ཕྱི་ལོ་ ༢༠༢༠ ཟླ་ ༧ ཚེས་ ༢༣ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༢༠ རེས་གཟའ་ཟླ་བའི་ཉིན་ཨིན་ཡུལ་སྐུ་ཚབ་དོན་ཁང་གི་གོ་སྒྲིག་འོག་དྲ་ལམ་བརྒྱུད། བོད་དང་ཧོང་ཀོང་གི་རང་སྐྱོང་གནས་བབ་སྤྲོད་རྒྱུར་ཁས་ལེན་བྱས་པའི་ཁ་དན་ཚིག་ལ་མ་གནས་པའི་བྱེད་བབ་ལ་སྐྱོན་བརྗོད་དང་སྦྲགས་གསལ་འདོན། Tibet and Hong Kong’ A spotlight on broken promises of China ཞེས་པའི་བརྗོད་གཞིའི་ཐོག་གསུང་བཤད་ལས་རིམ་ཞིག་ཚོགས་གནང་ཡོད། 

སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་དང་ཧོང་ཀོང་གཉིས་ལ་རྒྱ་ནག་གཞུང་གིས་རང་སྐྱོང་གནས་བབ་སྤྲོད་རྒྱུར་ཁས་ལེན་བྱས་པ་གཞིར་བཟུང་ཁ་དན་ཚིག་ལ་མ་གནས་པའི་གནས་སྟངས་གཅིག་མཚུངས་ཞེས་པའི་བརྗོད་གཞིའི་ཐོག་གསུང་དོན། ཕྱི་ལོ་ ༡༩༥༡ ལོར་རྒྱལ་ཁབ་གཅིག་ལ་ལམ་ལུགས་གཉིས་ཀྱི་འོག་རྒྱ་ནག་དང་བོད་དབར་ཆིངས་ཡིག་དོན་ཚན་བཅུ་བདུན་བཞག་ཡོད་ཀྱང་། གང་ལྟར་རྒྱ་ནག་གཞུང་གིས་བོད་ཐོག་བཞག་པའི་ཆིངས་ཡིག་དོན་ཚན་གྱི་ཆ་རྐྱེན་རྣམས་བརྩི་མེད་བཏང་བ་དང་རང་སྐྱོང་གནས་བབ་སྤྲོད་རྒྱུ་ལ་སོགས་ཀྱི་ཁས་ལེན་བྱས་པ་རྣམས་ངོས་ལེན་བྱས་མེད། སྟབས་མ་ལེགས་པ་ཞིག་ལ་བོད་ལ་འཕྲད་བཞིན་པའི་དཀའ་ངལ་རྣམས་ད་ལྟ་ཧོང་ཀོང་དུ་འཕྲད་བཞིན་ཡོད་པར་ང་ཚོས་ཧོང་ཀོང་གཞུང་མང་གཉིས་ལ་གདུང་སེམས་མཉམ་སྐྱེ་ཞུ་གི་ཡོད། ཅེས་གསུངས། 

ཨིན་ཡུལ་གྲོས་ཚོགས་འཐུས་མི་ཊོམ་མཆོག

ཨིན་ཡུལ་གྲོས་ཚོགས་འཐུས་མི་ཊོམ་ Tom Tugendhat མཆོག་གིས། ཉེ་བའི་ལོ་ཤས་ནས་བཟུང་ཨིན་ཡུལ་དང་རྒྱ་ནག་གཞུང་དབར་གྱི་འབྲེལ་ལམ་ལ་འགྱུར་ལྡོག་ཕྱིན་ཡོད་པ་མ་ཟད། ཨིན་གཞུང་གིས་རྒྱ་ནག་གི་ཁ་པར་ Huawei ཞེས་པ་བཀག་སྡོམ་བྱས་ཡོད།  ཨིན་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གིས་རྒྱ་རིགས་སློབ་ཕྲུག་དང་ཕ་མར་གནོན་ཤུགས་སྤྲད་ནས་ངོ་རྒོལ་གྱི་ལས་འགུལ་སྣ་མང་སྤེལ་ཏེ་ཨིན་ཡུལ་དུ་རྟེན་གཞི་བྱས་པའི་སྙན་གྲགས་ཅན་གྱི་ཤེས་ཡོན་གྱི་བསྟི་གནས་ཁང་གི་རང་དབང་ལ་ཁྱད་གསོད་བྱེད་བཞིན་ཡོད་སྐོར་སོགས་གསུངས།

