི་ཚོགས་ཁང་དུ་གཞུང་འབྲེལ་རྟེན་འབྲེལ་མཛད་སྒོ་སྟབས་བདེ་ཞིག་ཚོགས་ཡོད།

གཞུང་འབྲེལ་མཛད་སྒོ་གྲུབ་མཚམས་སིམ་ལ་མི་མང་ངོས་ནས་ཁྲོམ་གཞུང་ Mall Road, Shimla  དུ་མངའ་གཞུང་གི་ཆོག་མཆན་བཀའ་འཁྲོལ་ཐོག་ཕྱེད་ཡོལ་ཚོུད་ ༡༢ ནས་ ༢ བར་འགྲུལ་བཞུད་ཡུལ་མི་རྣམས་ལ་ཁ་རས་དང་དུག་སེལ།  དེ་བཞིན་ཆུ་མངར་མོ་བཅས་བགོ་འགྲེམས་ཞུས་ཡོད་པ་དང། དེ་བཞིན་རྒྱ་གར་གསར་འགོད་པ་ཆེད་འབོད་ཀྱིས་ཉིན་མོ་དང་འབྲེལ་བའི་འགྲེལ་བརྗོད་ཞུས་ཐུབ་པ་བྱུང་ཡོད་བཅས། །