ཕྱི་ལོ་ ༢༠༢༠ ཟླ་ ༧ ཚེས་ ༨ རེས་གཟའ་ལྷག་པ།
༄༅། །འདི་གར་སྡེ་རྭ་ལྡུན་ཁྱབ་ཁོངས་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༧ ཚེས་ ༧ ཉིན་སྤྱི་ནོར་༸གོང་ས༸སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་བརྒྱད་ཅུ་གྱ་ལྔར་ཕེབས་པའི་སྐུའི་འཁྲུངས་སྐར་དུས་ཆེན་དང་བསྟུན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་དྲ་ཐོག་བརྒྱུད་སྡེ་རྭ་ལྡུན་ཁྱབ་ཁོངས་ས་གནས་སུ་བོད་འབྱོར་སྡོད་ཁང་དང༌། ས་གནས་འགོ་འཛིན་ལས་ཁུངས་ཀྱི་ལས་ཤག་དང་མགྲོན་ཁང༌། བདེ་སྐྱིད་གླིང་དང་དགེ་འཕེལ་གླིང་ཐུན་མོང་གི་ཆུ་མཛོད་བཅས་དབུ་འབྱེད་གནང་ཡོད།

ཕྱི་ལོ་ ༢༠༡༨ ལོར་སྡེ་རྭ་ལྡུན་ཆོལ་གསུམ་གསར་འབྱོར་སྐྱིད་སྡུག་ཁོངས་ཡོད་དགེ་འཕེལ་གཞིས་གསར་ཉེ་འཁྲིས་ཀྱི་ས་ཆ་ཨེ་ཀར་ ༢ ཙམ་ཐོག་སྡོད་ཁང་གསར་རྒྱག་ཆེད། ས་ཆ་དང་ལམ༌། ཆུ་གློག དེ་བཞིན་མངའ་གཞུང་ནས་ཨར་པོའི་ཆོག་མཆན་ཞུ་རྒྱུའི་མཐུན་འགྱུར་བཅས་ནང་སྲིད་ལས་ཁུངས་ནས་གནང་རྒྱུ་དང༌། ཨར་གྲོན་ཡོངས་རྫོགས་བོད་འབྱོར་དུད་ཚང་སོ་སོས་བསྡུ་འབུལ་ཞུ་རྒྱུའི་མོས་མཐུན་བྱུང་ཐོག་སྡོད་ཁང་བརྒྱག་རྒྱུར་གཞི་རིམ་གྱི་འཆར་གཞི་བསྒྲིགས། མ་འོངས་པར་གཞུང་མང་བར་གླེང་སློང་རིགས་མི་ཡོང་སླད་བོད་འབྱོར་དུད་ཚང་ཚང་མས་མོས་མཐུན་ས་རྟགས་བཀོད་པའི་ནང་སྲིད་དང་སྐྱིད་སྡུག་གཉིས་མོས་ཀྱི་ཁྲིམས་མཐུན་གན་ཡིག་བཞག

དངོས་སུ་ཨར་གྲོན་བསྡུ་འགོ་འཛུགས་སྐབས་ཨར་གྲོན་བརྒྱ་ཆ་ ༡༠༠ བསྡུ་ཐུབ་མཁན་དུད་ཚང་ ༢༥ མ་གཏོགས་མེད། དུད་ཚང་ ༢༥ ཆེད་ཁང་རྒྱག་ལས་གཞི་ལོགས་སུ་ལག་བསྟར་ཞུ་མི་དགོས་པར་དེ་སྔ་དགེ་འཕེལ་གླིང་སྡོད་ཁང་ཁོངས་ས་འགོ་ལས་ཁུངས་ཀྱི་ལས་ཤག་དང་མགྲོན་ཁང་བཅས་ཀྱི་ཟུར་འཇོག་སྡོད་ཁང་གྲངས་ ༩ ཡོད་པ་དེ་དག་བོད་འབྱོར་དུད་ཚང་ ༢༥ ཁོངས་ནས་དུད་ཚང་ ༩ ལ་བཤུག་ཏེ་འཕྲོས་བོད་འབྱོར་དུད་ཚང་རྣམས་ཀྱི་ཆེད་དེ་སྔ་མངའ་གཞུང་གྲོང་སྡེ་ལས་ཁུངས་ MDDA ནས་བཀའ་འཁྲོལ་ཡོད་བཞིན་པའི་ཐོག་སྡོད་ཁང་གྲངས་ ༡༦ ཅན་གྱི་ཁང་སྡེ་གཞན་ཞིག་གསར་རྒྱག་ཞུ་གཏན་འཁེལ་བ་བྱུང༌།