ཨིན་ཡུལ་གྲོས་ཚོགས་འཐུས་མི་ཊིམ་ལོབ་ཊོན་མཆོག

ཨིན་ཡུལ་གྲོས་ཚོགས་འཐུས་མི་དང་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཊིམ་ལོབ་ཊོན་ Tim Loughton མཆོག་གིས་བོད་ནང་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་ཞེས་པའི་ཐོག་གསུང་དོན། རྒྱ་ནག་གཞུང་གིས་ཡུ་གུར་མི་མང་ལ་གདུག་རྩུབ་དྲག་གནོན་བྱེད་བཞིན་པ་དང་། ཨིན་ཡུལ་ནང་རྒྱ་གཞུང་གི་སྟངས་འཛིན་འོག་ཚོགས་སྡེ་ཁག་གིས་དཀྲོག་གཏམ་ལ་སོགས་སྤེལ་བཞིན་ཡོད་པར་སྐྱོན་བརྗོད་ཤུགས་ཆེར་གནང་། གཞན་ཡང་ཧོང་ཀོང་གི་གནས་སྟངས་ཐོག་གླེང་སློང་དང་། ད་ལྟའང་བོད་ནང་རྒྱ་ནག་གཞུང་གིས་བཙན་གནོན་དང་སྡུག་སྦྱོང་མནར་གཅོད་སོགས་བྱེད་བཞིན་ཡོད་པར་བརྟེན་ང་ཚོས་སེམས་ཤུགས་མ་ཆགས་པའི་ཐོག་ནས་འཐབ་རྩོད་མུ་མཐུད་རྩོད་དགོས། ཞེས་གསུངས།

སློབ་དཔོན་ཀི་རི་མཆོག

ཨིན་ཡུལ་དུ་རྟེན་གཞི་བྱས་པའི་ཀིངྒ་མཐོ་སློབ་ཀྱི་ Lau China ཞེས་པའི་སློབ་གཉེར་ཁང་གི་འགན་འཛིན་སློབ་དཔོན་ཀི་རི་ Kerry Brown མཆོག་གིས་རྒྱ་ནག་གི་ས་བབ་ཆགས་ཚུལ་དང་གོ་སྐབས། དེ་བཞིན་རྒྱལ་ནང་གི་དཀའ་ངལ་བཅས་གནད་དོན་གསུམ་གྱི་ཐོག་གསལ་འདོན་གནང་། གཞན་ཡང་ཁོང་གིས་ད་ཆ་རྒྱ་ནག་ནི་ཨ་རི་དང་ཡུ་རོབ། ཨིན་ཡུལ། ཨོ་སི་ཀྲི་ལི་ཡའི་བཅས་རྒྱལ་ཁབ་ཁག་དང་ལྷན་དུ་རྙོག་གླེང་འགྲོ་བཞིན་ཡོད་པ་ནི་འཆར་གཞི་མེད་པ་ཞིག་རེད། ད་ཆ་རྒྱ་གཞུང་གིས་ཤིན་ཅང་དུ་དྲག་གནོན་གྱི་སྲིད་བྱུས་འཛིན་བཞིན་པ་དེ་ནི་སྔར་བོད་ཐོག་དེ་དེ་བཞིན་གནོན་ཤུགས་བྱས་ཡོད་སྐོར་སོགས་གསལ་འདོན་ནན་པོ་གནང་།

མཐར་དྲ་ལམ་བརྒྱུད་མང་ཚོགས་ཀྱི་དྲི་བར་ལན་འདེབས་གནང་ཡོད་པ་བཅས། །