ཕྱི་ལོ་ ༢༠༢༠ ཟླ་ ༧ ཚེས་ ༡༤ རེས་གཟའ་མིག་དམར། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༡༤ རེས་གཟའ་མིག་དམར་ཉིན་གྱི་ཕྱི་དྲོ་ཆུ་ཚོད་ ༣ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་གྲབ་འབྲས་ཐད་གསུང་དོན། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཁྱབ་ཁོངས་སུ་ཡོད་པའི་བཙན་བྱོལ་བོད་མིའི་སློབ་གྲྭ་ཁག་གི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་ཧ་ཅང་བཟང་པོ་ཐོན་འདུག འདི་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བོད་པའི་སློབ་ཕྲུག་བརྒྱ་ཆ་ ༩༥ ཡན་ལོན་མཁན་བཅུ་དགུ་འདུག དེར་བརྟེན་ངས་སློབ་ཕྲུག་རྣམས་ལ་འཚམས་འདྲི་དང་བསྔགས་བརྗོད་ཞུ་རྒྱུ་ཡིན།  

སྲིད་སྐྱོང་སློབ་ཡོན་ཐོག་མར་འགོ་འཛུགས་བའི་སྐབས་སུ་བགྲོ་གླེང་མང་པོ་བྱུང་ཡོད། བརྒྱ་ཆ་ ༩༠ ལོན་མཁན་རྣམས་ལ་ཧིན་སྒོར་སྟོང་ཕྲག་དྲུག་བཅུ་སྤྲོད་ཀྱི་ཡོད་སྟབས། བརྒྱ་ཆ་ ༩༥ ལོན་མཁན་ལ་སྟོང་ཕྲག་དྲུག་བཅུ་རེ་ལྔའམ་བདུན་བཅུ་དོན་ལྔ་བཟོས་ན་ཞེས་བཀའ་མོལ་བྱུང་བ་རེད་དེ་མཐར་སྒོར་འབུམ་གཅིག་སྤྲོད་རྒྱུའི་ཐག་གཅོད་དང་གསལ་བསྒྲགས་བྱས་པ་རེད། ང་ཚོའི་རེ་བར་ཚང་མར་ཆ་སྙོམས་མིན་པར་སློབ་ཕྲུག་རྩེ་ཕུད་རྣམས་ལ་སེམས་སྐུལ་ལེགས་གསོལ་དང་ངོས་འཛིན། དེ་བཞིན་སློབ་ཕྲུག་ཉམ་ཐག་རྣམས་ལ་ལྟ་རྟོགས་དང་སློབ་ཕྲུག་གཞན་རྣམས་ལའང་རང་རང་གི་འདོད་མོས་ལྟར་སློབ་སྦྱོང་བྱེད་རྒྱུའི་མཐུན་རྐྱེན་སྐྲུན་བཞིན་ཡོད། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་བརྒྱ་ཆ་ཇི་ཙམ་མཐོ་བ་ལོན་པ་ཡིན་ནའང་དེ་ལ་དཔགས་པའི་སློབ་ཡོན་མང་བ་གནང་གི་ཡོད། སྲིད་སྐྱོང་སློབ་ཡོན་གྱིས་བརྒྱ་ཆ་ ༩༥ ལོན་མཁན་རྣམས་ལ་ཆེ་མཐོང་དང་ངོས་འཛིན་གནང་གི་ཡོད་པ་རེད། 

སྐབས་དེར་སྤྱི་ཚོགས་ནང་དང་སློབ་ཕྲུག་ཁག་གཅིག་གིས་བརྒྱ་ཆ་ ༩༥ ལོན་རྒྱུ་དེ་ཤེལ་སྒོའི་ནང་གི་མོག་མོག་ལྟ་བུ་རེད་འདུག བཙན་བྱོལ་བོད་མིའི་སློབ་གྲྭ་ཁག་གི་ནང་བརྒྱ་ཆ་ ༩༥ ལོན་མཁན་ཕལ་ཆེར་སློབ་ཕྲུག་གཅིག་ཀྱང་བྱུང་མེད་སྟབས། ཐོབ་རྒྱུ་ཡོད་མ་རེད་ཅེས་བརྗོད་མཁན་ཡང་བྱུང་ཡོད། འོན་ཀྱང་སློབ་ཕྲུག་མང་པོ་ཞིག་སེམས་ཤུགས་ཏན་ཏན་འཕར་འདུག དེར་བརྟེན་ཕྱི་ལོ་ ༢༠༡༣ ལོར་མ་སུ་རི་བོད་ཁྱིམ་གྱི་སློབ་མ་བསྟན་འཛིན་ཆོས་སྐྱིད་ལགས་ཀྱིས་བརྒྱ་ཆ་ ༩༥་༤ བླངས་ཡོད། དེ་བཞིན་ཕྱི་ལོ་ ༢༠༡༥ ལོར་སུ་ཇ་བོད་ཁྱིམ་གྱི་སློབ་མ་བསྟན་འཛིན་དགྲ་འདུལ་ལགས་ཀྱིས་བརྒྱ་ཆ་ ༩༥་༨ དང་། དེ་བཞིན་འཕྲུལ་ལས་རིག་རྩལ་ཐོག་སློབ་སྦྱོང་གནང་བཞིན་པའི་སློབ་བུ་འཇིགས་མེད་ཚེ་རིང་ལགས་ཀྱིས་མཐོ་སློབ་ཡིག་རྒྱུགས་ནང་བརྒྱ་ཆ་ ༩༧།༩ ལོན་པ་བྱུང་ཡོད། དེ་རྗེས་བརྒྱ་ཆ་ ༩༥ ལོན་མཁན་བྱུང་མེད། ད་རེས་བོད་པའི་སློབ་ཕྲུག་བཅུ་དགུ་ཡིས་བརྒྱ་ཆ་ ༩༥ བླངས་ཡོད། 