ལས་གཞི་འདིའི་ས་གནས་ཨར་ལས་ཚོགས་ཆུང་གི་གྲུབ་ཆའི་ཁོངས་སྡེ་རྭ་ལྡུན་ས་གནས་འགོ་འཛིན་དང༌། ཁ་ཐོར་ལས་དྲུང༌། རྩིས་པ། ར་སྤུར་བེུད་མཉམ་ལས་བཟོ་འགོ། བོད་འབྱོར་དུད་ཚང་ནས་ཚོགས་མི་གཉིས་བཅས་ཡིན། ཁང་པའི་ཨར་གྲོན་བསྡུ་ཕྱོགས་ཐད། དུད་ཚང་རེར་ཨར་གྲོན་ཁྱོན་བསྡོམས་འབུམ་ ༡༨ རེའི་བསྡུ་བྱའི་ཁོངས་བསྡུ་ཐེངས་གཉིས་སྟེ་དང་པོ་འབུམ་ ༩ དང་སྡོད་ཁང་རྩིས་སྤྲོད་མ་བྱས་གོང་འབུམ་ ༩ བསྡུ་རྒྱུ་བྱས་ཀྱང༌། སྐབས་དེར་སྐྱིད་སྡུག་ནས་ཨར་གྲོན་ཆག་ཡང་ཡོང་ཞུས་ཐད་ནང་སྲིད་ལས་ཁུངས་ནས་ལས་གཞི་དངོས་སུ་ལག་བསྟར་སྐབས་ཨར་གྲོན་འཕར་མ་བསྡུ་དགོས་མ་བྱུང་ཚེ་ཞུས་དོན་ལྟར་དགོངས་བཞེས་གནང་རྒྱུ་གནང་མཐར་བསྡུ་ཐེངས་གཉིས་པའི་དངུལ་འབབ་སྒོར་འབུམ་ ༦ མ་གཏོགས་བསྡུ་མི་དགོས་པ་བྱུང་སྟེ་མདོར་ན་དུད་ཚང་རེ་ནས་བསྡོམས་ཧིན་སྒོར་འབུམ་ ༡༥ རེ་བསྡུ་འབུལ་ཞུས་མཐར་ཕྱི་ལོ་ ༢༠༡༩ ཟླ་ ༡༢ ཟླ་ ༡༡ ནས་ལས་གཞི་འགོ་བཙུགས་ཏེ་ཕྱི་ལོ་ ༢༠༢༠ ཟླ་ ༦ ཚེས་ ༣༠ བར་མཇུག་སྒྲིལ་ལེགས་གྲུབ་བྱུང་སྟེ་དེ་རིང་གི་དབུ་འབྱེད་གནང་བའི་ཁང་སྡེ་གསར་པ་འདི་བཞིན་བོད་འབྱོར་དུད་ཚང་རྣམས་ལ་བགོ་སྤྲོད་ཐུབ་པ་བྱུང་ཡོད།

