ཕྱི་ལོ་ ༢༠༢༠ ཟླ་ ༧ ཚེས་ ༨ རེས་གཟའ་ལྷག་པ། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༧ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་མ་ཡི་ཀི་པོམ་པེའོ་ Michael R. Pompeo མཆོག་གིས་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན། རྒྱ་ནག་གཞུང་གི་ལས་བྱེད་དང་མི་སེར་སོགས་ཨ་རིའི་ནང་རང་དབང་གི་སྒོ་ནས་ཡོང་ཆོག་གི་ཡོད་ཀྱང་། ཨ་རིའི་གཞུང་གི་གཞུང་ཚབ་མི་སྣ་དང་། ལས་བྱེད། གསར་འགོད་པ། ཡུལ་སྐོར་སྤྲོ་འཆམ་པ་སོགས་བོད་རང་སྐྱོང་ལྗོངས་ཀྱིས་གཙོས་བོད་ཀྱི་ས་ཁུལ་གཞན་ཁག་གི་ནང་བསྐྱོད་པར་རྒྱ་ནག་གཞུང་གིས་བཀག་འགོག་བྱེད་བཞིན་ཡོད་པར་བརྟེན། ཨ་རིའི་གཞུང་ནས། རྒྱ་ནག་གཞུང་གིས་ཨ་རིའི་མི་སེར་ཚོའི་ཐོག་ལའང་དྲང་བདེན་དང་ཕྱི་གསལ་ནང་གསལ་གཅིག་མཚུངས་བྱེད་དགོས་པའི་འབོད་སྐུལ་གནང་འདུག 

ཕྱི་ལོ་ ༢༠༡༨ ལོར་ཨ་རིའི་གྲོས་ཚོགས་གོང་འོག་གི་འཐུས་མི་རྣམ་པས་སྤྱི་མོས་ཐོག་བོད་དུ་རང་དབང་གི་སྒོ་ནས་ཕར་འགྲོ་ཚུར་འོང་ཆོག་པའི་ཁྲིམས་འཆར་ Reciprocal Access to Tibet Act ཁྲིམས་སུ་གཏན་འབེབས་གནང་བ་གཞིར་བཟུང་། དེ་རིང་ངས་རྒྱ་ནག་གཞུང་དང་རྒྱ་ནག་དམར་ཤོག་ཚོགས་པའི་ལས་བྱེད་ཚོས་ཕྱི་རྒྱལ་མི་རིགས་བོད་ཀྱི་ས་ཁུལ་ཁག་ཏུ་བསྐྱོད་པར་དམ་བསྒྲགས་ཀྱིས་སྲིད་བྱུས་ལག་བསྟར་བྱེད་བཞིན་པ་ཚོའི་ཐོག་ཨ་རིའི་གཞུང་གིས་མཐོང་མཆན་སྤྲོད་རྒྱུར་དམ་བསྒྲགས་གནང་རྒྱུ་ཡིན་པའི་གསལ་བསྒྲགས་བྱེད་བཞིན་ཡོད། ཅེས་དང་། 
གཞན་ཡང་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་དང་། བོད་མཐོ་སྒང་གི་ཁོར་ཡུག་དང་གཙང་ཆུ་སོགས་སྲུང་སྐྱོབ་བྱེད་ཀྱི་མེད་སྟབས། ཨ་རིའི་གཞུང་ཚབ་མི་སྣ་དང་ལས་བྱེད་སོགས་བོད་ཀྱི་ས་ཁུལ་ཁག་ཏུ་བསྐྱོད་རྒྱུ་གལ་ཆེན་པོ་ཆགས་ཡོད། ཨ་རིའི་གཞུང་གིས་བོད་ཀྱི་ཁོར་ཡུག་དང་། དཔལ་འབྱོར་ཡར་རྒྱས། གཞིས་བྱེས་བོད་མིའི་འཚོ་བའི་གནས་སྟངས་གོང་མཐོར་གཏོང་ཆེད་མུ་མཐུད་ཕྱག་ལས་གནང་རྒྱུ་ཡིན། ཞེས་གསུང་། 
ཕྱོགས་མཚུངས་ང་ཚོའི་ངོས་ནས་བོད་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་སུ་རྒྱབ་སྐྱོར་བྱེད་བཞིན་ཡོད་པ་མ་ཟད། བོད་ཀྱི་ཆོས་དང་། རིག་གཞུང་། སྐད་ཡིག གཞི་རྩའི་འགྲོ་བ་མིའི་ཐོབ་ཐང་སོགས་ལ་རྒྱབ་སྐྱོར་བྱེད་བཞིན་ཡོད། ང་ཚོའི་ངོས་ནས་ཨ་རིའི་གྲོས་ཚོགས་དང་ལྷན་ཨ་རིའི་མི་སེར་རྒྱ་ནག་དང་། དེ་བཞིན་བོད་རང་སྐྱོང་ལྗོངས་དང་བོད་ཀྱི་ས་ཁུལ་གཞན་ཁག་ཏུ་རང་དབང་གི་སྒོ་ནས་བསྐྱོད་ཐུབ་པའི་འབད་བརྩོན་མཐའ་གཅིག་ཏུ་ཞུ་རྒྱུ་ཡིན། ཞེས་གསུངས།།