འདི་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བོད་པའི་སློབ་ཕྲུག་གྲངས་ ༡༠༡༦ གིས་ཡིག་རྒྱུགས་ནང་འཛུལ་ཞུགས་བྱས་ཡོད་པའི་ཁོངས་ནས་སློབ་ཕྲུག་གྲངས་ ༩༩༨ ཡིག་རྒྱུགས་འཕྲོད་པར་ཧ་ཅང་དགའ་སྤོབས་བྱུང་། དེ་སྔོན་འཕགས་བོད་གཉིས་ཀྱི་ས་མཚམས་སུ་རྒྱ་དཀར་ནག་དབར་རྙོག་གྲ་བྱུང་བའི་སྐབས་རྒྱ་གར་གསར་འགྱུར་བརྒྱུད་ལམ་ཁག་ཏུ་ངས་མཛུབ་མོ་ལྔའི་ཐོག་ནས་བཤད་ཀྱི་ཡོད།

དེ་བཞིན་སློབ་ཕྲུག་རྣམས་ཀྱི་ཡིག་རྒྱུགས་གྲུབ་འབྲས་བཟང་པོ་འཐོན་པའི་རྒྱུ་མཚན་གཙོ་བོ་ནི། དང་པོ་ནི། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མཐུན་རྐྱེན་སྦྱོར་སྤྲོད་གནང་བར་བརྟེན་ཡོང་བཞིན་ཡོད་པ་མ་ཟད། ཤེས་རིག་བཀའ་བློན་པདྨ་དབྱངས་ཅན་མཆོག་གིས་འགན་བཞེས་ཏེ་ཏོག་དབྱིབས་གཉན་རིམས་ཀྱི་ཛ་དྲག་གི་དུས་སྐབས་དེར་འབྲེལ་ཡོད་དགེ་རྒན་རྣམས་ཀྱིས་སློབ་ཚན་རྣམས་ཕྱི་དྲིལ་བོད་ཀྱི་སྒྲ་བརྙན་བརྒྱུད་སློབ་ཁྲིད་གནང་བ་དང་། གཞན་ཡང་སློབ་ཕྲུག་རྣམས་ལ་སློབ་གསོ་དང་ཤེས་ཡོན་གྱི་ལས་དོན་སོགས་ལ་ཧུར་ཐག་གནང་བ། ཕྱོགས་མཚུངས་ཤེས་རིག་ལས་ཁུངས་ཀྱི་ལས་བྱེད་ཡོངས་ནས་མཉམ་རུབ་གནང་ཡོད། བཀའ་ཤག་སྐབས་ ༡༤ དང་ ༡༥ ནས་ལས་དོན་ཚང་མའི་ནང་ནས་ཤེས་ཡོན་གལ་ཆེ་ཤོས་བརྩིས་བའི་ཐོག་ཕྱི་ལོ་ ༢༠༡༡ ནས་བཟུང་ད་བར་ཤེས་རིག་ལས་ཁུངས་ཀྱི་སྔོན་རྩིས་ལྡབ་གསུམ་འཕར་ཡོད། བཙན་བྱོལ་གྱི་གནས་སྟངས་ལ་དཔགས་པའི་སློབ་གྲྭ་ཁག་ལ་མཐུན་རྐྱེན་ཡག་པོ་སྐྲུན་བཞིན་ཡོད། གཉིས་པ་ནི། སློབ་གྲྭ་ཁག་གི་སློབ་སྤྱིས་གཙོས་ལས་བྱེད་རྣམས་ཀྱིས་སློབ་གྲྭར་སྟངས་འཛིན་བྱེད་ཕྱོགས། གསུམ་པ་ནི། དགེ་རྒན་རྣམས་ཀྱིས་སློབ་ཕྲུག་རྣམས་ལ་བྱམས་དང་བརྩེ་བའི་ཐོག་ནས་སློབ་ཚན་འཁྲིད་པ་ཙམ་མ་ཟད། ཕ་མ་ལྟ་བུའི་སློབ་གསོ་བརྒྱབ་པ་ལ་བརྟེན་ནས་ཡིན། བཞི་པ་ནི། སློབ་ཕྲུག་རང་ངོས་ནས་དོ་དབྱིངས་ཡོད་པའི་ཐོག་ནས་སློབ་སྦྱོང་ལ་ཧུར་བརྩོན་དང་འབད་བརྩོན་གནང་བ། ལྔ་པ་ནི། ཕ་མའི་སློབ་གསོ་བཟང་པོ་ལ་བརྟེན་ནས་བྱུང་ཡོད།  ད་ལན་ཚང་མས་ཕྱག་ལས་ཧ་ཅང་ཡག་པོ་གནང་བར་བརྟེན་ལོ་རྒྱུས་ལྡན་པའི་གྲུབ་འབྲས་སྨིན་ཐུབ་པ་བྱུང་ཡོད།  སླར་ཡང་ཚང་མར་བསྔགས་བརྗོད་དང་འཚམས་འདྲི་གྲངས་མེད་ཞུ་རྒྱུ་ཡིན། ཞེས་གསུངས། །