ཕྱི་ལོ་ ༢༠༢༠ ཟླ་ ༧ ཚེས་ ༡༤ རེས་གཟའ་མིག་དམར།
༄༅། །ཕ་ཡུལ་བོད་རྨ་ལྷོ་ཁུལ་རྩེ་ཁོག་རྫོང་རྡོ་དཀར་ཡུལ་ཚོ་རྡོ་དཀར་སྡེ་པའི་བོད་མི་ན་གཞོན་མཁའ་འགྲོ་ཚེ་བརྟན་ཞུ་བ་ཞིག་གིས། ཕྱི་ལོ་ ༢༠༡༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་གླུ་ཚིག་ཅིག་བྲིས་པའི་རྐྱེན་གྱིས་འཛིན་བཟུང་བྱས་ཏེ། འདི་ལོའི་ཕྱི་ཟླ་ ༧ པའི་ཚེས་མགོར་ཁོང་དང་ཁོང་གི་གླུ་ཚིག་ལེན་མཁན་གླུ་བ་ཚེ་རྒོ་གཉིས་ལ་རྒྱལ་ཁབ་མགོ་རྟིང་སློག་ཐབས་བྱས་པའི་ཉེས་མིང་འོག་མཁའ་འགྲོ་ཚེ་བརྟན་ལ་ལོ་ ༧ དང་། གླུ་བ་ཚེ་རྒོ་ལ་ལོ་ ༣ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ནག་ལྡོང་སྡེ་བ་ནས་ཡིན་པའི་བུད་མེད་ཅིག་ཀྱང་གནས་ཚུལ་དེ་དང་འབྲེལ་ནས་འཛིན་བཟུང་བྱས་ཡོད་འདུག
དེ་ཡང་གསར་འགྱུར་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་གསལ་ལྟར་ན། ཕྱི་ལོ་ ༢༠༡༩ ལོར་མཁའ་འགྲོ་ཚེ་བརྟན་གྱིས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་གླུ་ཚིག་ཅིག་བྲིས་པ་དེ་གཞས་པ་ཚེ་རྒོས་རྡུང་ལེན་གྱི་ལམ་ནས་བླངས་རྗེས། ཡུལ་དེའི་ནག་ལྡོང་སྡེ་བའི་བུ་མོ་ཞིག་གིས་གླུ་གཞས་རྡུང་ལེན་དེ་སྐད་འཕྲིན་སོགས་སྤྱི་ཚོགས་དྲ་ལམ་ཁག་ལ་བརྒྱུད་སྐུར་བྱས་པར་བརྟེན་ལོ་དེར་གླུ་ཚིག་རྩོམ་མཁན་དང་ལེན་མཁན། བརྒྱུད་སྐུར་བྱེད་མཁན་གསུམ་འཛིན་བཟུང་བྱས་ཡོད་པ་དང་། ནག་ལྡོང་སྡེ་བའི་བུ་མོ་དེར་ལོ་གཅིག་ཙམ་རིང་བཀག་ཉར་བྱས་རྗེས་ཀློད་ཡོད་ཀྱང་། མཁའ་འགྲོ་ཚེ་བརྟན་ལ་ལོ་ ༧ དང་གླུ་བ་ཚེ་རྒོ་ལ་ལོ་ ༣ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། རྒྱལ་ཁབ་མགོ་རྟིང་སློག་ཐབས་དང་རྒྱལ་ཁབ་ཀྱི་གསང་བ་ཕྱི་ལ་བསྒྲགས་པའི་ཉེས་མིང་འོག་ཁྲིམས་ཐག་བཅད་ཡོད་འདུག
མཁའ་འགྲོ་ཚེ་བརྟན་ལགས་ལ་མཚོན་ན། དེ་སྔ་ཕྱི་ལོ་ ༢༠༡༠ ལོར་རེབ་གོང་ནས་སློབ་མ་ཚོས་སྐད་ཡིག་རང་དབང་གི་ཡར་ལངས་བྱུང་རྗེས། ཕྱི་ལོ་ ༢༠༡༢ ཕྱི་ཟླ་ ༡༢ ནང་དེ་དང་འབྲེལ་བ་ཡོད་སྐོར་བརྗོད་ནས་འཛིན་བཟུང་བྱས་ཏེ། ཕྱི་ལོ་ ༢༠༡༤ ཕྱི་ཟླ་ ༧ བར་བཀག་ཉར་བྱས་ཡོད་པ་དང་། བཙོན་ཁང་ནས་ཀློད་གྲོལ་བཏང་རྗེས་ཕྱི་ལོ་ ༢༠༡༨ བར་འགྲོ་འདུག་རང་དབང་མེད་པ་དང་། སྤྱི་ཚོགས་སྟེང་བྱ་བ་གང་མང་ཞིག་སྒྲུབ་མི་ཆོག་པ་མ་ཟད། ཁོང་གི་ཐོབ་ཐང་ལག་འཁྱེར་རྩིས་མེད་དང་། མུ་མཐུད་དུ་སློབ་སྦྱོང་བྱེད་རྒྱུའི་གོ་སྐབས་ཀྱང་འཕྲོག་སྟབས། བཟའ་ཟླ་ཞིག་བླངས་ནས་བསྡད་ཡོད་པ་དང་། ད་ལྟ་ཁོང་ལ་ཕྲུ་གུ་གཅིག་ཀྱང་ཡོད་འདུག །
