ཕྱི་ལོ་ ༢༠༢༠ ཟླ་ ༧ ཚེས་ ༣ རེས་གཟའ་པ་སངས།
༄༅། །འདི་གར་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ཛ་དྲག་ངལ་སེལ་ཚོགས་ཆུང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ལམ་སྟོན་ལྟར་ས་གནས་སུ་ཏོག་དབྱིབས་གཉན་རིམས་ཛ་དྲག་ཚོགས་ཆུང་གསར་འཛུགས་ཀྱིས་ནད་ཡམས་སྔོན་འགོག་གི་ལས་དོན་ཚ་ཚ་འུར་འུར་ངང་སྤེལ་མུས་ཡིན། ཏོག་དབྱིབས་གཉན་རིམས་ནད་མནར་རྐྱེན་པའི་གཞིས་མི་སུ་ཞིག་ཛ་དྲག་སྨན་ཁང་དུ་བསྟེན་གཏུག་བྱ་དགོས་བྱུང་ཚེ་ནད་པ་སྐྱེལ་འདྲེན་ཆེད་འདི་ག་ས་གནས་འགོ་འཛིན་ལས་ཁུངས་དང་ཚོགས་པའི་སྣུམ་འཁོར་གཉིས་འབྲེལ་ཡོད་ས་གཞུང་ནས་ཆོག་མཆན་ཞུས་ཐོབ་ཀྱིས་གོ་སྒྲིག་ཞུས་ཡོད།
འདི་གའི་སྨན་ཞབས་ནས་བདུན་རེའི་ནང་ཐེངས་རེར་གཞིས་མི་རྣམས་ཀྱི་ཁྱིམ་ཚང་སོ་སོར་རིམ་བསྐྱོད་དང་། དེ་བཞིན་དགོན་པའི་དགེ་འདུན་པ་བཅས་ལ་ནད་རྟགས་ཡོད་མེད་ཚ་བ་བརྟག་དཔྱད་ཀྱི་ལས་དོན་གནང་མུས་སུ་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་མཐུན་འགྱུར་འོག་འདི་ག་གཞིས་ཆགས་ཀྱི་མགྲོན་ཁང་དུ་མི་གྲངས་ ༡༠ ཤོང་བའི་ཚོགས་བཀག་དགོག་དབྱེ་ཟུར་འཇོག་ཁང་གོ་སྒྲིག་ཞུས་ཡོད།
དེ་མཚུངས་ཀྱི་འགོག་དབྱེ་ཟུར་འཇོག་ཁང་དུ་དུག་སེལ་ལས་འགུལ་ཞུ་མུས་ཡིན། བོད་མིི་སྒྲིག་འཛུགས་དང་སྨན་རྩིས་ཁང་གཉིས་མཉམ་རུབ་ཐོག་གཞིས་མི་རང་ལོ་ ༦༥ ཡན་གྲངས་ ༡༣ དང་། ས་གནས་ཛ་དྲག་ཚོགས་ཆུང་གི་ཚོགས་མི་ ༢༤ བཅས་ཁྱོན་མི་གྲངས་ ༣༧ ལ་ལུས་སེམས་གསོ་བྱེད་ཀྱི་གསོ་སྨན་དོ་བདག་ལ་ཁུངས་འགྲེམས་ཞུས་ཟིན། གཞིས་མི་རྣམས་ཕར་འགྲོ་ཚུར་འོང་ཆོག་པའི་ཆོག་མཆན་ཡིག་ཆ་ཐོབ་ཆེད་ས་གནས་འགོ་འཛིན་ལས་ཁུངས་ནས་རྒྱབ་གཉེར་མཐུན་འགྱུར་ཞུས་ཡོད།
བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་ཏོག་དབྱིབས་ནད་ཡམས་རྐྱེན་པས་སྒོ་རྒྱག་བཀའ་རྒྱའི་ཛ་དྲག་དུས་སྐབས་འདིར་གཞིས་མི་ཉམ་ཐག་འ་ཆད་འུ་ཐུག་དང། ཁ་ཚ་དགོས་གཏུག་རྣམས་ལ་བཟའ་བཅའི་རིགས་མཐུན་འགྱུར་ཞུ་ཆེད་རོགས་དངུལ་བཀའ་འཁྲོལ་བསྩལ་བ་ལྟར། འདི་གའི་ཁྱབ་ཁོངས་གཞིས་མི་གྲངས་ ༡༥ ལ་སྒོར་ ༡༡,༩༥༥ འབབ་ཀྱི་བཟའ་བཅའ་བགོ་འགྲེམས་ཞུས་ཡོད་བཅས། །