སྡེ་རྭ་ལྡུན་ས་གནས་འགོ་འཛིན་ལས་ཁུངས་ཀྱི་ལས་ལས་ཤག་དང་མགྲོན་ཁང་གསར་རྒྱག་ལས་གཞི།
ད་ཡོད་ལས་ཤག་དང་མགྲོན་ཁང་དེ་དག་གི་སྒོ་སྒེའུ་ཁུང་གིས་མཚོན་པའི་སྤྱི་ཡོངས་ཀྱི་ཁང་པའི་གནས་སྟངས་ཧ་ཅང་ཞན་པའི་ཁར་ཁང་པའི་ཡུན་ཚད་ལོ་ ༢༠ ལྷག་ཡོལ་ཟིན་ཡོད། ད་ལན་བོད་འབྱོར་ཁང་སྡེ་གསར་པའི་ཉེ་འཁྲིས་སུ་དེ་སྔ་གྲོང་སྡེ་ལས་ཁུངས་ཀྱི་བཀའ་འཁྲོལ་ཆོག་མཆན་ཡོད་པའི་ས་ཆའི་ཐོག་ས་གནས་འགོ་འཛིན་གཙོས་པའི་ལས་བྱེད་བཞི་ལ་ལས་ཤག་རེ་དང་མགྲོན་ཁང་གཅིག་བཅས་ཐོག་རྩེག་གཉིས་ཅན་གྱི་ཁང་སྡེ་གཉིས་གསར་རྒྱག་ནང་སྲིད་ལས་ཁུངས་སུ་ཛ་དྲག་ཆེད་བཅར་གྱིས་ལས་ཤག་དཀའ་སེལ་གྱི་བདེ་སྙན་བཀའ་འཁྲོལ་ཞུས་པ་གཞིར་བཟུང་ནང་སྲིད་བཀའ་བློན་མཆོག་གིས་དགོངས་བཞེས་བཀྲིན་ཆེ་བསྐྱངས་ཀྱིས་རྒྱབ་གཉེར་གནང་སྟེ་ལས་འཆར་བཀའ་འཁྲོལ་ཞུས་ཐོབ་ཐུབ་པ་བྱུང་མཐར། ཕྱི་ལོ་ ༢༠༢༠ ཟླ་ ༢ ཚེས་ ༡༩ ནས་ལས་གཞི་འགོ་འཛུགས་ཀྱིས་ཕྱི་ལོ་ ༢༠༢༠ ཟླ་ ༦ ཚེས་ ༣༠ ཉིན་དངོས་སུ་མཇུག་སྒྲིལ་ཟིན།

ཆུ་མཛོད།
མ་འོངས་གཞིས་གསར་འདི་དང་བདེ་སྐྱིད་གླིང་གཞིས་ཆགས་ཐུན་མོང་ལ་ཕུགས་རྒྱང་རིང་པོའི་འཐུང་ཆུའི་མཐུན་རྐྱེན་འདང་ངེས་ཤིག་ཡོང་རྒྱུར་དམིགས་ཏེ་འདི་ག་ས་གནས་འགོ་འཛིན་ལས་ཁུངས་ནས་ནེ་ཐར་ལེནཌ་རྟེན་གཞི་བྱས་པའི་ཨ་མ་གཡུ་སྒྲོན་རོགས་ཚོགས་ཀྱི་བརྒྱུད་ MR. TON STAPS, MR. ROB STAPS-JANSSEN, MS ANNEMIEKE KLEISTERLEE-JANSSEN & MR. GERARD KLEISTERLEE ཞུ་བའི་ཕྱི་རྒྱལ་བ་མི་སྒེར་བཞི་ལ་ལི་ཊར་འབུམ་གཉིས་ཅན་གྱི་ཆུ་མཛོད་ཞིག་གསར་སྐྲུན་ཞུ་རྒྱུར་རོགས་དངུལ་ཐབས་འཚོལ་ཞུས་པ་གཞིར་བཟུང༌། སྦྱིན་བདག་དེ་རྣམས་ནས་གཏོང་ཕོད་ཆེན་པོས་ལས་གཞི་ལ་ཕན་པའི་འགྲོ་གྲོན་རོགས་དངུལ་ཧིན་སྒོར་ ༡༩༠༢༦༢༥ གནང་སོན་བྱུང་སྟེ་བདེ་སྐྱིད་གླིང་གཞིས་ཆགས་ཀྱི་ཐོད་དུ་ཆུ་མཛོད་གསར་སྐྲུན་ལེགས་གྲུབ་བྱུང་ཡོད། །