༄༅། །བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་ཐེངས་དང་པོ་དྲྭ་རྒྱ་བརྒྱུད་སོ་ནམ་སློབ་སྟོན་པ་རྣམས་ལ་སོ་ནམ་ལས་དོན་ཡར་རྒྱས་གཏོང་ཕྱོགས་ཀྱི་ཟབ་སྦྱོང་གནང་ཡོད།   དེ་ཡང་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ལོ་ལྟར་རྒྱ་གར་དང་བལ་ཡུལ་ནང་གི་བཙན་བྱོལ་བོད་མིའི་སོ་ནམ་གཞིས་ཆགས་ཁག་གི་སོ་ནམ་སློབ་སྟོན་པ་རྣམས་ལ་ཞིང་ལས་ཤེས་བྱ་གོང་མཐོར་གཏོང་རྒྱུའི་ཟབ་སྦྱོང་གནང་སྲོལ་ཡོད་ཀྱང་ད་ཆ་ཏོག་དབྱིབས་གཉན་རིམས་ཀྱི་རྐྱེན་པས་ཟབ་སྦྱོང་དེ་བཞིན་སྔར་ལྟར་གནང་མ་ཐུབ་པར་བརྟེན། ཐེངས་འདིར་རྒྱ་གར་དང་བལ་ཡུལ་ནས་སོ་ནམ་སློབ་སྟོན་པ་ཁྱོན་མི་གྲངས་ ༡༦ ཙམ་དང་། དེ་བཞིན་བོད་ཀྱི་ཐེབས་རྩ་དང་ནང་སྲིད་ལས་ཁུངས་ཀྱི་སོ་ནམ་སྡེ་ཚན་གྱི་འབྲེལ་ཡོད་ལས་བྱེད་ལ་དྲྭ་རྒྱའི་ལམ་ནས་ཞིང་ལས་ལག་རྩལ་གོང་མཐོར་བཏང་སྟེ་ཞིང་པ་རྣམས་ལ་སྔར་ལྷག་ཞབས་འདེགས་ལེགས་པར་གཏོང་རྒྱུའི་ཟབ་སྦྱོང་ཞིག་གོ་སྒྲིག་གནང་ཡོད།

ནང་སྲིད་དྲུང་འཕར་ཟླ་བ་ཚུལ་ཁྲིམས་ཀྱིས་ཐེངས་འདིར་དྲྭ་རྒྱའི་བརྒྱུད་ཟབ་སྦྱོང་གོ་སྒྲིག་གནང་དགོས་དོན་ནི། བཙན་བྱོལ་བོད་མིའི་སོ་ནམ་གཞིས་ཆགས་ཁག་གི་སོ་ནམ་སློབ་སྟོན་པ་རྣམས་ནས་སོ་ནམ་ལས་དོན་ཇི་ལྟར་ཡར་རྒྱས་གཏོང་དགོས་པའི་སྐོར་གསུངས་པ་དང་། ནང་སྲིད་སོ་ནམ་སྡེ་ཚན་གྱི་འགན་འཛིན་དོན་གྲུབ་ཚེ་རིང་ལགས་ཀྱིས། ཕེབས་བསུ་དང་འབྲེལ་ཐེངས་འདིའི་ཟབ་སྦྱོང་གི་དགོས་དམིགས་ངོ་སྤྲོད་དང་། མ་འོངས་པར་དྲྭ་རྒྱ་བརྒྱུད་ཟབ་སྦྱོང་འདི་རིགས་མུ་མཐུད་སྤེལ་དགོས་རྒྱུ་གལ་ཆེན་པོ་ཡིན་སྐོར་སོགས་གསུང་། 

ཐེངས་འདིའི་དྲྭ་ཐོག་གི་སོ་ནམ་ཟབ་སྦྱོང་ལ་སོ་ནམ་སྦྱོང་བརྡར་བསྟི་གནས་ཁང་ Ray one agri-consulting ཞེས་པས་མཐུན་འགྱུར་གནང་ཡོད་པ་བཅས།།