ཕྱི་ལོ་ ༢༠༢༠ ཟླ་ ༧ ཚེས་ ༡༣ རེས་གཟའ་ཟླ་བ།
༄༅། །མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༤༤ འཚོགས་བཞིན་པ་དང་བསྟུན། སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུའི་ཐོག་རྒྱ་ནག་གཞུང་གིས་རྒྱུད་གཅིག་ལམ་གཅིག་དང་ཡར་རྒྱས་འཛུགས་སྐྲུན་ལས་གཞིར་ཁ་གཡར་ནས་བོད་མཐོ་སྒང་གི་འབྲོག་པ་བརྒྱ་ཕྲག་མང་པོ་བཙན་གྱིས་རང་གི་ཕ་མེས་ཡང་མེས་ཀྱི་ས་ཐོག་ནས་ས་ཆ་གཞན་ལ་གནས་སྤོ་བཅུག་ཡོད་པ་མ་ཟད། ལས་གཞི་དེར་ངོ་རྒོལ་བྱེད་མཁན་བོད་མི་རྣམས་ཁ་བྲལ་རིང་ལུགས་པར་བརྩིས་ཏེ་རྡུང་རྡེག་དང་བཙོན་འཇུག་བྱས་དང་བྱེད་བཞིན་ཡོད།
རྒྱ་ནག་གཞུང་གིས་ཕྱི་ལོ་ ༢༠༡༨ ཟླ་ ༡ ནང་ ༼ནག་སེལ་གཤེད་བཅོམ་གྱི་ཆེད་དོན་འཐབ་རྩོད་སྤེལ་རྒྱུའི་བརྡ་ཐོ།༽ ཟེར་བ་ཞིག་སྤེལ་བ་ནས་བཟུང་མཚོ་སྔོན་ཞིང་ཆེན་ནང་ཆེན་རྫོང་མི་དམངས་ཁྲིམས་ཁང་གིས་ཁོར་ཡུག་སྲུང་སྐྱོབ་པ་བོད་མི་ ༢༡ འཛིན་བཟུང་བཙོན་འཇུག་བྱས་ཡོད། དཔེར་ན། ཕྱི་ལོ་ ༢༠༡༩ ཟླ་ ༡༢ ཚེས་ ༦ ཉིན་མཚོ་སྔོན་ཞིང་ཆེན་མགོ་ལོག་ཁུལ་འབྲིང་རིམ་མི་དམངས་ཁྲིམས་ཁང་གིས་སྤྱི་ཚོགས་ལ་དཀྲུག་རྐྱེན་བསླངས་བ་སོགས་ཀྱི་ཉེས་མིང་འོག་ལྐོག་ཟ་རུལ་སུངས་ཐེར་འདོན་གནང་མཁན་ཨ་ཉ་སེང་སྒྲ་ལགས་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད། ཅེས་དང་།
དེར་བརྟེན་ང་ཚོའི་ངོས་ནས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དང་རྒྱལ་ཚོགས་ཀྱི་ཚོགས་མི་རྒྱལ་ཁབ་ཡོངས་ནས་རྒྱ་ནག་གཞུང་ལ་ཨ་ཉ་སེང་སྒྲ་ལགས་ཀྱིས་གཙོས་བོད་ཀྱི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པའི་གནོན་ཤུགས་སྤྲོད་རོགས། ཞེས་འབོད་སྐུལ་ཞུས་ཡོད་པ་བཅས།།
